AMOSE 4

₁Theeletšang mo, lena basadi ba Samaria, le nonnego bjalo ka dikgomo tša Bashane, lena le hlakišago bahloki, le pateletšago badiidi, le gona le rego go banna ba lena: “A bo tle re bo kakate!” ₂Morena, Mong wa bohle, o ikanne ka ge e le yo mokgethwa a re: “Go tlilo tla nako yeo ka yona ba tlago le hlwahlwaiša ka dikgwega. Mongwe le mongwe wa lena o tla hlwahlwaišwa ka kgwega ya dihlapi. ₃Le tla hlwahlwaišwa la ntšhetšwa ka ntle, mongwe le mongwe a ntšhwa ka lešoba la morako le a lebanego nalo, a rakelwa thabeng ya Hermone.” O realo, Morena.

₄“Lena Baisraele, le ka no ya Bethele la dira dibe! Le ka no ikela Gilgale la dira dibe le go feta! Le ka no tsogela go iša didimo ka mehla, la iša karolo ya lesome ka letšatši le lengwe le le lengwe la boraro. ₅Le ka no iša senkgwa ya ba kabelo ya tebogo, la ba la itheta ka dikabelo tša lena tša boithaopo; la ikgantšha ka tšona, gobane seo ke se le se ratago.” O realo, Morena, Mong wa bohle.

₆“Ke nna ke ilego ka le bolaiša tlala metseng yohle ya lena, ka le hlokiša dijo ka malapeng a lena, fela la se sokologele go nna.” O realo, Morena. ₇“Ka le tima le pula go sa šetše kgwedi tše tharo gore go bunwe. Ka neša pula motseng wo mongwe, wo mongwe ka o hlokiša yona. Ya na tšhemong ye nngwe, go ye nngwe ya se ne, mme dibjalo tša yona tša pona. ₈Batho ba metse ye mmalwa ba be ba ikgoga ba eya motseng wo mongwe go nyaka meetse a go nwa, fela ba sa hwetše a a lekanego. Le ge go le bjalo la se sokologele go nna.” O realo, Morena.

₉“Ka le otla ka phori le tlhakgama. Mogokong wa hlohlora mašemo a lena le dirapa tša lena tša merara, le mego le mehlware ya lena. Fela la no se sokologele go nna.

₁₀“Ka le romela leuba la bolwetši la go swana le lela ka go le romela Egepeta. Ka bolaya masogana a lena ka tšhoša, ka ba ka le amoga dipere. Ka le nkgišetša seuta ka mešašeng ya lena. Le ge go le bjalo la no se sokologele go nna.” O realo, Morena.

₁₁“Ba bangwe ba lena ka ba fediša, nna, Modimo, ka ba etša motse wa Sodoma le wa Gomora. Ba ba phologilego ba etša legong le le phamotšwego mollong. Fela la no se sokologele go nna.” O realo, Morena. ₁₂“Bjale ge, Baisraele, ke tlilo le otla. Ka gona, itokišetšeng go ahlolwa ke nna, Modimo wa lena!”