AMOSE 3

₁Lena setšhaba sa Israele, theeletšang se Morena a se boletšego ka lena, setšhaba ka moka se a se ntšhitšego Egepeta: ₂“Gare ga ditšhaba ka moka tša lefase ke lena fela ke le kgethilego. Ke ka lebaka leo ke swanetšego go le otla ka lebaka la makgopo ohle a lena.”

₃Na banna ba babedi ba ka tšea leeto mmogo ba se ba kwana?

₄Kgane tau e ka bopa ka sethokgweng e sa hlasele phoofolo?

Tawana yona e ka rora ka serobeng sa yona e se ya swara selo?

₅Na nonyana e ka tanywa ke sefu se se sego sa thewa?

Na sefu sona se ka thenkgologa se se sa kgongwa ke selo?

₆Kgane phalafala ya ntwa e ka lla motseng ya se tšhoše batho?

Na motse o ka welwa ke kotsi e se ya tlišwa ke Morena?

₇Morena, Mong wa bohle, ga a ke a dira selo a sa botše baprofeta, bahlanka ba gagwe, maikemišetšo a gagwe.

₈Ge tau e bopa, na ke mang yo a sa boifego?

Ge Morena, Mong wa bohle, a bolela, ke mang a ka se begego molaetša wa gagwe?

₉Begelang ba ba dulago ka dintlong tše dikgolo Ashdode le Egepeta le re: “Kgobokanang dithabeng tše di dikologilego motse wa Samaria le bone kgakanego le kgatelelo ya gona.”

₁₀Morena o re: “Batho ba ba kgobela ka dintlong tša bona dilo tše ba ikhweleditšego tšona ka kgang le ka kgapeletšo. Go dira tša go loka ga ba go tsebe. ₁₁Ka gona manaba a tla dikanetša naga ya batho ba Samaria, a senya dibo tša bona, a hula le dintlo tšeo tša bona tše dikgolo.”

₁₂Morena o re: “Bjalo ka ge modiša a hlakodiša fela marapo a mabedi a maoto goba nkgetlwana ya tsebe ya sehuswane se se llwego ke tau, ka wona mokgwa wo mobjalo go tla phologa ba se bakae gare ga badudi ba Samaria, bao gonabjale ba kwaelago didulong tša masethesethe le malaong ao a kgabišitšwego ka nakatlou.” ₁₃Morena Ramaatlaohle, Mong wa bohle, o tšwela pele o re: “Bjale theeletšang gomme le botše ditlogolo tša Jakobo gore ke re: ₁₄Mohla ke otla batho ba Israele ka lebaka la dibe tša bona, ke tla pšhatlaganya dialetare tša Bethele. Manaka a aletare ye nngwe le ye nngwe a tla kgonolwa a wela fase. ₁₅Ke tla phušola dintlo tša marega le tšona tša selemo. Dintlo tše di kgabišitšwego ka nakatlou di tla thubega; go tla kgerešwa dintlo tše dintši.”