1 DIKGOŠI 5

₁Kgoši Hiramo wa Tirose e bile mogwera wa Dafida nako yohle ya ge Dafida a sa phela, gomme a re go kwa gore Solomone o hlatlame tatagwe bogošing, a roma batseta go yena. ₂Solomone a romela Hiramo molaetša wo: ₃“O a tseba gore ka lebaka la dintwa tše di bego di sa fele tše tate, Dafida, a bego a di hlabana le manaba a dinaga tše di bego di bapile le yena, o ile a palelwa ke go aga tempele ya go khunamela Morena Modimo wa gagwe, go fihlela Morena a gafetše manaba ao diatleng tša gagwe. ₄Eupša bjale Morena Modimo wa ka o mphile khutšo ka mathoko ohle. Ga ke na le manaba, gomme ga go sešupo sa gore nka hlaselwa. ₅Morena o tshephišitše tate, Dafida, a re: ‘Morwa wa gago, yo ke tlago mmea kgoši ge wena o ile, o tla nkagela tempele.’ Gomme bjale ke ikemišeditše go aga tempele yeo ya go khunamela Morena Modimo wa ka. ₆Ka gona romela banna ba gago Lebanone gore ba yo nthemela mesedere. Banna ba ka ba tla šoma le bona, gomme ke tla lefa banna ba gago ka moo o nyakago ka gona. Bjalo ka ge o tseba gabotse, banna ba ka ga ba tsebe go rema mehlare go swana le ba gago.”

₇Hiramo a thaba kudu ge a ekwa molaetša woo wa Solomone, gomme a re: “Retang Morena lehono ka ge a file Dafida morwa yo bohlale gore a mo hlatlame bogošing bja setšhaba seo se segolo!” ₈Ke gona Hiramo a rometšego Solomone molaetša wo: “Ke kwele molaetša wa gago gomme ke ikemišeditše go dira se o se kgopelago. Ke tla rema mesedere le mephaene. ₉Banna ba ka ba tla theoša dikota tšeo Lebanone ba di iša ka lewatleng, gomme moo ba di tlemaganya gore ba tle ba di phaphamatše ba di theoše le lebopo go fihla mo o di nyakago gona. Fao banna ba ka ba tla di tlemolla, gomme ba gago ba di hlokomela. Wena ke be nka nyaka ge o ka fa banna ba ka dijo.”

₁₀Ka gona Hiramo a thuša Solomone ka dikota tša mesedere le tša mephaene tše a bego a di nyaka, ₁₁gomme Solomone a thuša Hiramo ka mekotla ye dikete tše masome a mane le tše nne ya mabele, le dikete tše nne le makgolo a mane a dilitara tša makhura a mohlware ngwaga ka ngwaga go fepa banna ba gagwe.

₁₂Morena a fa Solomone bohlale ka mo a mo tshephišitšego ka gona. Hiramo le Solomone ba phedišana ka khutšo, ba ba ba dira kgwerano.

₁₃Kgoši Solomone a tšea banna ba dikete tše masome a mararo nageng ya Israele ka moka a ba dira ba go šoma ka kgapeletšo, ₁₄gomme a bea Adoniramo mohlokomedi wa bona. A ba arola dihlopha tše tharo tša banna ba dikete tše lesome sengwe le sengwe, gomme sengwe le se sengwe se be se tšea kgwedi e tee Lebanone, gomme se tšea dikgwedi tše pedi se boile se le gae. ₁₅Solomone o be a bile a na le banna ba dikete tše masome a seswai kua nageng ya dithaba ba betla matlapa, le ba dikete tše di šupago ba go a rwala, ₁₆gomme a ba beela baokamedi ba dikete tše tharo le makgolo a mararo go lekola modiro wa bona. ₁₇Ka taelo ya Kgoši Solomone ba betla matlapa a mabotse a magolo a motheo wa Tempele. ₁₈Bašomi ba Solomone le ba Hiramo le banna ba motse wa Gebale ba ile ba betla matlapa le dikota tša go aga Tempele.