1 BAKORINTE 8

₁Bjale ke tla tabeng tšela le nngwaletšego tšona mabapi le nama ya sedimo. Re a tseba gore bohle re na le tsebo ya taba ye, fela tsebonyana ya mohuta woo e fa motho makoko, kganthe lerato lona le a mo aga. ₂Ge motho a gopola gore o tseba selo, nnete ke gore ga a se tsebe ka mo go mo swanetšego. ₃Eupša ge motho a rata Modimo o tsebja ke yena.

₄Ka fao mabapi le go ja nama ya sedimo ke re: Re a tseba gore mo gohle lefaseng modimo wa seswantšho ga se selo; re tseba le ge go se na Modimo wo mongwe ntle le yena Modimo fela. ₅Le ge eba go na le dilo tše di bitšwago “medimo”, e ka ba legodimong goba lefaseng, bjalo ka ge ka nnete “medimo” ya mohuta woo e le ye mentši le “barena” ba gona ba se kaaka, ₆rena Modimo wa rena ke o tee, yena Tate, Mohlodi wa dilo ka moka, yo re mo phelelago; le Morena ke o tee, yena Jesu Kriste, yo Modimo a hlodilego tšohle ka yena, yo re phelago ka yena.

₇Fela ga se mang le mang yo a tsebago taba ye. Ba bangwe, ka ge ba tlwaetše medimo ya diswantšho, le gonabjale ba sa bona dinama tšeo e le sedimo; tumelo ya bona ga sešo ya tia gabotse, gomme ge ba eja nama ya sedimo ba bona nke ba itšhilafatša moyeng. ₈Fela go Modimo ga re batametšwe ke dijo, gobane ge re sa je ga re lobe selo, le ge re eja ga re holege ka selo. ₉Le ge go le bjalo, le hlokomele gore bolokologi bja lena bja go ja nama ya sedimo bo se wetše sebeng bao ba fokolago tumelong. ₁₀Gobane ge yo a fokolago tumelong a ka bona wena o nago le tsebo ya taba ye o eja ka tempeleng ya modimo wa seswantšho, na a ka se hlohleletšwe ke seo go ja nama ya sedimo? ₁₁Ka gona, modumedi yoo wa go fokola tumelong, yo Kriste a mo hwetšego, o tla lahlega ka lebaka la tsebo yeo ya gago. ₁₂Ka tsela yeo, ka go fošetša modumedikawena le go fokotša tumelo ya gagwe ye e sešogo ya tia gabotse, o tla be o fošetša Kriste. ₁₃Ka gona, ge eba ka se ke se jago ke diriša modumedikanna sebe, gona nka se sa tsoga ke jele nama, gore ke se ke ka diriša modumedikanna sebe.