1 DIKRONIKA 26

₁Ye ke mediro ya banna ba e bego e le baleti ba Tempele. Kgorwaneng ya Korage e be e le Meshelemia, morwa wa Kore, wa lapa la Asafo. ₂O be a na le barwa ba ba šupago. Šeba ka go hlatlamana ga bona: Sakaria, Jediaele, Sebadia, Jatniele, ₃Elamo, Johanane le Elioenai.

₄Le gona go be go le Obede-Edomo yo Modimo a mo šegofaditšego ka go mo fa barwa ba seswai. Šeba ka go hlatlamana ga bona: Shemaya, Josabade, Joage, Sakara, Netanele, ₅Amiele, Isakara le Peuletai.

_6-7Morwa wa Obede-Edomo, Shemaya, o ile a ba le barwa ba: Otni, Rafaele, Obede le Elsabade. E be e le banna ba ba bušago kgorwaneng ya gabobona ka lebaka la bogale bja bona bjo bogolo. BomorwarragoShemaya, e lego Elihu le Semakia, le bona e be e le bagale.

₈Lapa la Obede-Edomo le be le na le banna ba bogale ba masome a a selelago le metšo ye mebedi ba mafolofolo mošomong wo.

₉Lapa la Meshelemia lona le be le na le banna ba dinatla ba lesome le metšo ye seswai.

₁₀Kgorwaneng ya Merari e be e le Hosa, yo a bego a na le barwa ba bane, e lego Shimri, yo tatagwe a ilego a mmea moetapele le ge e be e se leitšibolo, ₁₁Hilkia, Tebalia le Sakaria. Ka moka ga bona e be e le banna ba lesome le metšo ye meraro ba lapa la Hosa ba e bego e le baleti ba Tempele.

₁₂Baleti ba Tempele ba be ba arotšwe dihlopha, go ya ka malapa a bona, gomme ba be ba fiwa mediro Tempeleng ka wona mokgwa wo Balefi ba bangwe ba bego ba fiwa mediro. ₁₃Lapa le lengwe le le lengwe, le legolo le le lennyane, le be le dira matengwa go bona gore ke lesoro lefe le le swanetšego go le leta. ₁₄Matengwa a lesoro la ka bohlabela a swara Shelemia, gomme morwa wa gagwe, Sakaria, monna yo ka mehla a bego a na le dikeletšo tše botse, yena a swarwa ke a lesoro la ka leboa. ₁₅Obede-Edomo a tanywa ke matengwa a lesoro la ka borwa, gomme barwa ba gagwe bona ba swarwa ke a diphapoši tša bobolokelo. ₁₆Shupime le Hosa ba tanywa ke matengwa a lesoro la ka bodikela le la Shalekete tseleng ye e rotogago. Baleti ba be ba leta ka go šielana. ₁₇Tsatši le lengwe le le lengwe baleti ba ba selelago ba be ba leta ka bohlabela, ka leboa ba bane, le ka borwa ba bane. Baleti ba bane ba be ba bewa diphapošing tša bobolokelo letšatši ka letšatši, ba babedi phapošing ye nngwe le ye nngwe. ₁₈Kgauswi le kgoro ya ka bodikela go be go le baleti ba bane go ipata le tsela, mme ba babedi ba le kgorong yeo. ₁₉Ke ka moo kgorwana ya Korage le ya Merari di bego di abetšwe mediro ka gona.

₂₀Balefi ba bangwe ba gabobona ba be ba hlokometše polokelo ya Tempele le dikabelo tše di filwego Modimo. ₂₁Ladane, yo mongwe wa barwa ba Gershone, e bile rakgolokhukhu wa malapa a mangwe gotee le la Jeiele, morwagwe. ₂₂Barwa ba bangwe ba babedi ba Ladane, Setamo le Joele, ba be ba hlokometše polokelo ya Tempele.

₂₃Go ditlogolo tša Amramo le tša Jitsara le tša Hebrone le tša Usiele, ₂₄Shubaele wa kgorwana ya Gershome, morwa wa Moshe, e be e le yena yo mogolo a hlokometše polokelo ya Tempele. ₂₅Ba lešika la Balefi ba gabo ba be ba tswalana le Eliesere ka Shelomite, morwa wa Sikri, Sikri morwa wa Joramo, Joramo morwa wa Jesaya, Jesaya morwa wa Rehabia, Rehabia morwa wa Eliesere. ₂₆Shelomite le ba lapa la gagwe ba be ba hlokometše dikabelo ka moka tše Kgoši Dafida, le dihlogo tša malapa, le balaodi ba madira a sekete le ba a lekgolo, le balaodi ba bangwe ba bego ba di abetše Modimo. ₂₇Ba ile ba tšea tše dingwe tše ba di thopilego ntweng ba di beela gore di šomišwe ka Tempeleng. ₂₈Shelomite le ba lapa la gagwe ba be ba hlokometše tšohle tše di bego di beetšwe go šomišwa ka Tempeleng, gotee le dikabelo tše di bego di tlišitšwe ke moprofeta Samuele, le Kgoši Saulo, morwa wa Kishe, le Abnere, morwa wa Nere, le Joaba, morwa wa Tseruya.

₂₉Gare ga ditlogolo tša Jitsara, Kenania le barwa ba gagwe ba ile ba fiwa mediro ye e bego e sa amane le Tempele. E ile ya ba bangwaledi le baahlodi ba melato setšhabeng sa Israele.

₃₀Gare ga ditlogolo tša Hebrone, Hashabia le ba makgolo a lesome le a a šupago ba meloko yabo, ka moka e le banna ba bokgoni, ba ile ba bewa go hlokomela tša sedumedi le tša pušo ka bodikela bja noka ya Jordane. ₃₁Ka moka ga bona e be e le banna ba bokgoni medirong yeo. Jeria e be e le moetapele wa ditlogolo tša Hebrone. Ngwageng wa masome a mane wa ge Dafida e le kgoši go ile gwa nyakišišwa lešika le ditlogolo tša Hebrone, gomme bagale ba bagolo ba lapa leo ba hwetšwa ba dula kua Jasere, nageng ya Gileade. ₃₂Kgoši Dafida a kgetha dihlogo tša malapa tša bokgoni tše dikete tše pedi le makgolo a a šupago melokong ya Jeria, gomme a ba bea gore ba hlokomele tša selegae le tša pušo mo Israele ka bohlabela bja noka ya Jordane, e lego naga ya Rubene le ya Gade le ya seripakgoro sa Manase sa ka bohlabela.