U humbela u bva wo ṱamba khaṱhuloni ya Mudzimu
Tshililo tsha Dafita a tshi imbela Muṋe washu o hwelelwa nga Khushu wa Mubenyamini.
Mutovholwa
1Muṋe washu Mudzimu wanga,
ndi khuda nga Iwe,
vha ntovholaho khevha,
ntshidze, nndamukise,
2uri vha sa ḓo mponda sa ndau,
vha nṱhukhukanya hu si na mulamukisi.
“Thi na mulandu!”
3Yawee Muṋe washu Mudzimu wanga,
arali hu na tshe nda tshinya,
zwanḓa zwanga zwó ita tshivhi,
4-5arali ndo khakhela a si na nndwa na nṋe,
litsha swina ḽanga ḽi nndonde ḽi mpfare,
ee, ḽi litshe ḽi ntsikeledzele fhasi,
ḽi nkandekanye ndi tsumbudzee mavuni,
hu vhe u nnyadzisa tshoṱhe.
Hone hezwo a tho ngo zwi ita;
hufha na ane a sokou ntswima ndo mu litsha a ṱuwa.
Mudzimu Muhaṱuli a sa ṱaluli
6Muṋe washu, takuwa wo halifha,
maswina anga khea o sinyuwa,
takuwa u nndamulele!
Vuwa u nndamukise!
7Tshivhidzo tsha dzitshakha kha tshi u tange,
vhuya u dzule kha khuluṋoni yau
nṱha havho ngei ṱaḓulu.
8Muṋe washu u ḓo haṱula dzitshakha.
Nṋe nkhaṱhule u tshi tevhedza vhuvhuya hanga,
Muṋe washu, vhunga mulandu ndi si na.
9Fhelisa vhuvhi ha vhavhi nandi,
vha fulufhedzeaho vhone vha ṱoke midzi,
Iwe Mufhenḓi wa mbilu na mihumbulo,
Mudzimu a no fulufhedzea.
10Ene Mudzimu ndi tshiṱangu tshanga,
Mutshidzi wa vha si na vhufhura ndi Ene.
11Mudzimu ndi Muhaṱuli a sa ṱaluli,
mbiti dzawe a dzi dziki misi yoṱhe.
Khaṋo ya vhutshinyi
12Arali muvhi a sa rembuluwa Mudzimu u ḓo ṱuṱula banga ḽawe,
a akha vhura hawe a dzula o sumba,
13zwihali zwa u vhulaha muvhi zwi dzula zwi tsini,
u pfula nga misevhe i dugaho mulilo.
14Vhonani muvhi khoyo!
U kha vhuṱungu ha u beba vhuvhi!
O vhifha muvhilini nga hone vhuvhi,
a fhedza nga u beba mazwifhi.
15O bwa dindi a ita khunḓa,
zwino khunḓa yo fasha muvei.
16Vhuvhi hawe vhu ḓo vhuya nṱha ha ṱhoho yawe,
u levha hawe hu ḓo mu ḽa ṱhoho.
Thendo
17Ndi ḓo renda Muṋe washu
ndi tshi itela vhuvhuya hawe.
Dzina ḽa Muṋe washu Waṱaḓuluṱaḓulu,
ndi ḓo ḽi renda nga nyimbo.
