DZIPHISALEMA 55

₁Yawee Mudzimu,

thetshelesa thabelo yanga;

u songo mpfuralela ndi tshi lila!

₂Nthetshelese u mphindule;

zwitumbambiluni zwo tou ntsikeledza;

a thi aweli

₃nga mukosi wa maswina anga,

ndo kandeledzwa nga vhavhi;

vha ntshoshela nga khombo,

vho ntsinyutshela, vha a mmbenga.

₄Mbilu yanga i pfa vhuṱungu;

nyofho dza lufu dzo nngwela.

₅Ndo farwa nga nyofho,

ndi ita na u tetemela,

nyofho dzi a nkhokhovhedza.

₆Ndi ri, “Ngavhe ndi na phapha unga ḽiivha!

Ndo vha ndi tshi ḓo fhufha nda yo dzula kule;

₇ee, ndo vha ndi tshi ḓo shavhela kule nda yo lala phangani,

₈nda ṱavhanya u wana vhukhudo,

nda tinya u pomokwa hu no nga maḓumbu a titaho.”

₉Muṋe wa zwoṱhe, vha vilinganye,

u fhiriṱanye ndimi dzavho!

Fhano muḓini ndi vhona u huvhadzana

na mufhirifhiri.

₁₀Vha u mona vhusiku na masiari vha tshi dadamala

nṱha ha mbondo dzawo.

Ngomu hawo hu na khombo na mufhirifhiri;

₁₁muḓi uyu vho u ṱahadza;

u kandeledzana na vhufhura a zwi fheli mikotoni yawo.

₁₂Ngavhe a nkolelaho o vha e swina,

ndo vha ndi tshi ḓo konḓelela;

a mmvutshelaho ngavhe ḽo vha ḽi swina,

ndo vha ndi tshi ḓo ḽi dzumbama;

₁₃hone zwi khou itwa nga inwi thanga yanga,

inwi ṱhama yanga,

inwi khonani yanga ye nda i ḓowela;

₁₄ro vha ri tshi ḓiphiṋa nga u somolana zwa haṋwani,

ri tshi ya nḓuni ya Mudzimu u yo mu luvha na magogo.

₁₅Ngavhe vha tshi fa,

vha tou milwa nga shango vha tshi vhona;

hu miṱani yavho, hu mbiluni,

ho ḓala vhuvhi.

₁₆Hone nṋe ndi rabela Mudzimu,

Muṋe washu u ḓo ntshidza.

₁₇Nga madekwana, nga matsheloni,

na masiari ndi ṱahisa zwililo zwanga ndi tshi gomela;

Ene u ḓo ḓi pfa ipfi ḽanga.

₁₈U ḓo ntshidza nda si huvhale musi ndi nndwani;

vhanzhi vha ḓo ima na nṋe.

₁₉Mudzimu,

Ene a vhusaho tsha kale na kale,

u ḓo vha shonisa;

hufha vha sa rembuluwi,

na Mudzimu vha sa mu ofhi.

₂₀Hufha vha tshi lwa na nṋe khonani yavho,

vha tshi laṱa zwe ra vhofha.

₂₁Vho vha vhe na haṋwani ha u ḓifha ngeno mbilu yo ḓala nndwa;

maipfi avho o vha a tshi suvhelela u fhira mapfura,

ngeno e mafumo o angaladzwaho.

₂₂“Kumedza Muṋe washu mihwalo yau;

Ene u ḓo u londola;

ha nga vhuyi a laṱedza a no fulufhedzea.”

₂₃Hone Iwe Mudzimu u ḓo vha wisela dindini

wa vha lozwa;

vhathu vha fhaladzaho malofha,

vha vhufhura,

a vha nga lalami.

Hone nṋe ndi fulufhela Iwe.