Bugu ya vhuvhili
(Phisalema 42 – 72)
Muisraele o ṱuvhaho nnḓu ya Mudzimu
Phisalema ya vhana vha Kora ye vha sikela malogwane.
Phangani
1Mbilu yanga i ṱulutshela Iwe Mudzimu
unga tholo yo ṱulutshela maḓi milambwanani.
2Muya wanga wo ṱuvha Mudzimu,
wo ṱuvha Mudzimu a tshilaho.
Ndi ḓo ya lini nḓuni yawe nda vhona tshifhaṱuwo tshawe?
3Ndi lila vhusiku na masiari,
miṱodzi ndi zwone zwiḽiwa zwanga;
vhathu vha dzulela u nngoḓa vha ri,
“Mudzimu wau u ngafhi?”
4Mbilu yanga i tou swa ndi tshi elelwa zwithu hezwi:
zwiḽa ndi tshi ṱuwa na gogo ndó vha ranga phanḓa
ri tshi ya nḓuni ya Mudzimu,
vhathu vha tshi pembela,
hu tshi pfala mifhululu ya dakalo,
ha imbwa dza u livhuha Mudzimu.
5Wo ṱungufhalelani, iwe muya wanga?
Ndi mini u sa ruli?
Lindela Mudzimu,
ndi ḓo dovha nda mu renda,
Ene Mudzimu wanga a ntshidzaho!
Guvhukuvhuni
6Muya wanga wo ṱungufhala,
ndi zwine nda u elelwa ndi zwisimani zwa Jorodani,
thavhani ya Heremoni, ndi Kutavhanani.
7Mativha a a vhidzana
hu tshi bvuma maguvhukuvhu au;
ndo tibwa nga mikumbela yau na magabelo au.
8Tenda masiari Muṋe washu a sumbedza
lufuno lwawe lu sa dzinginyei,
na vhusiku ndi mu imbela luimbo,
nda rabela Mudzimu a nṋeaho vhutshilo.
9Ndi amba na Mudzimu,
Ene dzhavhelo ḽanga,
ndi ri, “Wo nkhangwelani?
Ndi mini ndi tshi enda ndo ṱungufhala
ndi tshi kandeledzwa nga maswina anga?”
10Ndi tou nga ndo rungwa nga pfumo ḽa guma nga marambo;
maswina anga a nkolela a sa nkhumeli,
a ḓi ri, “Mudzimu wau u ngafhi?”
11Wo ṱungufhalelani, iwe muya wanga?
Ndi mini u sa ruli?
Lindela Mudzimu,
ndi ḓo dovha nda mu renda,
Ene Mudzimu wanga a ntshidzaho!
