O tsikeledzwaho nga vhulwadze na vhutshinyi hawe
Phisalema ya Dafita ya u humbudza Mudzimu.
Muhwalo u lemelaho
1Muṋe washu,
u songo nkaidza wo sinyuwa,
u songo nthwa u mbitini!
2Wo mpfula nga misevhe yau,
wa tou nkanḓa nda zwi pfa!
3Wo nkhalifhela,
a hu tshee na hu si na mbonzhe muvhilini wanga,
marambo anga a a rema oṱhe nga mulandu wa vhutshinyi hanga.
4Ndo no tou mbwandamela dzivhani ḽa vhutshinyi hanga,
vhu lemela unga muhwalo u sa hwalei.
5Vhutsilu hanga ho mmbangela mbonzhe,
dzo sina, dzi vho nukha.
6Ndo kandeledzwa tshoṱhe, ndo rambalala,
ḓuvha ḽoṱhe ndi ṱwa ndo ṱungufhala.
7Khundu dzanga dzi tou duga nga dali,
muvhili wo tou phapha mbonzhe.
8Ndo ṱahala tshoṱhe, ndo pwashekana,
ndi khou gomela nga vhuṱungu vhu re mbiluni yanga.
Muthathedzwa a si na mulamuleli
9Muṋe wa zwoṱhe,
hufha u tshi ḓivha zwoṱhe zwine nda lila,
u femeleka hanga hufha u tshi khou hu pfa.
10Mbilu yanga i tou sinḓa,
a thi tshee na nungo,
na u vhona a thi tsha vhona.
11Vha hashu na khonani dzanga vho no nṱamba
nga u vhona maṱungu anga,
mashaka anga o ima kule.
12Vhavhulahi vhanga vha rea zwikwekwe zwavho,
vhahuvhadzi vhanga vha ri,
“Kha ri mu khokhovhedze!”
Vha ṱwa vha tshi nndangana ḓuvha ḽoṱhe.
13Hone nṋe ndi nga dzinganḓevhe,
thi pfi.
A thi ambi, ndi mbevhevhe.
14Ee, ndi nga a thi pfi tshithu,
na u fhindula a thi fhinduli.
Fulufhelo ḽithihi fhedzi
15Muṋe washu, ndo lindela Iwe.
Mudzimu wanga, Muṋe wa zwoṱhe,
Iwe u ḓo mphindula.
16Ndi a rabela ndi ri,
“U songo litsha vha tshi ntsea,
u songo tenda vha tshi zuwa u kundwa hanga!”
17Ndi ḓo ṱuwa ndi tshi wa,
vhuṱungu hanga a vhu nkhumeli.
18Ndi bula vhuvhi hanga,
vhukhakhi hanga a vhu nnyawedzi.
19Vhane vha tama ndi tshi fa vha na maanḓa,
ndi vhanzhi vhane vha sokou mmbenga.
20Vha lifhedza zwivhuya nga zwivhi,
vha lwa na nṋe nge nda funa u ita zwivhuya.
21Muṋe washu, u songo nndaṱedza!
Mudzimu wanga,
u songo vha kule hanga!
22Ṱavhanya u mphalala, yawee,
Muṋe wa zwoṱhe, Mutshidzi wanga!
