DZIPHISALEMA 37

₁U songo dinalea nga vhaitazwivhi,

u songo tama vhutshilo ha vhatshinyi.

₂Hufha vha tshi ḓo ṱavhanya u puta unga hatsi,

vha tshi nga zwimela zwitete

zwi sa lengi u fa.

₃Iwe fulufhela Muṋe washu u ite zwivhuya,

ḓidzulele shangoni u tshile nga mulalo.

₄Takadzwa nga Muṋe washu,

Ene u ḓo u ṋea zwine mbilu yau ya tama.

₅Nḓila dzau u dzi kumedze Muṋe washu.

Mu fulufhele, Ene u ḓo shuma.

₆U ḓo dzumbulula u fulufhedzea hau ha nga tshedza;

khaṱhuloni u ḓo bva wo ṱamba,

wa penya unga ḓuvha masiari tshivhangalala.

₇U songo fhela mbilu,

lindela Muṋe washu.

U tshi vhona vha pfumaho nga vhufhura, u si dinalee.

₈Litsha mbiti, u furalele u sinyuwa;

u songo dinalea, u sa ḓo tshinya.

₉Hufha vhatshinyi vha tshi ḓo lozwiwa.

Vha fulufhelaho Muṋe washu vhone shango ḽi ḓo vha ifa ḽavho.

₁₀Hu si kale vhatshinyi a vha tsha ḓo vha hone;

wa sedza hune vha dzula u ḓo wana vha si tsheeho.

₁₁Hone vho vuḓaho,

shango ḽi ḓo vha ḽavho,

vha ḓo ḓiphiṋa nga lupfumo, ḽó lala.

₁₂Muvhi tshawe ndi u itela muvhuya tshimbevha,

a mu zwondolola nga vengo.

₁₃Hone Muṋe wa zwoṱhe u sea muvhi;

u ḓivha uri ḓuvha ḽawe ḽi a ḓa.

₁₄Vhavhi vha ṱomola mapanga avho,

vha akha vhura

vha tshi ri vha vhulahe vhaheḓana na vhashai,

vha shidzhe vha no ita zwivhuya.

₁₅Hone banga ḽi ḓo rema muremi,

vhura ha vunḓea.

₁₆Makoko a no ḽiwa nga vha fulufhedzeaho,

zwi fhira lupfumo lwa vhavhi vhanzhi.

₁₇Nungo dza vhavhi dzi ḓo kulea,

Muṋe washu Ene u tika vha fulufhedzeaho.

₁₈Muṋe washu u londola vha mu shumelaho

nga mbilu nthihi;

ifa ḽavho ḽi ḓo dzula ḽi hone lini na lini.

₁₉Musi muvhi a vha nga shoni;

nḓalani vha ḓo ḽa vha laṱa.

₂₀Vhavhi vhone vha ḓo lovha;

maswina a Muṋe washu

naho a tshi nga pfulo i tamisaho,

vha nyamalala unga vhutsi.

₂₁Muvhi a pamba ha tsha lifha;

muvhuya ndi mapakulile, u a ṋea.

₂₂Vho shudufhadzwaho nga Muṋe washu,

shango ḽi ḓo vha ḽavho,

vhe a vha teketela vha ḓo lovha.

₂₃Muṋe washu u endedza ṋayo dza muthu ane a mu takadza,

u a mu tika.

₂₄Naho a wa, a nga si rambalale;

Muṋe washu u a mu vusa.

₂₅Ndo vha ndi ṅwana,

zwino ndo no vha wa maḓuvha;

a thi athu vhona mufulufhedzea o laṱiwa

kana vhana vhawe vha tshi humbela zwiḽiwa.

₂₆U ḓi ṋea nga fhedzi, a adzima,

vhana vhawe vha ḓi vha na mashudu.

₂₇Ṱutshela vhuvhi u ite zwivhuya,

ndi hone u tshi ḓo lalama.

₂₈Muṋe washu u funa khaṱhulo mbuya,

vha mu luvhaho nga u fulufhedzea ha vha laṱi,

vha ḓo tsireledzwa tshoṱhe;

vhana vha muvhi vhone, vha ḓo lovha.

₂₉Shango ḽi ḓo vha ḽa vha fulufhedzeaho,

vha dzula khaḽo lini na lini.

₃₀Mulomo wa muvhuya u bula a vhuṱali,

lulimi lwawe lu amba zwa khaṱhulo mbuya.

₃₁Mulayo wa Mudzimu a u bvi mbiluni yawe,

ha pambuwi khawo.

₃₂Muvhi u lalela muvhuya a tshi ṱoḓa u mu vhulaha.

₃₃Muṋe washu ha nga mu kumedzi zwanḓani zwa swina;

e tsengoni a nga si haṱulelwe ṱhamu.

₃₄Fulufhela Muṋe washu u vhulunge milayo yawe,

ndi hone a tshi ḓo u hulisa shango ḽa vha ḽau,

wa vhona vhavhi vha tshi lovha.

₃₅Ndo vhona muvhi e na maanḓa,

a tshi tou ṋanzwa makole unga muṱulume,

₃₆hone ndi tshi dovha u fhira ngaho nda wana a si tsheeho,

nda ri u mu ṱoḓa nda si mu wane.

₃₇Vhona a sa solisei,

sedza a si na vhufhura:

mudziamulalo u ḓo vha na vhaḓuhulu.

₃₈Hone vhane vha shandukela Mudzimu

vha ḓo fhedzwa vhe tshote,

vhavhi vha ḓo swielwa.

₃₉Muṋe washu ndi Ene a tshidzaho vhavhuya,

musi wa khombo vha shavhela khae.

₄₀Muṋe washu u a vha farisa a vha lamulela;

u vha lamulela kha maswina a vha tshidza,

ngauri vha khuda ngae.