DZIPHISALEMA 25

₁Ndi takusela mbilu yanga ha Iwe,

Muṋe washu.

₂Mudzimu wanga, ndi fulufhela Iwe,

u songo tenda ndi tshi shoniswa;

maswina anga a songo ri, “Koṱo!”

₃Vhukuma vha lavhelelaho Iwe a vha nga shoni;

hu ḓo shona vha sa fulufhedzei vha no u shandukela.

₄Muṋe washu, nnḓivhadze nḓila dzau,

u mpfunze u ita zwine wa funa.

₅Mpfunze ngoho yau i nndededze;

u Mudzimu wanga, u a ntshidza,

ndi ṱwa ndo u ṱulutshela.

₆Muṋe washu, u songo hangwa u nnyitela tshilidzi,

hufha lufuno lwau lu sa dzinginyei lini na lini.

₇Nkhangwele vhutshinyi na vhuvhi ha hana hanga,

Muṋe washu, nnyelelwe

nga lufuno lu sa dzinginyei na vhuthu.

₈Muṋe washu ndi muvhuya,

u a fulufhedzea;

na vhatshinyi u vha funza nḓila ya ngoho.

₉Vha ḓiṱukufhadzaho u vha funza u ita zwine a funa,

a vha tshimbidza nḓilani ya ngoho.

₁₀Vhane vha vhulunga mulanga wa Muṋe washu

vha tevhedza ndaela dzawe,

u a vha endedza nga vhuthu,

u a fulufhedzea.

₁₁Muṋe washu,

nkhangwele vhutshinyi hanga

naho vhu vhuhulu,

u tshi itela dzina ḽau!

₁₂Munna a ofhaho Muṋe washu ndi nnyi?

Onoyo u ḓo sumbedzwa nḓila ine a ḓo i fara,

₁₃a ḓo kona u tshila zwi tshi mu anḓa,

shango ḽa vha ifa ḽa vhana vhawe.

₁₄Muṋe washu u konana na vhane vha mu ofha;

vhenevho u vha dzumbululela mulanga wawe.

₁₅Ndi dzula ndo lavhelesa Muṋe washu;

u ḓo fashulula milenzhe yanga mambuleni.

₁₆Nndavhelese u nkhathutshele;

ndi ndoṱhe, thi na vhuyo;

₁₇rula mbilu yanga muhwalo,

ndi si tsha ofha.

₁₈Sedza vhuṱungu na u tambula hanga,

u nkupule vhutshinyi.

₁₉Vhona uri maswina anga o anda hani,

vhona uri vha mmbenga hani!

₂₀Nndondole u ntshidze,

u songo tenda ndi tshi shoniswa,

hufha ndi tshi khuda nga Iwe.

₂₁Vhuthu hanga na u fulufhedzea nga zwi nndondole,

hufha ndo lavhelela Iwe!

₂₂Mudzimu,

tshidza Israele khomboni dzoṱhe.