DZIPHISALEMA 24

₁Shango ḽoṱhe u ya he ḽa guma,

ḽifhasi na zwi re khaḽo,

zwoṱhe ndi zwa Muṋe washu.

₂Ndi Ene we a ḽi tea nṱha ha malwanzhe,

ndi Ene we a ḽi vhea nṱha ha maḓi mahulu.

₃Ndi nnyi o teaho u gonya thavha ya Muṋe washu?

Ndi nnyi ane a nga ima fhethu hawe hukhethwa?

₄Ndi uyo wa zwanḓa zwi si na tshika,

wa mbilu yo ṱambaho,

i nengwaho vhumbulu,

a sa ani a tshi zwifha.

₅Ndi ene ane a ḓo shudufhadzwa

nga Muṋe washu,

a ṋewa zwo mu fanelaho nga Mudzimu Mutshidzi wawe.

₆Ndi vhone vha no ṱoḓa u dzula na Mudzimu,

vha no lila u mu vhona;

ndi vhone vhana vha Jakopo.

₇Hee inwi dzikhoro, aṱamani!

Vuleani inwi mahothi a kale-kale,

hu dzhene Khosi ya vhugala!

₈Nṋa “Khosi iyo ya vhugala” ndi nnyi?

Ndi Muṋe washu,

Ene Muhali Ramaanḓa,

Muṋe washu Muhali nndwani.

₉Hee inwi dzikhoro, aṱamani!

Vuleani inwi mahothi a kale-kale,

hu dzhene Khosi ya vhugala!

₁₀Nṋa “Khosi iyo ya vhugala” ndi nnyi nandi?

Ndi Muṋe washu Mukundavhoṱhe,

ndi Ene Khosi ya vhugala.