NUMERI 32

₁Matsinde a Rubeni na Gadi vho vha vhe na kholomo na nngu nnzhi. Musi vha tshi vhona shango ḽa Jasere na ḽa Giliadi ḽo fanela zwifuwo, ₂vha ya ha Mushe na tshifhe Eliasara na vharangaphanḓa vha vhathu vha ri, _3-4“Dzingu heḽi ḽe Muṋe washu a ḽi kunda u swikani ha Vhaisraele uri ḽi vhe ḽavho, ḽa miḓi ya Atarotho na Diboni na Jazere na Nimira na Hesheboni na Eliale na Sibima na Nebo na Bioni, ḽo fanela zwifuwo, zwino riṋe ri na zwifuwo zwinzhi. ₅Arali vha tshi ri takalela, iḽo shango nga ḽi ṋewe riṋe ḽi vhe ḽashu, vha songo ita uri ri wele mulambo wa Jorodani ri yo dzula hangei seli.”

₆Mushe a fhindula vhathu vha Gadi na vha Rubeni a ri, “Vhaisraele vha haṋu vha ḓo ya nndwani inwi no dzula fhano naa? ₇Ndi mini ni tshi kula Vhaisraele nungo uri vha si wetshele shangoni ḽe Muṋe washu a vha ṋea? ₈Ndi zwenezwo zwe vhokhotsi aṋu vha ita zwiḽa ndi tshi vha ruma ri Kadeshe Barania uri vha yo tandula shango. ₉Vho swika govhani ḽa Eshkolo vha vhona shango, hone musi vha tshi vhuya, vha kula vhathu nungo uri vha si dzhene shangoni ḽe Muṋe washu a vha ṋea. ₁₀Muṋe washu a sinyuwa musi wonoyo a ana a ri, ₁₁‘Zwino nge vha si ntevhele nga mbilu yoṱhe, vhanna vhoṱhe u bva kha vha miṅwaha ya 20 vhe vha pfuluwa Egipita, a hu na na muthihi wavho ane a ḓo vhona shango ḽe nda ḽi fulufhedzisa Abrahamu na Isaka na Jakopo nga muano.’ ₁₂Vhe vha khathutshelwa mbilu ndi vhavhili fhedzi, ndi Khalebe ṅwana wa Jefune wa Mukenisi na Joshua ṅwana wa Nunu; havho a vho ngo vhuya vha shandukela Muṋe washu. ₁₃Muṋe washu o sinyutshela Vhaisraele, a ita uri vha tendeleke sogani vha fhedza miṅwaha ya 40, ha vhuya ha fa murafho woṱhe wa vhe vha ita zwi sa mu takadzi. ₁₄Zwino ni tshigwada tsha vhatshinyi, ni ita zwenezwiḽa zwa vhokhotsi aṋu, ni khou dovha u ṱunga Muṋe washu uri mbiti dzawe dzi dovhe dzi wele Vhaisraele. ₁₅Arali inwi vhathu vha Rubeni na Gadi na mu shandukela zwino, u ḓo dovha a ṱutshela vhathu havha fhano sogani, nahone arali vha lozwiwa, mulandu ndi waṋu.”

₁₆Vha ḓa ha Mushe vha ri, “A ri thomi u fhaṱa zwashu madanga fhano a zwifuwo zwashu na miḓi ya vhasadzi vhashu na vhana vhashu? ₁₇Hone ró ḓiimisela u shoma nga tshihaḓu ra ranga Vhaisraele phanḓa ra vhuya ra vha swikisa shangoni ḽavho. Zwenezwo vhasadzi vhashu na vhana vhashu vha ḓo vha vho dzula miḓini yo fhaṱeledzwaho, vho tsireledzea kha vhadzulapo vha shango ḽino. ₁₈Ri nga si humele hayani hashu Vhaisraele vhoṱhe vha sa athu wana shango ḽe vha ṋewa uri ḽi vhe ḽavho. ₁₉Riṋe ri nga si kovhekane navho shango seli ha Jorodani, ngauri riṋe ro no ḓi wana mukovhe washu seli na luno vhubvaḓuvha ha Jorodani.”

₂₀Ndi hone Mushe a tshi vha vhudza a ri, “Arali vhukumakuma ni tshi amba zwone, ḓilugiseleni hafha phanḓa ha Muṋe washu uri ri kone u bva pfumo. ₂₁Vhahali vhaṋu vhoṱhe nga vha wele Jorodani, vha die maswina avho vho rangwa phanḓa nga Muṋe washu, Muṋe washu a vhuya vha kunda ₂₂a dzhia iḽo shango. Nó no ita izwo ni nga ḓi humela murahu ngauri ni ḓo vha no khunyeledza pfanelo dzaṋu kha Muṋe washu na kha Vhaisraele vha haṋu. Ndi hone Muṋe washu a tshi ḓo tenda uri shango ḽa vhubvaḓuvha ha Jorodani ndi ḽaṋu. ₂₃Hone arali na sa ita zwe na fulufhedzisa, ni ḓo vha ni tshi khou khakhela Muṋe washu. Ni songo vhuya na khakha, ni sa ḓo lifhedzelwa vhuvhi haṋu. ₂₄Zwino-ha, fhaṱani miḓi ya vhasadzi vhaṋu na vhana vhaṋu, na madanga a nngu dzaṋu, tenda na ita zwe na fulufhedzisa!”

₂₅Vhathu vha Gadi na Rubeni vha vhudza Mushe vha ri, “Ri ḓo ita zwine vha ri laya. ₂₆Vhasadzi vhashu na vhana vhashu na kholomo dzashu na nngu dzashu zwi ḓo sala fhano miḓini ya Giliadi. ₂₇Hone riṋe, munna muṅwe na muṅwe washu o shomaho, u ḓo wela seli u yo lwa ro ranga mbulungelo ya Muṋe washu phanḓa, nga hune vhone vha amba.”

₂₈Ndi hone Mushe a tshi laya tshifhe Eliasara na Joshua ṅwana wa Nunu na vhahulwane vha miṱa ya matsinde a Israele a ri, ₂₉“Arali vhathu vha Gadi na Rubeni vha wela Jorodani vho shoma vho ranga mbulungelo ya Muṋe washu phanḓa, nahone arali vha ni farisa na kunda iḽo shango, izwo vha fheni ḽa Giliadi ḽi vhe ḽavho. ₃₀Hone arali vha sa wela Jorodani vha bva pfumo na inwi, izwo vha vho ḓo wana mukovhe wavho wa shango shangoni ḽa Kanana na inwi.”

₃₁Vhathu vha Gadi na Rubeni vha fhindula vha ri, “Ri ḓo ita zwe Muṋe washu a amba. ₃₂Ri ḓo wela seli ro ranga mbulungelo ya Muṋe washu phanḓa, ra dzhena shangoni ḽa Kanana ro fara mafumo, hone mukovhe washu wa shango une ra ḓo u wana u ḓo vha seli na ḽino ḽa Jorodani.” ₃₃Ndi hone Mushe a tshi amba na vhathu vha Gadi na Rubeni na hafu ya tsinde ḽa Manase ṅwana wa Josefa, a vha ṋea muvhuso wa Sihoni khosi ya Vhaamori na wa Ogo khosi ya Bashani, shango ḽoṱhe na miḓi yaḽo na mivhundu yo i tangaho. ₃₄Vha tsinde ḽa Gadi vha vusa miḓi ya mitsheṱo ya Diboni na Atarotho na Aruere ₃₅na Atirotho Shafani na Jazere na Jogoboha ₃₆na Bethe Nimira na Bethe Harani, khathihi na madanga a zwifuwo. ₃₇Vha tsinde ḽa Rubeni vha vusa Hesheboni na Eliale na Kiriathaimi, ₃₈na Nebo na Baali Mioni (heḽo dzina ḽo ḓo shandukiswa), na Sibima. Miḓi ye vha i vusa vha i rina madzina maswa.

₃₉Vha mutupo wa Makhiri ṅwana wa Manase vha dia shango ḽa Giliadi, vha ḽi thuba, vha thatha Vhaamori vhe vha vha vhe henefho. ₄₀Mushe ḽa Giliadi a ḽi ṋea vha mutupo wa Makhiri, vha lutsinga lwa Manase, vha dzula henefho. ₄₁Jairi, wa lutsinga lwa Manase, a dia miṅwe miḓi ya mishasha a i thuba, a ri i pfi Miḓi ya Jairi. ₄₂Noba a dia Kenathi na miḓi i re tsini nawo a hu thuba a hu rina dzina ḽawe a ri hu pfi Noba.