NUMERI 31

₁Muṋe washu a amba na Mushe a ri, ₂“Lifhedza Vhamidiani zwe vha ita Vhaisraele. U ḓo ri wo no ita hezwo, wa konou fa.”

₃Ndi hone Mushe a tshi vhudza vhathu a ri, “Ḓilugiseni ni bve pfumo ni yo lwa na Vhamidiani ni lifhedzele Muṋe washu. ₄Kha tsinde ḽiṅwe na ḽiṅwe ḽa Vhaisraele hu bve vhanna vha tshigidi vha ye nndwani.”

₅Ndi hone hu tshi nangiwa vhanna vha tshigidi vhane vha bva pfumo kha tsinde ḽiṅwe na ḽiṅwe, vho ṱangana vha ita vhanna vha 12 000. ₆Mushe a ri vha ye nndwani vho rangwa phanḓa nga Finiasi ṅwana wa tshifhe Eliasara, onoyo o vha o fara thundu khethwa na phalaphala ya u vha langa. ₇Vha dia Midiani, nga he Muṋe washu a laya Mushe, vha vhulaha vhanna vhoṱhe, ₈khathihi na mahosi maṱanu a Midiani: Evi na Rekeme na Tsuru na Huru na Reba. Vha vhulaha na Biliamu ṅwana wa Bioro.

₉Vhaisraele vha thuba vhasadzi na vhana vha Vhamidiani, vha dzhia kholomo dzavho na masambi avho a nngu, vha vha ṱangula lupfumo lwavho lwoṱhe, ₁₀vha fhisa miḓi yavho yoṱhe na mishasha. ₁₁Vha dzhia thundu yoṱhe ye vha i thuba, khathihi na vhathu na zwifuwo, ₁₂vha zwi isa ha Mushe na tshifhe Eliasara na vhathu vha Israele vhe mishashani, midavhini ya Muaba tsini ha Jorodani u livhana na Jerikho.

₁₃Mushe na tshifhe Eliasara na vharangaphanḓa vhoṱhe vha vhathu vha bva mishashani u yo ṱanganedza mmbi. ₁₄Mushe a sinyutshela vhalangammbi na vhalangagomane vha tshigidi tsha vhathu na vhalangagomane vha ḓana ḽa vhathu, vhe vha vhuya vha tshi bva nndwani. ₁₅Mushe a vha vhudzisa a ri, “Ndi mini vhasadzi avha vhoṱhe ni songo vha vhulaha? ₁₆Ḓivhani uri ndi vhone vhe vha ita zwe vha funzedzwa nga Biliamu, vha fhura Vhaisraele uri vha shandukele Muṋe washu nga zwe vha ita thavhani ya Phioro. Ndi zwe zwa ita uri vhathu vha Muṋe washu vha fe nga dwadze. ₁₇Zwino vhulahani vhatukana vhoṱhe na vhasadzi vhoṱhe vho no ḓivhanaho na munna, ₁₈ni ḓisiele vhasidzana vhoṱhe vha sa athu ḓivhana na munna. ₁₉Zwino inwi noṱhe no vhulahaho muthu kana no kwamaho tshitumbu no fanela u dzula nnḓa ha mishasha na fhedza maḓuvha maṱanu na mavhili. Nga ḓuvha ḽa vhuraru na nga ḓuvha ḽa vhuṱanu na vhuvhili ni ḓikumulule khathihi na vhasadzi vhe na vha thuba. ₂₀Ni kumulule na zwoṱhe zwo itwaho nga mukumba kana nga vhukuse ha mbudzi kana thanda.”

₂₁Tshifhe Eliasara a amba na vhanna vho vhuyaho nndwani a ri, “Ndayo dze Muṋe washu a laya Mushe ngedzi. _22-23Tshiṅwe na tshiṅwe tshi sa swi, tshi no nga musuku na siliva na musinaseṱha na tsimbi na thini na mutobvu, tsho fanela u bviswa tshika nga u tshi vhavha nga mulilo. Zwiṅwe zwoṱhe ni zwi ṱanzwe nga maḓi, ndi hone zwi tshi ḓo vha zwo kumululwa. ₂₄Nga ḓuvha ḽa vhuṱanu na vhuvhili ni kuvhe zwiambaro zwaṋu, ndi hone ni tshi ḓo vha no ḓikumulula na ḓo konou dzhena mishashani.”

₂₅Muṋe washu a amba na Mushe a ri, ₂₆“Iwe na tshifhe Eliasara na vhahulwane vha miṱa ni vhale zwoṱhe zwo thubwaho khathihi na vhathu na zwifuwo. ₂₇U fhandekanye zwo thubwaho nga zwipiḓa zwivhili, tshiṅwe tshipiḓa tshi kovhekanywe vhahali vho bvaho pfumo, tshiṅwe tshi kovhekanywe vhoṱhe vho salaho. ₂₈Kha mukovhe wa vhahali vho bvaho pfumo u bvise musumo wa Yahavee wa tshithihi kha zwa 500, zwi nga vha vhathu kana kholomo kana donngi kana nngu kana mbudzi. ₂₉Izwo u zwi fhe tshifhe Eliasara u vhe mukovhe wanga. ₃₀Kha tshipiḓa tsho kovhekanywaho Vhaisraele u bvise tshipiḓa tshithihi kha zwa 50, vha nga vha vhathu kana kholomo kana donngi kana nngu kana mbudzi kana zwiṅwe zwifuwo. Izwo u zwi fhe Vhalivi vhane vha londola dennde ya u ṱangana na Nṋe.” ₃₁Mushe na tshifhe Eliasara vha ita zwe Muṋe washu a laya Mushe. _32-35Mutevhe wa thundu yo thubiwaho nga vhahali ngoyu, hu sa vhalwi zwe vha ḓidzhiela: nngu na mbudzi 675 000, kholomo 72 000, donngi 61 000, vhasidzana vha sa ḓivhani na munna 32 000. _36-40Tshipiḓa tsho kovhekanywaho vhahali ndi nngu na mbudzi dza 337 500, kha dzenedzo, dza 675 dzo vha musumo wa Muṋe washu; kha kholomo dza 36 000 dza vhahali, dza 72 dzo vha musumo wa Muṋe washu; kha donngi dza 30 500 dza vhahali, dza 61 dzo vha musumo wa Muṋe washu; kha vhasidzana vha 16 000 vho kovhelwaho vhahali, vha 32 vho vha musumo wa Muṋe washu. ₄₁Mushe a dzhia uyo musumo wa Muṋe washu a u fha tshifhe Eliasara, nga he Muṋe washu a mu laya.

_42-46Mukovhe wa vhathu wo vha u tshi eḓana na wa vhahali: ndi nngu na mbudzi dza 337 500 na kholomo dza 36 000 na donngi dza 30 500 na vhasidzana vha 16 000. ₄₇Kha mukovhe wonoyo Mushe o bvisa tshithihi kha 50 a mathubwa na zwifuwo, nga he Muṋe washu a mu laya, a zwi ṋea Vhalivi vhe vha vha vha tshi londola dennde ya u ṱangana na Muṋe washu. ₄₈Ndi hone vhalangammbi na vhalangagomane vha no langa tshigidi na vha no langa ḓana vha tshi ya ha Mushe, ₄₉vha swikisa mafhungo haano vha ri, “Ro vhala vhahali vhane ra vha langa ra wana hu si na o ṱahelaho. ₅₀Zwino ro ḓisa thundu dza musuku: magidiphoo na vhukunda na dzirinngi na zwiṅina na vhulungu zwe muṅwe na muṅwe washu a zwi dzhia. Ri zwi ṋekedza Muṋe washu uri ri ḓipfumelele phanḓa hawe.” ₅₁Mushe na tshifhe Eliasara vha ṱanganedza madzanga oṱhe a musuku. ₅₂Musuku woṱhe wo bviswaho nga vhalangammbi na vhalangagomane we Mushe na Eliasara vha u ṋekedza Muṋe washu uri u vhe musumo wawe wo vha u tshi lemela u ṱoḓou swika kha khilogiramu dza 200. ₅₃Muhali muṅwe na muṅwe o vha o ḓidzhiela zwe a ṱangula. ₅₄Mushe na Eliasara vha ṱanganedza musuku u no bva kha vhalangammbi na vhalangagomane vha u isa denndeni ya u ṱangana na Muṋe washu, wa vha tshihumbudzo tsha Vhaisraele phanḓa ha Muṋe washu.