NUMERI 27

₁Ho vha hu na vhananyana vha Tselofihadi ṅwana wa Hefere, ṅwana wa Giliadi, ṅwana wa Makhiri, ṅwana wa Manase, ṅwana wa Josefa. Ndi Mahala na Nua na Hogola na Milikha na Thiritsa. Vhone vho ḓa ₂vha ima phanḓa ha Mushe na tshifhe Eliasara na vharangaphanḓa na vhathu vhoṱhe muṋangoni wa dennde ya u ṱangana na Muṋe washu vha ri, ₃“Khotsi ashu vho fela sogani vha si sie na mutuka na muthihi. Vhone vho vha vha sa imi na Kora a tshi shandukela Muṋe washu, vho fa nga mulandu wa vhutshinyi havho vhone vhaṋe. ₄Dzina ḽa khotsi ashu ḽo fanela uri ḽi si tsha vhidzwa vhukati ha Vhaisraele nge vha tou fa vha si na vhana vha vhatuka naa? Nga vha ri kovhele-vho shango hune ha vha na mashaka a khotsi ashu.”

₅Mushe a swikisa mafhungo avho ha Muṋe washu, ₆Muṋe washu a mu vhudza a ri, ₇“Zwe vhananyana vha Tselofihadi vha humbela ndi zwone, vha kovhele shango hune ha vha na mashaka a khotsi avho. Litsha ifa ḽa khotsi avho ḽi tshi vha ḽavho. ₈Vhudza Vhaisraele uri arali munna a fa a si sie ṅwana wa mutuka, ṅwananyana wawe o ḓi fanela u vha muḽaifa. ₉Arali a si na ṅwananyana, ḽi waniwa nga vharathu vhawe. ₁₀Arali a si na vharathu ḽi waniwa nga vhokhotsimunene wawe. ₁₁Arali a si na vharathu kana vhokhotsimunene, ḽi waniwa nga shaka ḽawe ḽa tsini, ḽa vha ḽawe. Vhaisraele vha zwi sedze zwi mulayo, sa zwe Nṋe Yahavee nda u laya.”

₁₂Muṋe washu a vhudza Mushe a ri, “Gonya thavha ya Abarimu u vhone shango ḽine nda khou ṋea Vhaisraele. ₁₃Hu ḓo ri musi wo no ḽi vhona wa konou fa, unga mukomana wau Aroni, ₁₄ngauri noṱhe vhuvhili haṋu no nyadza ndayo yanga musi ni phangani ya Tsini. Zwiḽa vhathu vhoṱhe vha tshi nngungulela vhe Miriba, a no ngo vha sumbedza maanḓa anga makhethwa.” (Miriba ndi tshisima tshi re Kadeshe sogani ḽa Tsini.)

₁₅Mushe a rabela a ri, ₁₆“Mudzimu Muṋe washu, Iwe tshisima tsha vhutshilo hoṱhe, a u nangi munna ane a nga kona u vha murangaphanḓa wa vhathu havha naa, ₁₇ane a kona u vha tshimbidza o vha ranga phanḓa, uri vhathu vhau vha si nge vhathu vha si na mulisa?”

₁₈Muṋe washu a fhindula Mushe a ri, “Dzhia Joshua ṅwana wa Nunu, munna a na Muya wanga, u vhee zwanḓa zwau ṱhohoni yawe. ₁₉Mu imise phanḓa ha tshifhe Eliasara na vhathu vhoṱhe, henefho phanḓa havho vhoṱhe u ḓivhadze uri ndi ene a no ḓo sala o ima vhuimoni hau. ₂₀Iwe u mu kumedze maanḓa au uri vhathu vhoṱhe vha Israele vha mu thetshelese. ₂₁U ḓo ḓitika nga tshifhe Eliasara; onoyo u ḓo ḓivha nga madeṅwa makhethwa zwine nda zwi funa, a endedza Joshua na vhathu vhoṱhe vha Israele mafhungoni avho oṱhe.” ₂₂Mushe a ita zwe Muṋe washu a mu laya. A imisa Joshua phanḓa ha tshifhe Eliasara na vhathu vhoṱhe, ₂₃a vhea Joshua zwanḓa nga he Muṋe washu a mu laya, a ḓivhadza uri ndi ene a no ḓo ima vhuimoni hawe.