NEHEMIA 8

₁Nga ṅwedzi wa vhuṱanu na vhuvhili vhathu vha Israele vho vha vha tshi vho dzula miḓini yavho. Nga ḓuvha ḽa u ranga ḽa ṅwedzi wonoyo lushaka lwoṱhe lwa kuvhangana Jerusalema, tshikweani ngomu ha Khoro ya Maḓi. Vha humbela Esra uri a vha ḓisele bugu ya Mulayo ye Muṋe washu a ṋea Vhaisraele nga Mushe. Esra o vha e tshifhe na muḓivhi wa Mulayo. ₂Ndi hone nga ḓuvha ḽa u ranga ḽa ṅwedzi wa vhuṱanu na vhuvhili tshifhe Esra a tshi ḓisa Mulayo tshivhidzoni tsha vhanna na vhasadzi na vhana vho thanyaho. ₃Henefho tshikweani tsini ha khoro a vha vhalela Mulayo, a thoma ḽi tshi tsha a vhala u swika masiari tshivhangalala, vhoṱhe vha thetshelesa zwavhuḓi.

₄Esra o vha o ima nṱha ha ḓingo ḽa matanda ḽe ḽa vha ḽo fhaṱelwa vhuṱambo honoho, thungo ya tshauḽa tshawe ha ima Mathithia na Shema na Anaya na Uria na Hilikia na Maaseya, thungo ya tshamonde ha ima Phedaya na Mishaele na Malikhiya na Hashumi na Hashibadana na Zakaria na Mishulamu.

₅Esra a ima kha ḓingo ḽeneḽo nṱha ha vhathu, vhoṱhe vha tou mu donolela maṱo. Musi a tshi tou vula iyo bugu, vhoṱhe vha takuwa vha ima nga milenzhe. ₆Esra a ri, “Nga hu rendwe Muṋe washu, Mudzimu muhulu!”

Vhathu vhoṱhe vha imisa zwanḓa vha ri, “Amen! Amen!” Vha gwadama vha luvha, zwifhaṱuwo zwavho zwa kwama fhasi.

₇Vha konou takuwa vha ima vhuimoni havho, vhaṅwe Vhalivi vha ṱalutshedza Mulayo. Vhenevho ndi Jeshua na Bani na Sherebia na Jamini na Akubu na Shabithai na Hodia na Maaseya na Kelitha na Azaria na Jozabadi na Hanani na Phelaya. ₈Vhenevho vha ṱalutshedza Mulayo wa Mudzimu nga nḓila i pfalaho, vha u ṱalutshedza uri vhathu vha u pfesese.

₉Musi vhathu vha tshi pfa zwine Mulayo wa zwi ṱoḓa, zwa vha dzhena mbiluni lwe vha thoma u lila. Ndi hone Nehemia we a vha e muvhusi, na tshifhe Esra, muḓivhi wa Mulayo, na Vhalivi vhe vha vha vha tshi khou ṱalutshedza Mulayo vha tshi vhudza vhathu vhoṱhe vha ri, “Ḓuvha ḽa ṋamusi ndi ḽikhethwa, ḽo khethelwa Muṋe washu Mudzimu waṋu, zwenezwo ni songo tsengisa miṱodzi kana na lila. ₁₀Zwino iyani mahayani ni yo ita vhuṱambo. Kovhekanani zwiḽiwa zwaṋu na waini, ni kovhekane na avho vha si na zwo eḓanaho. Ḓuvha ḽa ṋamusi ndi ḽikhethwa, ḽo khethelwa Muṋe washu, zwenezwo ni songo ṱungufhala. Dakalo ḽine Muṋe washu a ni ṋea ḽi ḓo ni ṋea nungo.”

₁₁Vhalivi vha khuthadza vhathu, vha tshi vha vhudza uri vha songo ṱungufhala nga ḓuvha heḽo ḽikhethwa. ₁₂Ndi hone vhathu vhoṱhe vha tshi ya hayani vha ḽa, vha nwa vho takala, zwe vha vha vhe nazwo vha kovhekana na vhaṅwe nge vha pfesesa mafhungo e vha vhalelwa.

₁₃Nga matshelo ṱhoho dza mitupo, khathihi na vhotshifhe na Vhalivi, vha kuvhangana ha Esra muḓivhi wa Mulayo uri vha gude pfunzo dza Mulayo. ₁₄Vha wana uri Mulayo we Muṋe washu a vha ṋea nga Mushe wo laya Vhaisraele uri vha dzule mishashani nga tshifhinga tsha vhuṱambo ha Mishasha nga ṅwedzi wa 7. ₁₅Vha ḓivhadza Jerusalema na kha miṅwe miḓi vha ri, “Ibvani ni ye mivhunduni ni reme matavhi a mipaini na miolivi na miṱhaḽa na mitshevho na miṅwe miri ni fhaṱe mishasha ni tshi tevhedza ndayo dzo ṅwalwaho kha Mulayo.”

₁₆Ndi hone vhathu vha tshi yo dzhia matavhi vha fhaṱa mishasha kha ṱhanga dza nnḓu dzavho na miṱani yavho na miṱani ya thembele na tshikweani tsini ha Khoro ya Maḓi na tsini ha Khoro ya Efraimi. ₁₇Vhathu vhoṱhe vho vhuyaho vhuthubwani vha fhaṱa mishasha, vha dzula ngomu hayo. Ulwo lwo vha lu lwone lwa u thoma zwi tshi itiwa u bva misi ya Joshua ṅwana wa Nunu. Vho vha vho takala nga maanḓa. ₁₈Ḓuvha ḽiṅwe na ḽiṅwe u bva ḓuvha ḽa u thoma ḽa vhuṱambo u swika ḓuvha ḽa u fhedzisela vho vhala tshipiḓa tsha Mulayo wa Mudzimu. Vha fhedza maḓuvha maṱanu na mavhili vha tshi khou ita vhuṱambo, nga ḓuvha ḽa vhuṱanu na vhuraru ha vha na khuvhangano ya u vala vhuṱambo, nga he zwa ṅwalwa kha Mulayo.