NEHEMIA 13

₁Musi Mulayo wa Mushe u tshi vhalelwa vhathu vhoṱhe vha tshi thetshelesa, vha swika kha kupiḓa kuḽa kune kwa ri Muamoni kana Mumuaba ho ngo tendelwa u ḓibaḓekanya na vhathu vha Mudzimu. ₂Izwo zwo pfalwo nge vhathu vha Amoni na Muaba vha dzima Vhaisraele zwiḽiwa na maḓi zwiḽa vhe lwendoni vha tshi bva Egipita, vha vhuya vha renga Biliamu uri a teketele Vhaisraele. Mudzimu washu o tou shandukisa uho u teketelwa ha vha mashudu. ₃Musi Vhaisraele vha tshi pfa uyo mulayo u tshi vhaliwa, vha pandela vhatsinda vhoṱhe vhe vha vha vha tshi dzula navho.

₄Tshifhe Eliashibi, we a vha e ene mulangi wa nnḓu dza u vhulungela thundu thembeleni ya Mudzimu washu, o vha e shaka ḽa Tobia. ₅O vha o tendela Tobia a tshi dzula kamarani khulu ye ya vha i ya u vhulunga nduvho dza mavhele fhedzi na zwioro na thundu dzi shumiswaho thembeleni na nduvho dza vhotshifhe na tshafumi tsha mavhele na waini na mapfura a muolivi ane a ṋewa Vhalivi na vhaimbi vha thembeleni na vhalindathembele. ₆O mu tendela nṋe ndi siho Jerusalema, ngauri nga ṅwaha wa 32 Arithakhesese e khosi ya Babele ndo vha ndo humela khae. Ngavhuya nda wana thendelo yawe, ₇nda vhuelela Jerusalema. Ndi tshi swika hone nda vhona vhuvhi ha Eliashibi a tshi tendela Tobia uri a dzule kamarani ya thembele. ₈Nda vhilaela nga maanḓa nda dzhia thundu dzoṱhe dza Tobia nda dzi posa nnḓa. ₉Nda ṋea ndaela ya uri kamara dzi kumululwe hu tshi tevhedzwa maitele azwo, nda ri thundu ya thembele na nduvho dza thoro na zwioro zwi vhuedzedzwe vhudzuloni hazwo.

₁₀Nda pfa upfi na vhaimbi vha thembeleni na vhaṅwe Vhalivi vho pfuluwa Jerusalema vha vhuelela masimuni avho, nge vhathu vha vha vha sa tsha vha bvisela mikovhe yavho. ₁₁Nda kaidza vhakoma nge vha litsha thembele i tshi ṅaledziwa. Nda ya nda dzhia Vhalivi na vhaimbi nda vha vhuedzedza mishumoni yavho. ₁₂Ndi hone vhathu vhoṱhe vha Juda vha tshi dovha u ḓisa tshafumi tshavho tsha mavhele na waini na mapfura a muolivi nḓuni dza u vhulungela thundu thembeleni. ₁₃Nda vhea vhaṅwe vhanna uri vha lange nnḓu dza u vhulungela thundu; ndi tshifhe Shelemia na Tsadoko muḓivhi wa Mulayo na Phedaya ane a vha Mulivi; Hanani, ṅwana wa Zakhuru ṅwana wa Mathania a vha tshanḓa tshavho. Ndo vha ndi tshi ḓivha uri avho vhanna vha a fulufhedzea, vha ḓo kovhela vhashumi vha havho mikovhe yavho.

₁₄Mudzimu wanga, elelwa zwithu hezwo, u songo hangwa zwe nda itela thembele yau na nduvho dzayo.

₁₅Ḽiṅwe ḓuvha nda vhona vhathu Juda, vha tshi khou fhonḓa nḓirivhe nga Sabatha, vhaṅwe vha tshi khou hwesa donngi dzavho mavhele na waini na nḓirivhe na mahuyu na zwiṅwe zwithu vha tshi zwi isa Jerusalema. Nṋe nda vha kaidza nda ri vha songo rengisa zwiḽiwa nga Sabatha. ₁₆Vhaṅwe vhanna vha no bva muḓini wa Tiro vho vha vha tshi dzula Jerusalema, vha ḓisa khovhe na dziṅwe thundu dza tshakha-tshakha afho muḓini uri vha dzi rengisele vhathu vha hashu nga Sabatha. ₁₇Nṋe nda kaidza vharangaphanḓa vha Majuda nda ri, “Edzonu vhona vhuvhi vhune na ita! Ni khou ita uri Sabatha i si tsha vha khethwa. ₁₈A si zwenezwo zwe zwa ita uri Mudzimu washu a rwe vhomakhulukuku waṋu na uyu muḓi wa vhuya wa phusukanywa? Naho zwo ralo inwi ni ḓi futelela uri Mudzimu a sinyutshele Vhaisraele nga u kumadza Sabatha.”

₁₉Ndi hone nṋe ndi tshi ri khoro dza muḓi dzi ḓi hoṋiwa nga ḽavhuṱanu ḽi tshi mbwanda, dza vulwa Sabatha i tshi fhela. Nda vhea vhaṅwe vhanna vhane nda vha langa uri vha linde dzikhoro uri hu si vhe na tshine tsha dzheniswa afho muḓini nga Sabatha. ₂₀Vhashavhi vhe vha vha vha tshi rengisa tshakha dzoṱhe dza thundu vha vho ri vha lala nnḓa ha mitsheṱo ya muḓi vhusiku hoṱhe nga ḽavhuṱanu, vha zwi ita luthihi kana luvhili. ₂₁Nda vha kaidza nda ri, “Ni itelani ni tshi lala henefha nnḓa ha mutsheṱo? Ná dovha ndi ḓo ni halifhela.” U bva zwenezwo vha si tsha dovha vha ḓa nga Sabatha. ₂₂Nda vhudza Vhalivi uri vha ḓikumulule, vha ṱuwe vha yo linda dzikhoro uri Sabatha i itwe khethwa.

Mudzimu wanga, nnyelelwe na nga zwenezwi-vho, u nkhathutshele ngauri u na lufuno luhulu!

₂₃Ḽiṅwe ḓuvha nda wana uri vhanna vha na tshivhalo vha Majuda vho dzea vhasadzi vha no bva Ashidodo na Amoni na Muaba. ₂₄Hafu ya vhana vhavho vho vha vha tshi amba luambo lwa Ashidodo kana luambo lwa luṅwe lushaka, vha sa koni u amba Tshijuda. ₂₅Nda kaidza avho vhanna, nda vha teketela, vhaṅwe nda tou vha rwa nda vha tupula na mavhudzi. Nda ita uri vha ane nga dzina ḽa Mudzimu uri vhone kana vhana vhavho a vha tsha ḓo dovha vha dzetshelana na vhatsinda. ₂₆Nda ri, “Vho wedzaho khosi Solomoni tshivhini a si vhasadzi vha vhatsinda naa? Solomoni o vha e munna muhulu a tshi fhira mahosi oṱhe a dziṅwe tshakha. Mudzimu o vha a tshi mu funa, a mu vhumba khosi ya Israele, naho zwo ralo vhasadzi vha vhatsinda vho mu wedza kha vhutshinyi. ₂₇Zwino ri vho pfa na inwi ni tshi ita vhuvhi honoho vhungafho, na shandukela Mudzimu washu nga u dzea vhasadzi vha vhatsinda?”

₂₈Joyada o vha e ṅwana wa tshifhe muhulu Eliashibi, hone ṅwana wa Joyada a dzea ṅwananyana wa Sanibalati, wa Bethe Horoni, ndi zwe nda thatha Joyada Jerusalema.

₂₉Mudzimu wanga, elelwa zwe avho vha kumadza vhutshifhe na mulanga we wa u vhofha na vhotshifhe na Vhalivi.

₃₀Ngauralo ndo kumulula vhotshifhe na Vhalivi uri hu bve zwoṱhe zwisili, nda vha ṋea mishumo, muṅwe na muṅwe a dzhena mushumoni wawe. ₃₁Nda dzudzanya uri hu reḓwe khuni dza u honza musi hu tshi fhiswa zwiṱhavhelo uri dzi ḓiswe nga zwifhinga zwo teaho, na uri vhathu vha ḓise nduvho dzavho dza zwiranzhe.

Mudzimu wanga, elelwa zwe nda ita u nnyitele vhuthu!