NEHEMIA 12

₁Mutevhe wa vhotshifhe na Vhalivi vho vhuyaho vha tshi bva vhuthubwani vhe na Zerubabele ṅwana wa Salathiele na tshifhe muhulu Joshua ndi:

Vhotshifhe:

Havho vhanna vho vha vhe vhone vharangaphanḓa vha vhotshifhe, na vhashumisani navho misi ya Joshua.

₈Vhalivi:

Vhe vha vha vha tshi sima nyimbo dza ndivhuho ndi: Jeshua na Binui na Kadamiele na Sherebia na Juda na Mathania.

₉Vhe vha vhumba tshigwada tsha vhaimbi vhane vha imba dzimvumiso: Bakabuku na Uni na Vhalivi vha havho.

₁₀Joshua o vha khotsi a Joyakimu, Joyakimu a vha khotsi a Eliashibi, Eliashibi a vha khotsi a Joyada, ₁₁Joyada a vha khotsi a Jonathani, Jonathani a vha khotsi a Jadua.

₁₂Musi Joyakimu e tshifhe muhulu, vhotshifhe vhe vha vha vhe ṱhoho dza mitupo ya vhotshifhe ndi:

₂₂Misi ya vhotshifhe vhahulu Eliashibi na Joyada na Jonathani na Jadua ho ṅwalwa mutevhe wa ṱhoho dza miṱa ya Vhalivi, misi ya Dariosi khosi ya Pheresia ha ṅwalwa mutevhe wa ṱhoho dza miṱa ya vhotshifhe.

₂₃Hone ṱhoho dza miṱa ya Vhalivi dzo vha dzo ṅwalwa kha maṅwalo a muvhuso u swika fhedzi nga tshifhinga tsha Jonathani muḓuhulu wa Eliashibi.

₂₄Vhalivi vho vha vho vhekanywa nga zwigwada vha tshi langiwa nga Hashabia na Sherebia na Jeshua na Binui na Kadamiele. Ho vha hu na zwigwada zwivhili zwe zwa renda Mudzimu nga tshifhinga tshithihi zwi tshi bvumelana, vha tshi mu livhuha, vha tshi tevhedza ndayo i no bva ha khosi Dafita muḓinḓa wa Mudzimu. ₂₅Vhe vha bvumelana na avho ndi Mathania na Bakabukia na Obadia.

Vhalindi vha thembele vhe vha vha vha tshi linda nnḓu dza u vhulungela thundu dzi re tsini ha khoro dza thembele ndi: Mishulamu na Talamoni na Akubu.

₂₆Vhathu avho ndi vha misi ya Joyakimu, ṅwana wa Joshua, ṅwana wa Jotsadaka, na ya muvhusi Nehemia, na ya tshifhe Esra muḓivhi wa Mulayo.

₂₇Musi mutsheṱo wa muḓi wa Jerusalema u tshi kumedzwa Mudzimu, Vhalivi vha rambiwa vha tshi bva mahayani avho, uri na vhone vha vhe hone vhuṱamboni honoho vha imbe nyimbo dza u livhuha vha lidze mirumba na haripa na mbila. ₂₈Ha kuvhangana vhaimbi vha Vhalivi vha tshi bva mahayani avho u mona na Jerusalema na miḓanani u mona na Netofa, ₂₉na Bethe Giligala na Geba na Asimavethe. ₃₀Vhotshifhe na Vhalivi vha ḓikumulula vha kumulula na lushaka na dzikhoro na mutsheṱo wa muḓi.

₃₁Nṋe nda kuvhanganya vharangaphanḓa vha Juda nṱha ha mutsheṱo, nda ri vha lange zwigwada zwivhili zwihulu uri zwi mone na muḓi, zwi tshi khou livhuha Mudzimu.

Tshigwada tsha u ranga tsha livha thungo ya tshauḽa nṱha ha mutsheṱo u ela Khoroni ya Vhutoko. ₃₂Murahu ha vhaimbi ha tshimbila Hoshaya, a tevhelwa nga hafu ya vharangaphanḓa vha Juda. ₃₃Vhotshifhe vhe vha vha vha tshi khou tevhela vhenevho vha tshi khou lidza dziphalaphala ndi Azaria na Esra na Mishulamu ₃₄na Juda na Benyamini na Shemaya na Jeremia. ₃₅Ha tevhela Zakaria, ṅwana wa Jonathani, ṅwana wa Shemaya. (Vhomakhulukuku wawe vho vha vha tshi angaredza na Mathania na Mikaya na Zakhuru, wa mutupo wa Asafu.) ₃₆Ene a tevhelwa nga vhaṅwe vha mutupo wa hawe, ndi Shemaya na Azariele na Milalai na Gilalai na Maai na Nathaniele na Juda na Hanani, vhoṱhe vhó fara zwilidzo zwi no fana na zwe zwa vha zwi tshi lidzwa nga khosi Dafita muḓinḓa wa Mudzimu. Esra muḓivhi wa Mulayo, ene a ranga vhathu avho phanḓa vha rwa muduba vha tshimbila. ₃₇Vha tshi swika Khoroni ya Tshisima vha gonya zwiṱepisi zwi no livha Muḓini wa Dafita zwi tshi fhira pfamo ya Dafita zwa humela mutsheṱoni Khoroni ya Maḓi, thungo ya vhubvaḓuvha ha muḓi.

₃₈Tshiṅwe tshigwada tsha vharendi tsha livha thungo ya tshamonde tsha tshimbila nṱha ha mutsheṱo, nṋe nda tevhela ndi na hafu ya vhathu. Ra tshimbila ra fhira Thawara ya Dziṋanḓo ra livha Mutsheṱoni Mudenya, ₃₉u bva henefho ra tshimbila ra fhira Khoro ya Efraimi na Khoro ya Jeshana na Khoro ya Khovhe na Thawara ya Hananele na Thawara ya Vhaḓana ra livha Khoroni ya Nngu. Lwendo lwashu lwa guma tsini ha khoro ya thembele.

₄₀Vhuvhili ha zwigwada zwe zwa vha zwi tshi khou renda Mudzimu zwa swika thembeleni. Kha avho vharangaphanḓa vhe vha vha vhe na nṋe, ₄₁tshigwada tshanga tsho vha tshi na vhotshifhe vhe vha vha vha tshi khou lidza dziphalaphala. Ndi Eliakimu na Maaseya na Miniamini na Mikaya na Elihwenai na Zakaria na Hanania; ₄₂vhone vha tevhelwa nga Maaseya na Shemaya na Eliasara na Uzi na Johanani na Malikhiya na Elamu na Ezere. Vhaimbi vha rangwa phanḓa nga Jeserahia, vha tou imbela nṱha.

₄₃Musi wonoyo ho ṋekedzwa zwiṱhavhelo zwinzhi, vhathu vhó takala zwihulu nge Mudzimu a vha takadza. Vhasadzi na vhana na vhone vho vha vhe hone afho vhuṱamboni, mukosi we vha u ṱavha wa pfala kule-kule.

₄₄Tshifhinga tshenetsho ha vhewa vhanna uri vha linde nnḓu dza mbulungelo, he ha vha hu tshi vhewa zwo bviselwaho thembele, khathihi na tshafumi na mavhele a u ranga na mitshelo ine ya vhibva ṅwaha nga ṅwaha. Havho vhanna vho vha vha tshi kuvhanganya zwo liṅwaho tsini ha miḓi yo fhambanaho zwi bviselwaho vhotshifhe na Vhalivi zwo ṅwalwaho Mulayoni. Vhathu vhoṱhe vha Juda vho vha vha tshi takalela vhotshifhe na Vhalivi, ₄₅nge vha vha vha tshi tevhedza maitele a u kumulula vhathu na maṅwe maitele e Mudzimu a laya. Vhaimbi vha thembeleni na vhalindathembele na vhone vha shuma vha tshi tevhedza ndayo dzo vhewaho nga khosi Dafita na ṅwana wawe Solomoni. ₄₆U bva misi ya khosi Dafita na muimbi Asafu kale-kale, vhaimbi vho vha vha tshi ḓi imba nyimbo dza u livhuha Mudzimu. ₄₇Misi ya Zerubabele na misi ya Nehemia vhathu vhoṱhe vha Israele vho vha vha tshi bvisa dzimpho misi yoṱhe dza u tikedza vhaimbi vha thembeleni na vhalindathembele. Vhathu vho vha vha tshi ṋea Vhalivi nduvho khethwa, Vhalivi vhone vha tshi ḓi ṋea na vhotshifhe mukovhe wavho.