LIVITIKO 21

₁Muṋe washu o laya Mushe uri a vhudze vhotshifhe vhana vha Aroni a ri, “Hu songo vha na tshifhe ane a ḓikumadza nga u longa tshanḓa kha maitele a u swiṱa mufu musi ho fa shaka, ₂arali e si mme awe kana khotsi awe kana ṅwana wawe kana mukomana kana murathu vhana vha khotsi ₃kana khaladzi awe a sa athu dzewa a no dzula muṱani wawe. ₄A songo ḓikumadza lufuni lwa vhomakhulu mubebamusadzi.

₅“Hu songo vha na tshifhe ane a vheula ṱhoho yawe kana a ṱunya ndebvu dzawe kana a ḓitshea muvhili wawe u sumbedza uri u zwililoni. ₆Nga a vhe mukhethwa, a songo nyadzisa dzina ḽanga. U nṋekedza tshiṱhavhelo tsha zwiḽiwa, nga a vhe mukhethwa. ₇Tshifhe a songo dzea phombwe kana musadzi a si musidzana kana o ṱalwaho; ene ndi mukhethwa, o ḓikumedza Yahavee. ₈Vhathu nga vha vhone tshifhe e mukhethwa ngauri u nṋekedza tshiṱhavhelo tsha zwiḽiwa. Ndi Nṋe Yahavee, ndi mukhethwa, ndi ni ita vhakhethwa. ₉Arali ṅwananyana wa tshifhe a tshi ḓinyadzisa nga u tshila nga vhupombwe, u nyadzisa na khotsi awe, nga a fhiswe a fe.

₁₀“Tshifhe muhulu o shelwa mapfura a u mu ta ṱhohoni yawe, nahone o kumedzwa Mudzimu uri a ambare zwiambaro zwa vhutshifhe, zwenezwo a songo litsha mavhudzi awe á songo gamiwa kana a kherukanya zwiambaro zwawe u sumba uri u zwililoni. _11-12O khethelwa thungo a kumedzwa Nṋe nga mapfura e a ḓodzwa ngao; a songo ḓikumadza, a songo kumadza fhethu hanga hukhethwa nga u bva hone a dzhena nḓuni ho faho muthu, naho vhe khotsi awe kana mme awe. ₁₃Nga a dzee musidzana fhedzi, ₁₄a songo dzea tshilikadzi kana musadzi o ṱalwaho kana phombwe. Nga a dzee musidzana wa lushaka lwa hawe. ₁₅Zwa sa ralo, vhana vhawe vha ḓo vha vho kumala. Ndi Nṋe Yahavee, ndo mu khethela thungo a vha tshifhe muhulu.”

₁₆Muṋe washu o laya Mushe ₁₇uri a vhudze Aroni a ri, “Hu songo vha na muḓuhulu wau wa tshihole ane a nga nṋekedza nduvho ya zwiḽiwa. Misi yoṱhe zwi ḓi ralo. ₁₈Hu songo vha na muthu wa tshihole ane a nga ṋekedza nduvho: wa bofu kana wa tshihole kana o kongonyalaho kana a si na tshivhumbeo tshavhuḓi, ₁₉kana o kongonyalaho tshanḓa kana lwayo, ₂₀kana a re na thunda kana mupfufhisa kana a lwalaho maṱo kana lukanda, kana o luvhedzwaho. ₂₁Hu songo vha na muḓuhulu wa tshifhe Aroni a re tshihole ane a nga nṋekedza nduvho ya zwiḽiwa. ₂₂Munna o raloho a nga ḓi ḽa zwiḽiwa zwine nda ṋekedzwa, nduvho ya zwiḽiwa zwikhethwa na nduvho ya zwiḽiwa zwikhethwakhethwa, ₂₃hone ngauri ndi tshihole tsha muvhili, a songo sendela tsini ha lupila lukhethwa kana a swika aḽiṱarini. Izwo zwithu zwikhethwa a songo zwi kumadza, ngauri ndi Nṋe Yahavee, ndi vha ita vhakhethwa.”

₂₄Hezwo ndi zwe Mushe a vhudza Aroni na vhana vha Aroni na Vhaisraele vhoṱhe.