LIVITIKO 20

₁Muṋe washu o vhudza Mushe ₂uri a vhudze Vhaisraele a ri, “Nnyi na nnyi waṋu kana mutsinda ufhio na ufhio a no dzula na inwi ane a kumedza ṅwana wawe a vha tshiṱhavhelo tsha u luvha mudzimu Molekhe, vhathu vhoṱhe vha ḓo mu kanḓa nga matombo a fa. ₃Arali muthu a kumedza Molekhe vhana vhawe, ndi u kumadza fhethu hanga hukhethwa na u nyadzisa dzina ḽanga ḽikhethwa; ndi ḓo mu ita swina ḽanga, a thi tsha ḓo mu ita muṅwe wa vhathu vhanga. ₄Hone arali vhathu vha sa londi zwe a ita, vha litsha u mu vhulaha, ₅uyo munna na vha muṱa wawe vhoṱhe vhane vha mu tikedza a tshi ntshandukela vha luvha Molekhe, Nṋe muṋe ndi ḓo vha ita maswina anga, a thi tsha ḓo vha ita vhathu vhanga.

₆“Arali muthu a yo ṱoḓa nyeletshedzo kha vhoriaḓivha vhane vha vhudzisa mimuya ya vho faho, ndi ḓo mu ita swina ḽanga, a thi tsha ḓo mu vhala na vhathu vhanga. ₇Ivhani vhakhethwa, ngauri ndi Nṋe Yahavee Mudzimu waṋu. ₈Vhulungani milayo yanga ni i tevhedze, ngauri ndi Nṋe Yahavee, ndi ni ita vhakhethwa.

₉“Muthu ane a teketela khotsi awe kana mme awe nga a vhulawe, a tshi fa ndi mulandu wawe.

₁₀“Arali munna a ita vhupombwe na musadzi wa Muisraele wa hawe, vhuvhili havho ene na uyo musadzi nga vha vhulawe. ₁₁Munna ane a dzhenisa mmane nḓuni u nyadzisa khotsi awe, vhuvhili havho uyo munna na musadzi nga vha vhulawe. Vha tshi fa ndi mulandu wavho. ₁₂Arali munna a dzhenisa musadzi wa ṅwana wawe nḓuni, vhuvhili havho nga vha vhulawe. Ndi vhuṱudzi, vha tshi fa ndi mulandu wavho.

₁₃“Arali munna a dzhia muṅwe munna a mu ita musadzi, vho ita zwi nengisaho, vhuvhili havho nga vha vhulawe. Vha tshi fa ndi mulandu wavho.

₁₄“Arali munna a dzea musadzi a dzea na mme a uyo musadzi, vhoṱhe vhuraru havho nga vha fhiswe nga mulilo vha fe nga mulandu wa zwi shonisaho zwe vha ita, zwo raloho ni songo vhuya na zwi tendela vhukati haṋu.

₁₅“Arali munna a dzhia phukha a i ita musadzi, nga a vhulawe, na iyo phukha i vhulawe. ₁₆Arali musadzi a linga u dzhia phukha a i ita munna, nga a vhulawe, na iyo phukha i vhulawe. Vha tshi fa ndi mulandu wavho.

₁₇“Arali munna a dzea khaladzi awe ṅwana wa mme kana ṅwana wa khotsi, vho ita zwi shonisaho, nga vha thathwe vhathuni, vhoṱhe vha tshi zwi vhona. O dzhenisa khaladzi awe nḓuni, vha fanela u vhewa mulandu. ₁₈Arali munna a dzhenisa musadzi nḓuni a tshi khou vhona ṅwedzi, vhuvhili havho nga vha thathwe vhathuni, ngauri vho pfuka ndayo dza u ṱamba dzitshika.

₁₉“Arali munna a dzhenisa makhadzi wawe kana mmane wawe nḓuni, vhuvhili havho vha na mulandu wa u ita vhuaḓa na shaka. ₂₀Arali munna a dzhenisa musadzi wa malume kana khotsimunene wawe nḓuni, u nyadza malume kana khotsimunene wawe, ene na uyo musadzi vha ḓo lifha, vha ḓo fa vha si na vhana. ₂₁Arali munna a dzhiela mukomana kana murathu musadzi, a vha nga vhi na vhana. O ita vhuaḓa, o nyadza mukomana wawe.

₂₂“Vhulungani milayo yanga yoṱhe na ndayo dzanga ni dzi tevhedze uri ni sa ḓo ṱanziwa nga shango ḽa Kanana ḽine nda khou ni isa khaḽo. ₂₃Ni songo guda maitele a vhathu vhane vha dzula henefho, ndi khou thatha vhannḓa uri inwi ni kone u dzhena shangoni iḽo. Vho nnengisa nga zwiito zwavho zwoṱhe zwivhi. ₂₄Huno inwi ndo ni fulufhedzisa shango heḽo ḽi elaho mukhaha na ṋotshi uri ḽi vhe ḽaṋu, ndi ḓo ni ṋea ḽone. Ndi Nṋe Yahavee Mudzimu waṋu, ndo ni khetha uri ni si vangane na dziṅwe tshakha. ₂₅Zwino-ha ni ṱalukanye phambano vhukati ha dziphukha na zwiṋoni zwi no ḽiwa na zwi no ila u ḽiwa. Ni songo ḽa phukha kana zwiṋoni kana zwikhokhonono zwi no ila u ḽiwa. Ndo ni ilisa, na zwi ḽa zwi ḓo ni kumadza. ₂₆Ivhani vhakhethwa, ni vhe vhanga ndi ndoṱhe, ngauri ndi Nṋe Yahavee, ndi mukhethwa. Ndo ni khethela thungo ni si vangane na dziṅwe tshakha, uri ni vhe vhanga ndi ndoṱhe.

₂₇“Munna kana musadzi ane a yo vhudzisa mimuya ya vho faho, nga a kanḓwe nga matombo a fe. Ane a ita zwo raloho, a fa ndi mulandu wawe.”