LIVITIKO 17

₁Muṋe washu a laya Mushe ₂uri a ṋee Aroni na vhana vhawe na Vhaisraele vhoṱhe ndayo hedzino.

₃Muisraele ane a ṱhavha kholomo kana nngu kana mbudzi ngomu mishashani kana nnḓa ha mishasha ya vha nduvho i ṋekedzwaho Muṋe washu, ₄a si i ḓise muṋangoni wa dennde ya u ṱangana na Mudzimu, o pfuka mulayo. Onoyo u ḓo nga o shulula malofha nahone ha tsha ḓo vhalwa na vhathu vha Mudzimu. ₅Ndayo hei i amba uri Vhaisraele zwino vha vho ḓo ṋea Muṋe washu zwifuwo zwe kale vha vha vha tshi zwi ṱhavha ḓakani. Zwino vha vho ḓo zwi ḓisa ha tshifhe muṋangoni wa dennde ya u ṱangana na Muṋe washu, vha zwi ṱhavha zwa vha nduvho dza u konana nae. ₆Tshifhe u ḓo handulula masia a aḽiṱari ya Muṋe washu nga malofha azwo muṋangoni wa dennde ya u ṱangana na Mudzimu, a fhisa mapfura ya vha nduvho i no nukhelela i takadzaho Muṋe washu. ₇Vhaisraele vha songo tsha ṱolou shandukela Muṋe washu nga u ṱhavha zwifuwo zwavho ḓakani zwa vha nduvho ya madimoni a dzimbudzi. Vhaisraele nga vha tevhedze ndayo hei misi yoṱhe.

₈Muisraele kana mutsinda a no dzula navho ane a ṋekedza nduvho i fhiswaho kana iṅwe nduvho ₉ine ya ṋekedzwa Muṋe washu huṅwe fhethu hune ha si vhe muṋangoni wa dennde ya u ṱangana na Mudzimu ha tsha ḓo vhalwa na vhathu vha Mudzimu.

₁₀Arali muṅwe Muisraele kana muṅwe mutsinda ane a dzula navho a ḽa ṋama ine ya kha ḓi vha na malofha, Muṋe washu u ḓo mu sinyutshela nahone ha tsha ḓo mu vhala na vhathu vhawe. ₁₁Vhutshilo ha tshiṅwe na tshiṅwe tshi tshilaho vhu malofhani, ndi zwe Muṋe washu a laya uri malofha oṱhe a shululelwe aḽiṱarini uri a pfumelele vhutshinyi ha vhathu. Malofha ndi vhutshilo, a pfumelela muthu. ₁₂Ndi zwe Muṋe washu a vhudza Vhaisraele uri vhone kana mutsinda ane a dzula navho vha songo ḽa ṋama ine ya kha ḓi vha na malofha.

₁₃Arali Muisraele kana mutsinda ane a dzula navho a zwima phukha kana tshiṋoni tshi songo iledzwaho, o fanela u shululela malofha atsho fhasi, a fukedze nga mavu. ₁₄Vhutshilo ha tshiṅwe na tshiṅwe tshi tshilaho vhu malofhani atsho, ndi zwe Muṋe washu a vhudza Vhaisraele uri vha songo ḽa ṋama ine ya kha ḓi vha na malofha na uri ane a ita nga u ralo ha tsha ḓo vhalwa na vhathu vhawe.

₁₅Nnyi na nnyi, a nga vha e Muisraele kana mutsinda, ane a ḽa ṋama ya tshidu kana phukha yo vhulawaho nga zwivhanda, o fanela u kuvha zwiambaro zwawe, a ṱamba muvhili, a lindele ḽi vhuye ḽi kovhele, ndi hone a tshi ḓo vha o kumuluwa. ₁₆Arali a sa kuvha zwiambaro zwawe a ṱamba muvhili, u na mulandu.