LIVITIKO 16

₁Muṋe washu o amba na Mushe ho no fa vhana vhavhili vha Aroni vha vhatuka vhe vha vhulawa musi vha tshi sendela tsini ha Muṋe washu. ₂Muṋe washu a ri, “Vhudza mukomana wau Aroni uri a songo mona murahu ha lupila a dzhena Hukhethwakhethwa arali hu si nga tshifhinga tsho teaho, ngauri henefho ndi hune nda ḓivhonadza hone ndi kha gole nṱha ha tshitibo tsha mbulungelo. Arali a sa pfi, u ḓo fa. ₃Aroni a nga dzhena Hukhethwakhethwa o thoma u ṋekedza mbohwana ya tshipfumelo na thutha ya nduvho i fhiswaho.”

₄Ndi hone Muṋe washu a tshi ḓivhadza ndayo hedzino:

A sa athu dzhena Hukhethwakhethwa, o fanela u ṱamba muvhili, a ambara zwiambaro zwikhethwa zwa vhutshifhe: hemmbe ya lukhaha na vhurukhu vhupfufhi na bannda na muthini.

₅Vhathu vha Israele nga vha fhe Aroni mbokoṱo mbili dza nduvho ya tshipfumelo na thutha ya nduvho i fhiswaho. ₆Nga a ṋekedze mboho i vhe tshiṱhavhelo tsha u ḓipfumelela ene muṋe na muṱa wawe. ₇Ndi hone a tshi ḓo konou dzhia idzo mbokoṱo mbili a dzi isa muṋangoni wa dennde ya u ṱangana na Mudzimu a dzi vhea phanḓa ha Muṋe washu. ₈Henefho u ḓo ita mamvaṱe nga matombo mavhili, ḽiṅwe ḽo ṅwalwa upfi, “Ndi ya Muṋe washu”, ḽiṅwe ḽo ṅwalwa upfi, “Ndi ya Azazele”. ₉Aroni u ḓo ṋekedza Muṋe washu iyo mbokoṱo yo khethwaho nga madeṅwa ya vha nduvho ya tshipfumelo. ₁₀Mbokoṱo yo khethelwaho Azazele i ḓo ima phanḓa ha Muṋe washu i tshi khou tshila, Aroni a khunyeledze khayo maitele a u pfumelela vhathu, ya konou iswa phangani ha Azazele.

₁₁Musi Aroni a tshi ṋekedza mboho i tshi vha nduvho ya tshipfumelo tsha ene muṋe na muṱa wawe, ₁₂u ḓo dzhia ludongo lwa mulilo lwo ḓala masimbe a mulilo a no bva aḽiṱarini phanḓa ha Muṋe washu, na zwioro zwavhuḓi zwi na zwilungi zwo ḓala tshanḓa kavhili, a dzhena nazwo Hukhethwakhethwa. ₁₃Henefho phanḓa ha Mune washu u ḓo ṋuṋedza zwioro muliloni, vhutsi ha zwioro vhu ḓo tsira tshitibo tsha mbulungelo uri a si tshi vhone, a sa ḓo fa. ₁₄U ḓo dzhia maṅwe malofha a iḽa mboho a ṋanga nga munwe wawe a handulula phanḓa ha itsho tshitibo ngao, maṅwe a handulula phanḓa ha mbulungelo ngao kaṱanu na kavhili.

₁₅Ó no fhedza izwo u ḓo ṱhavha iyo mbokoṱo ya nduvho ya tshipfumelo tsha vhathu, a ḓisa malofha ayo Hukhethwakhethwa, a handulula tshitibo na phanḓa ha mbulungelo ngao sa zwe a ita nga malofha a mboho. ₁₆Ngauralo u ḓo vha o ita tshipfumelo tsha Hukhethwakhethwa he ha kumadzwa nga vhushandukwa ha Vhaisraele na vhutshinyi havho hoṱhe. Hezwo o fanela u zwi itela na dennde ya u ṱangana na Mudzimu i re vhukati havho hezwi vho kumala. ₁₇U bva tshifhinga tsha musi Aroni a tshi dzhena Hukhethwakhethwa u ita tshipfumelo, a vhuya a bva, hu songo wanala hu na muthu denndeni ya u ṱangana na Mudzimu. Musi o no ḓipfumelela ene muṋe na muṱa wawe na vhathu vhoṱhe vha Israele, ₁₈nga a bvele nnḓa a ye aḽiṱarini ya u fhisela nduvho, i re phanḓa ha Muṋe washu, a i kumulule. Nga a dzhie maṅwe malofha a iḽa mboho na maṅwe malofha a iḽa mbokoṱo a ḓodze ṋanga dzi re khuḓani dza aḽiṱari. ₁₉Nga a longe munwe wawe ngomu malofhani a handulule aḽiṱari kaṱanu na kavhili. Ngauralo u ḓo vha o i kumulula tshika dza Vhaisraele, ya vha khethwa.

₂₀Musi Aroni o no fhedza u kumulula Hukhethwakhethwa na hoṱhe denndeni ya u ṱangana na Mudzimu na aḽiṱari, u ḓo ṋekedza Muṋe washu mbokoṱo yo khethelwaho Azazele. ₂₁U ḓo vhea zwanḓa zwawe zwivhili ṱhohoni ya iyo mbokoṱo i tshilaho, a bula henefho khayo vhuvhi hoṱhe na vhushandukwa na vhutshinyi ha Vhaisraele, a zwi vhea ṱhohoni ya iyo mbokoṱo. Zwenezwo iyo mbokoṱo ya swogeledzwa phangani nga munna o vhetshelwaho uyo mushumo. ₂₂Iyo mbokoṱo i ḓo hwala vhutshinyi havho ya vhu isa sogani, uyo munna a i litsha henengei phangani.

₂₃Ndi hone Aroni a tshi ḓo dzhena denndeni ya u ṱangana na Mudzimu, a bvula zwiambaro zwa vhutshifhe zwe a vha o zwi ambara a sa athu dzhena Hukhethwakhethwa, a zwi sia henefho, ₂₄a ṱamba muvhili fhethu hukhethwa, a ambara zwiambaro zwawe. O no fhedza u ḓo bvela nnḓa a ṋekedza nduvho i fhiswaho u ḓipfumelela ene muṋe na u pfumelela vhathu. ₂₅U ḓo fhisa mapfura a tshifuwo tsha nduvho ya tshipfumelo kha aḽiṱari. ₂₆Munna we a swogeledza mbokoṱo iḽa phangani ha Azazele o fanela u kuvha zwiambaro zwawe a ṱamba muvhili a sa athu humela mishashani. ₂₇Mboho na mbokoṱo zwe zwa ṱhavhelwa u ṋekedza nduvho ya tshipfumelo, malofha azwo a dzheniswa Hukhethwakhethwa u pfumelela vhathu, zwone zwi ḓo hwalelwa nnḓa ha mishasha, zwa fhiswa. Mukumba na ṋama na vhula, zwoṱhe zwi ḓo fhiswa. ₂₈Muthu ane a zwi fhisa o fanela u kuvha zwiambaro zwawe a ṱamba muvhili a sa athu humela mishashani.

₂₉Ndayo hedzino no fanela u dzi tevhedza misi yoṱhe. Nga ḓuvha ḽa fumi ḽa ṅwedzi wa vhuṱanu na vhuvhili, Vhaisraele na vhatsinda vhane vha dzula navho vho fanela u ḓidzima nahone vha songo shuma. ₃₀Nga ḓuvha ḽeneḽo no fanela u pfumelelwa uri ni kumululwe. Ndi hone Muṋe washu a tshi ḓo vhona no ṱamba vhutshinyi haṋu hoṱhe. ₃₁Heḽo ḓuvha ḽi itwe ḽikhethwakhethwa, nga vha ḓidzime nga heḽo ḓuvha, vha si vhuye vha shuma na kathihi. Ndayo hedzi dzi tevhedzwe misi yoṱhe. ₃₂Tshifhe muhulu, o vhumbiwaho nga pfanelo a kumedzwa Mudzimu uri a ime tshiimoni tsha khotsi awe, ndi ene ane a fanela u pfumelela vhathu. O fanela u ambara zwiambaro zwa vhutshifhe, ₃₃a pfumelele Hukhethwakhethwa na dennde yoṱhe ya u ṱangana na Mudzimu na aḽiṱari na vhotshifhe na vhadzulapo vhoṱhe. ₃₄Ndayo hedzo dzi tevhedzwe misi yoṱhe. Maitele hayo o fanela u itwa luthihi nga ṅwaha uri Vhaisraele vha pfumelelwe vhutshinyi havho.

Zwenezwo Mushe a ita nga he Muṋe washu a mu laya.