JOSHUA 24

₁Ngavhuya Joshua a kuvhanganya matsinde oṱhe a Israele muḓini wa Shikheme. O vhidza vhahulwane na vharangaphanḓa na vhahaṱuli na vhakoma vha Israele, vha ḓa phanḓa ha Mudzimu. ₂Joshua a vhudza vhathu vhoṱhe a ri, “Muṋe washu Mudzimu wa Israele u ri, ‘Kale-kale vhomakhulukuku waṋu, Thera khotsi a Abrahamu na Nahoro, vho vha vha tshi dzula seli ha mulambo wa Yufuratha, vha tshi luvha miṅwe midzimu. ₃Hone Nṋe nda dzhia makhulukuku waṋu Abrahamu nda mu bvisa shangoni ḽa seli ha Yufuratha, nda mu tshimbidza a buḓekanya shango ḽoṱhe ḽa Kanana. Nda mu fha vhaḓuhulu vhanzhi. Nda mu fha Isaka, ₄Isaka nda mu fha Jakopo na Esau. Esau nda mu fha shango ḽa dzithavha ḽa Edomo uri ḽi vhe ḽawe, hone makhulukuku waṋu Jakopo na vhana vhawe vho ḓo pfulutshela Egipita. ₅Ngavhuya nda ruma Mushe na Aroni, nda ita uri Vhaegipita vha welwe nga khombo khulu, hone inwi nda ni pfulusa. ₆Nda pfulusa vhomakhulukuku waṋu Egipita, Vhaegipita vha vha tevhela nga gariki dza nndwa na vhanameli vhadzo. Hone musi vhomakhulukuku waṋu vha tshi swika Lwanzheni lwa Dziṱhanga, ₇vha nṱavhela mukosi uri ndi vha farise, nda ḓisa swiswi vhukati havho na Vhaegipita. Nda ita uri lwanzhe lu tibe Vhaegipita lu vha kumbe. No zwi vhona nga aṋu maṱo zwe nda ita Vhaegipita.

“ ‘No dzula phangani tshifhinga tshilapfu. ₈Nda ni isa shangoni ḽa Vhaamori, vhubvaḓuvha ha Jorodani. Vho lwa na inwi, Nṋe nda vha kumedza zwanḓani zwaṋu. Na dzhia shango ḽavho, ni tshi swika Nṋe nda vha lozwa. ₉Zwino ha ḓa khosi ya Muaba, Balaka ṅwana wa Tsiphoro, a lwa na inwi. A ruma vhaḓinḓa ha Biliamu ṅwana wa Bioro, vha mu vhidza uri a ḓe a ni teketele. ₁₀Huno Nṋe nda si thetshelese, nda ita uri Biliamu a ni ḓisele mashudu, ngauralo nda vha ndo ni lamulela zwanḓani zwa Balaka. ₁₁Na wela mulambo wa Jorodani, na swika Jerikho. Vhanna vha Jerikho vha lwa na inwi, u ḓi nga Vhaamori na Vhapherisi na Vhakanana na Vhahithi na Vhagirigashi na Vhahivi na Vhajebusi, hone Nṋe nda vha kumedza zwanḓani zwaṋu. ₁₂Musi ni tshi swika nda thatha mahosi mavhili a Vhaamori, vha shavha vha tshi nga vha khou pandamedzwa nga mabu. Izwo a no ngo zwi ita nga mafumo aṋu na vhura haṋu. ₁₃Nda ni ṋea shango ḽe na si ḽi bvele biko na miḓi ye ya si fhaṱwe nga inwi. Zwino ni khou dzula henefho ni tshi ḽa minḓirivhe ye ni si zwale, na miolivi ye ni si ṱavhe.’ ”

₁₄Joshua a isa phanḓa a ri, “Zwinoha, hulisani Muṋe washu ni mu shumele ni tshi fulufhedzea ni si na muhoyo. Laṱani midzimu ye vhomakhulukuku waṋu vha vha vha tshi i luvha ngei seli ha Yufuratha na ngei Egipita, ni shumele Muṋe washu fhedzi. ₁₅Arali ni sa funi u mu shumela, ḓinangeleni ṋamusi ane na ḓo mu shumela, i nga vha midzimu ye vhomakhulukuku waṋu vha vha vha tshi i shumela ngei seli ha Yufuratha kana midzimu ya Vhaamori, vhane na vho dzula shangoni ḽavho. A vha nṋe na muṱa wanga ri ḓo shumela Muṋe washu.”

₁₆Vhathu vha fhindula vha ri, “Ri nga si vhuye ra litsha u shumela Muṋe washu ra yo shumela midzimu! ₁₇Mudzimu Muṋe washu Ene muṋe o pfulusa riṋe na vhokhotsi ashu Egipita he ra vha ri dziphuli, a ita maḓembe mahulu ri tshi zwi vhona, a ri tsireledza lwendoni lwashu lwoṱhe, vhukati ha tshakha dzoṱhe dze ra fhira khadzo. ₁₈Musi ri tshi swika shangoni ḽino, Muṋe washu a thatha tshakha dzoṱhe na Vhaamori vhe vha vha vha tshi dzula shangoni ḽino. Zwino na riṋe ri ḓo shumela Muṋe washu, Mudzimu washu ndi Ene.”

₁₉Joshua a amba na vhathu a ri, “Inwi ni nga si kone u shumela Muṋe washu. Ene ndi Mudzimu mukhethwa, ha vhangiswi vhuhulu hawe, ha nga ni hangweli vhuvhi haṋu. Ha nga konḓeleli ni tshi tshinya na mu shandukela, ₂₀arali na litsha u mu shumela na yo shumela midzimu isili, u ḓo ni shandukela-vho a ni ḓisela khombo. U ḓo ni lozwa naho o ranga u ni itela vhuthu.”

₂₁Vhathu vha fhindula Joshua vha ri, “Aiwa nandi! Riṋe ri ḓo shumela Muṋe washu.”

₂₂Joshua a vha vhudza a ri, “Ṱhanzi dzaṋu ndi inwi vhaṋe: no nanga u shumela Muṋe washu.”

Vhone vha ri, “Ri dziṱhanzi.”

₂₃Joshua a ri, “Zwino-ha, laṱani kule midzimu heyo isili ine na vha nayo, mbilu dzaṋu dzi livhe ha Muṋe washu Mudzimu wa Israele.”

₂₄Zwino vhathu vha vhudza Joshua vha ri, “Ri ḓo shumela Mudzimu Muṋe washu. Ri ḓo tevhedza ndayo dzawe.”

₂₅Ndi hone Joshua a tshi vhofha mulanga na Muṋe washu a tshi itela vhathu henefho Shikheme, a vha ṅwalela milayo na ndayo. ₂₆Joshua a ṅwala idzo ndayo buguni ya Mulayo wa Mudzimu. A konou dzhia tombo ḽihulu a ḽi imisa henefho fhasi ha muri muhulu tsini ha hukhethwa ha Muṋe washu. ₂₇Joshua a vhudza vhathu vhoṱhe a ri, “Tombo heḽi ḽi ḓo vha ṱhanzi yashu. Ḽo pfa maipfi oṱhe e Muṋe washu a ri vhudza. Zwenezwo ḽi ḓo vha ṱhanzi ya u ni rovhedza, ni si shandukele Muṋe washu.” ₂₈Ndi hone Joshua a tshi ri vhathu vha ṱuwe, muṅwe na muṅwe a vhuelela kha mukovhe wawe wa shango.

₂₉Musi ho no fhela izwo, muḓinḓa wa Muṋe washu, Joshua ṅwana wa Nunu a fa e na miṅwaha ya 110. ₃₀Vha mu swiṱa shangoni ḽawe muḓini wa Thiminathi Sera mivhunduni ya Efraimi devhula ha thavha ya Gaashi.

₃₁Vhaisraele vho shumela Muṋe washu misi yoṱhe Joshua a tshi kha ḓi tshila, na musi o no fa vha ḓi ralo vhahulwane vhe Joshua a fa a sia vha tshee hone, havhaḽa vhe vha vhona nga maṱo zwoṱhe zwe Muṋe washu a itela Vhaisraele.

₃₂Marambo a Josefa e Vhaisraele vha pfuluwa nao Egipita, o swiṱwa Shikheme, shangoni ḽe Jakopo a renga nga mangwende a ḓana a siliva, kha vhana vha Hamoro khotsi a Shikheme. Shango heḽo ḽo vha ifa ḽa vhaḓuhulu vha Josefa.

₃₃Eliasara ṅwana wa Aroni na ene a fa, a swiṱwa Gibia, muḓanani u re mivhunduni ya Efraimi, we wa vha wo kovhelwa ṅwana wawe Finiasi.