JOSHUA 23

₁Musi ho no fhela tshifhinga tshilapfu Muṋe washu ó ladzela Vhaisraele shango ha si tsha vha na maswina a lwaho navho, Joshua ó no kalaha, ó no ḓi vha wa maḓuvha, ₂a vhidza Vhaisraele vhoṱhe, vhahulwane na vharangaphanḓa na vhahaṱuli na vhakoma, a vha vhudza a ri, “Zwino ndo no kalaha, ndo no ḓi vha wa maḓuvha. ₃No zwi vhona zwoṱhe zwe Muṋe washu Mudzimu waṋu a ita tshakha hedzi dzoṱhe a tshi itela inwi. Muṋe washu Mudzimu waṋu o vha a tshi khou ni lwela. ₄Matsinde aṋu ndo vha kovhela shango ḽa vha ḽavho, ndi shango ḽa tshakha dzine dza kha ḓi vha hone, khathihi na tshakha dzoṱhe dze nda dzi kunda, u bva mulamboni wa Jorodani thungo ya vhubvaḓuvha u swika Lwanzheni lwa Phandamashango thungo ya vhukovhela. ₅Muṋe washu Mudzimu waṋu u ḓo ita uri vha ni humele, u ḓo vha thatha vha ni shavha. Ni ḓo dzhia shango ḽavho, sa zwe Muṋe washu Mudzimu waṋu a ni fulufhedzisa. ₆Ni songo litsha u tevhedza zwoṱhe zwo ṅwalwaho buguni ya Mulayo ya Mushe. Ni songo vhuya na sia na kupiḓa na kuthihi. ₇Ni songo vangana na tshakha hedzi dzo salaho vhukati haṋu kana na bula madzina a midzimu yavho kana na ana ngao kana na i luvha kana na i gwadamela. ₈Tshaṋu nga hu vhe u nambatela Muṋe washu Mudzimu waṋu, sa zwe na ita u swika zwino. ₉Muṋe washu o thatha tshakha khulu dza maanḓa dza shavha musi inwi ni tshi swika, a hu na we a kona u imedzana na inwi u swika na ṋamusi. ₁₀Muthihi waṋu a nga kona u pandamedza vhanna vha tshigidi vha shavha ngauri Muṋe washu Mudzimu waṋu u a ni lwela, unga o fulufhedzisa. ₁₁Zwino-ha, ni songo litsha u funa Muṋe washu Mudzimu waṋu. ₁₂Arali na mu shandukela, na ḓibaḓekanya na tshakha dzine dza kha ḓi vha vhukati haṋu, na dzetshelana navho, ₁₃ni ḓivhe uri Muṋe washu Mudzimu waṋu ha tsha ḓo thatha idzo tshakha dza shavha musi inwi ni tshi swika, tshavho, vha vho ḓo nga mulavhu kana khunḓa, vha ni pfisa vhuṱungu unga phamba muṱanani waṋu na mipfa maṱoni, na vhuya na lovha noṱhe na si tsha wanala shangoni heḽi ḽavhuḓi ḽe Muṋe washu Mudzimu waṋu a ni ṋea.

₁₄“Zwino-ha, ḓuvha ḽanga ḽa u fa ḽo swika. Ni ḓivha nga mbilu yoṱhe na nga zwoṱhe zwine na vha zwone uri Muṋe washu Mudzimu waṋu o ni ṋea zwivhuya zwoṱhe zwe a ni fulufhedzisa. Zwoṱhe zwe a ni fulufhedzisa o zwi khunyeledza, a hu na na tshithihi tshe tsha si itee. ₁₅Muṋe washu Mudzimu waṋu o khunyeledza zwivhuya zwoṱhe zwe a ni fulufhedzisa; ndi zwone, na khombo dzoṱhe dze a dzi bula u ḓo dzi khunyeledza nga u ralo, a vhuya a ni lozwa na si tsha wanala shangoni heḽi ḽavhuḓi ḽe a ni ṋea. ₁₆Arali na vhofholola mulanga we Muṋe washu Mudzimu waṋu a ni laya uri ni u vhulunge, na shumela miṅwe midzimu na i luvha, zwenezwo Muṋe washu u ḓo sinyuwa a ni lifhedza na lovha kathihi fhedzi shangoni heḽi ḽavhuḓi ḽe a ni ṋea.”