JOBO 8

₂Ni ḓo amba u swika lini,

na fhedza nyambo yaṋu i no nga muya u tshi vumuludza?

₃Mudzimu a nga rwa muthu

nga ṱhamu i songo mu teaho naa?

Ramaanḓaoṱhe a nga shanda zwi re zwone naa?

₄Ngoho a hu shayi tshe vhana vhaṋu vha mu dina ngatsho,

o tou vha rwa a tshi tevhedza vhutshinyi havho.

₅Zwino inwi ṱoḓani zwine Mudzimu Ramaanḓaoṱhe a zwi funa, ni mu luvhelele.

₆Arali no kuna, ni si na vhufhura,

u ḓo takuwa a ni imelela,

a ni pfufha nga zwo ni teaho.

₇Lupfumo lwaṋu lwe lwa fhalala

a lu nga vhuyi lwa vha tshithu lu tshi vhambedzwa na zwine Mudzimu a ḓo ni ṋea.

₈Edzonu vhudzisa vhuṱali ha vha kale,

ni pfe zwe vhokhotsi avho vha vhona.

₉Riṋe vhana vha mulovha, a ri ḓivhi tshithu;

vhutshilo hashu fhano fhasi a vhu yi thambo,

vhu fhira unga murunzi.

₁₀Litshani vhaṱali vha kale vha ni funze;

thetshelesani zwine vha amba, vha ri,

₁₁“Ṱhanga dzi nga mela hu si na maḓi?

Madzhesi a nga wanala hu si na maṱafa?

₁₂Maḓi a vhuya a xa,

ndi dzone dzi no thoma u puta,

dzi sa athu vhibva uri dzi hwivhiwe.”

₁₃Vha no hangwa Mudzimu vha nga ṱhanga dzenedzo:

Vha no nyadza Mudzimu a vha wani zwe vha fulufhela.

₁₄Zwine vha fulufhela ndi mahandana fhedzi;

zwi nga muḓali wa lubuvhi.

₁₅Vha ḓitika nga lubuvhi – lu nga vha tika naa?

Vha farelela muḓali – vha nga gogoḓela ngawo naa?

₁₆Vhavhi vha navha unga ṱhanga tshedzani,

minavhela ya ṱanganya tsimu,

₁₇midzi yayo ya tanda matombo,

ya ṱoka lutomboni.

₁₈Edzou tupula –

a hu na a no ḓo zwi ḓivha uri yo vhuya ya vha hone.

₁₉Vhonani, hoyo ndi wone muḓifho wa vhavhi:

Hu ḓa vhaṅwe vha vha dzhiela vhudzulo.

₂₀Hone vha sa solisei Mudzimu ha vha furaleli;

vhaitazwivhi na vhone ha vha tiki.

₂₁U ḓo ita uri ni dovhe ni see,

ni ṱavhe mukosi nga dakalo.

₂₂Vhane vha ni vhenga vha ḓo tou niwa nga ṱhoni;

mahaya a vhavhi a ḓo nyamalala.