JOBO 7

₁Vhutshilo ha muthu ndi nndwa ya mukumuṱelo,

ndi mushumo u lemelaho wa pfarela-u-lila;

₂vhu nga phuli i no swa nga ḓuvha ya si dzule murunzini,

vhu nga mushumi o lindela malamba awe.

₃Na nṋe ndo kovhelwa zwo raloho:

Miṅwedzi i tshi ḓi ṱanḓulukana a thi tshileli tshithu;

vhusiku vhu tshi ḓi tevhekana vhu ḓisa maṱungu fhedzi.

₄Ndi tshi yo lala ndi ri, “Ḽi tsha lini?”

A ḽi tshi, ndi lala ndi tshi vhumbuluwa,

mapfuvhi a vhuya a tswuka.

₅Muvhili wanga wo ḓala mbungu,

wo phapha makwanda,

lukanda lwanga lu bva vhulwa.

₆Maḓuvha anga a gidima u fhira nzhara ya muluki;

a fhela ndo fulufhuwa.

₇Mudzimu, u songo hangwa uri vhutshilo hanga vhu tou vha mufemo,

a thi tsha ḓo dovha nda vhona zwivhuya.

₈Zwino u a mmbona, a u tsha ḓo mmbona:

u tshi nṱoḓa u ḓo wana ndi si tsheeho.

₉Muthu a fa ha tsha vhuya;

u nga gole ḽine ḽa balangana, ḽa mbo ḓi nyamalala;

₁₀ha tsha humela nḓuni yawe;

u a hangwiwa.

₁₁Ndi zwine nda nga si fhumule!

Ndi amba ndi tshi pfa vhuṱungu;

ndi gungula ndi tshi ḽa mbilu.

₁₂Mudzimu, ndi mini u tshi dzula wo nndinda?

Kani ndi nṋe lwanzhe u tshi mmbetshela mukano?

Ndi nṋe buka ḽa lwanzhe kani?

₁₃Ndi tshi ri ndi lale ndi awele,

vhuṱungu vhu dzike,

₁₄u ntshushedza nga miloro,

wa nnyofhisa nga mabono.

₁₅Ngavhe ndi tshi tshipwa zwanga nda fa,

u fhira u tshila nda tambula.

₁₆Ndo ṱovhowa,

vhutshilo ho nnetisa;

nnditshe, hufha vhutshilo hanga vhu tshi tou vha mufemo.

₁₇Muthu ndi mini u tshi vhuya wa ḓidina ngae?

Ndi mini u tshi mu dzhenisa mbiluni?

₁₈Ḽi tshi tsha u a mu ṱola,

wa dzulela u mu linga.

₁₉A u edzou lavhelesa thungo nda mila-vho mare?

₂₀Arali ndo tshinya, Iwe ndo u itani?

Ndi amba Iwe mulindi wa vhathu!

Ndi mini u tshi nnyita tshipfulwa tshau?

Kani ndo no vha muhwalo wau?

₂₁A thi hangwelwi zwanga vhutshinyi hanga naa?

Vhuvhi hanga a u tsinyi iṱo wa vhu hangwa naa?

Hufha ndi tshi ḓo ṱuwa ndi tshi yo lala mavuni;

u ḓo nṱoḓa,

nda vha ndi si tsheeho!