JOBO 33

₁Zwino-ha Vho-Jobo,

nga vha thetshelese zwine nda amba,

vha kolongonye nḓevhe,

vha pfe zwoṱhe zwine nda bula.

₂Zwino ndi hone ndi tshi vho ṱoḓou amba;

maipfi anga a tou vha ṱhodzini ya lulimi lwanga;

₃zwine nda amba zwi bva mbiluni i si na vhufhura;

ndi khou amba ngoho ndi sa dzumbi zwine nda ḓivha.

₄Ndo vhumbwa nga Muya wa Mudzimu;

mufemo wa Ramaanḓaoṱhe u nṋea vhutshilo.

₅Nga vha mphindule arali vha tshi kona,

vha nkhanedze!

₆Nṋe na vhone ri a fana maṱoni a Mudzimu;

roṱhe ro ṅwatiwa kha vumba ḽithihi;

₇zwenezwo vha songo ntetemela;

vha songo tenda ndi tshi vha kunda nga u vha shushedza.

₈Ndo tou zwi pfa zwavhuḓivhuḓi vha tshi amba;

maipfi avho a kha ḓi pfala nḓevheni dzanga,

₉vha tshi ri,

“A thi na mulandu,

a tho ngo tshinya tshithu,

ndo ṱamba,

a thi na tshivhi,

₁₀Mudzimu u tou ita swiswimbadise uri a mmvutshele,

a nnyita swina.

₁₁U mpata milenzhe nga zwipato,

a londa vhuṱala hanga hoṱhe.”

₁₂Huno ndi a vha vhudza ndi ri,

vha tshi ralo vho khakha;

Mudzimu ndi muhulwane, u fhira muthu.

₁₃Ndi mini vha tshi mu gungulela,

vha ri ha fhinduli maipfi a muthu?

₁₄Mudzimu u a ḓi amba a dovha; vhathu vha ro sa mu thetshelesa.

₁₅Vhusiku, muthu ó eḓela e mbwanda nga khofhe,

ó lala vhulaloni hawe,

Mudzimu u amba nae nga miloro na mabono.

₁₆U a mu nuṅunedza nḓevheni,

a mu kaidza a ofha.

₁₇U itela uri a laṱe vhuvhi hawe,

a si ḓihudze,

₁₈ha vha u mu tshidza uri a si lovhe,

a si wetshele vhudzulavhafu.

₁₉U mu laṱisa nga u mu ladza thovhoni i fhisaho,

marambo a rema,

₂₀a si tsha tama zwiḽiwa,

na mapfura a si tsha mu ḓifhela,

₂₁muvhili wa ṱahala wa fhelela,

ha sala marambo fhedzi,

₂₂a sendela tshaloni,

ó livha kha vhaḓinḓa vha lufu.

₂₃Khamusi muruṅwa wa Mudzimu a nga ḓa a mu tika –

muṅwe wa vhaḓinḓa vha zwigidigidi,

a ḓivhadza muthu zwine a fanela u ita,

₂₄a mu pfela vhuṱungu a ri,

“Kha a vhofhololwe,

a si tsele dindini,

tshipfumelo ngetshi!”

₂₅Ndi hone muvhili wawe u tshi ḓo dovha wa vha muswa,

wa khwaṱha,

zwa nga zwiḽa a tshee muṱuku.

₂₆A tshi rabela, Mudzimu u ḓo mu takalela;

u ḓo vhona Mudzimu a pembela,

Mudzimu a sumbedza uri u a fulufhedzea,

a mu nakisela zwoṱhe.

₂₇Ndi hone a tshi ḓo imba vhathuni, a ri,

“Ndo tshinya,

a tho ngo ita zwi re zwone,

hone Mudzimu o nthwa nga ṱhamu ṱhukhu-ṱhukhu;

₂₈o ntshidza nda si dzhene tshaloni,

zwino ndi kha ḓi tshila.”

₂₉Zwoṱhe hezwo Mudzimu u zwi itela muthu,

a dovha a ḓi dovha,

₃₀a tshi itela u humisa muthu dindini,

uri a tshile.

₃₁Zwino Vho-Jobo, nga vha thetshelese

zwine nda amba,

vha ri tshete ndi ambe.

₃₂Hone arali vhe na zwine vha ṱoḓa u amba,

kha vha ambe;

ndi nga takala arali vha tshi wanala

vha si na mulandu.

₃₃Arali vha sa nkhanedzi,

vha ri tshete vha thetshelese,

ndi ḓo vha funza vhuṱali.