VHARANGAPHANḒA 7

₁Nga matshelo Jerubaali, ane ḽiṅwe a pfi Gidioni, na vhanna vhawe vhoṱhe vha fhinduwa, vha ṱoka mishasha tsini ha tshisima tsha Harodo. Mishasha ya Vhamidiani yo vha i govhani thungo ya devhula havho tshikwarani tsha More.

₂Muṋe washu a amba na Gidioni a ri, “Vhanna vhane wa vha navho ndi vhona vho ḓalesa, ndi nga si kumedze Vhamidiani zwanḓani zwavho, Vhaisraele vha nga ḓo nṱongela vha vhona unga vho ḓitshidza nga nungo dzavho. ₃Ḓivhadza vhathu u ri, ‘Muthu ane a pfa a tshi ofha nga a humele hayani, riṋe ri ḓo sala henefhano thavhani ya Gilibua.’ ” Ha mbo ṱuwa vhanna vha 22 000 vha humela hayani ha sala vha 10 000.

₄Muṋe washu a vhudza Gidioni a ri, “Vhanna vha tshee vhanzhi. Vha ise mulamboni, ndi ḓo u khethela vhone henefho. Munna ane nda mu sumba uri uyu o fanela u ṱuwa na iwe, u ḓo ya. Ane nda mu sumba uri ho ngo fanela u ṱuwa na iwe, a songo ya.” ₅Gidioni a ṱuwa na vhanna vha tsela mulamboni, Muṋe washu a mu vhudza a ri, “Muṅwe na muṅwe ane a kaswa maḓi nga lulimi unga mmbwa ó ima, u mu khethele thungo, a songo ṱangana na vhane vha nwa maḓi vho gwadama nga magona.” ₆Zwino vhe vha ka maḓi nga zwanḓa zwavho vha kaswa nga lulimi ndi 300 fhedzi, vhaṅwe vhoṱhe vho nwa vho tou gwadama nga magona.

₇Muṋe washu a vhudza Gidioni a ri, “Ndi ḓo ni lamukisa nda ita uri ni kunde Vhamidiani nga vhenevho vhanna vha 300 vhe vha nwa maḓi nga u tou kaswa. Vhaṅwe vhoṱhe vha vhudze vha humele hayani.” ₈Gidioni a vhudza Vhaisraele vhoṱhe uri vha humele hayani, a sia vha 300 vha dzhiela vhaḽa vhaṅwe mvuvhelo na phalaphala dzavho. Mishasha ya Vhamidiani yo vha i fhasi havho henefho govhani.

₉Vhusiku honoho Muṋe washu a laya Gidioni a ri, “Takuwa u yo dia maswina, ndi ḓo vha kumedza zwanḓani zwau. ₁₀Hone arali u tshi ofha u vha dia, tsela afho mishashani yavho ú na mushumi wau Phura. ₁₁U ḓo pfa zwine vha khou amba, ndi hone u tshi ḓo vha na nungo dza u vha dia.” Ndi hone Gidioni na mushumi wawe Phura vha tshi tsela lumemeni lwa mishasha ya maswina avho. ₁₂Vhamidiani na Vhaamaleke na tshakha dza phangani vho vha vho balangana na govha unga lutsinga lwa nzie, gamela dzavho dzo vha dzo anda unga muṱavha wa lwanzhe, dzi sa vhalei.

₁₃Gidioni a tshi swika mishashani, a pfa muṅwe munna a tshi khou vhudza khonani yawe zwe a lora, a tshi ri, “Ndo lora mukonde wa vhurotho ha bali wo kungulutshela mishashani yashu we dennde gii, ye levhu, fhasi huru.”

₁₄Khonani yawe ya fhindula ya ri, “Ndi pfumo ḽa Muisraele, Gidioni ṅwana wa Juashi! A hu na zwiṅwe zwine zwa amba zwone! Mudzimu o kumedza Vhamidiani na mmbi yashu yoṱhe zwanḓani zwawe.”

₁₅Musi Gidioni a tshi pfa muloro wa uyo munna na zwine wa amba, a wa nga magona a luvha Mudzimu. A humela mishashani ya Vhaisraele, a ri, “Takuwani! Muṋe washu o kumedza Vhamidiani zwanḓani zwaṋu!”

₁₆Gidioni a khethekanya vhanna vhawe vha 300 vha bva zwigwada zwiraru, munna muṅwe na muṅwe a mu ṋea phalaphala na mvuvhelo i re na ḓenzhe ngomu hayo. ₁₇A vha vhudza a ri, “Musi ndi tshi swika lumemeni lwa mishasha, ni ntsedze ni ite zwine nda ita. ₁₈Musi nṋe na tshigwada tshanga ri tshi lidza phalaphala, na inwi ni lidze dzaṋu ni tshi mona na mishasha, ni ṱavhe mukosi ni ri, ‘Ndi zwa Muṋe washu na Gidioni!’ ”

₁₉Gidioni na vhanna vhawe vha ḓana vha swika lumemeni lwa mishasha henefha nga tshifhinga tsha fumi, vhalindi vha tshi kha ḓi bva u ṱuwa. Ndi hone vha tshi lidza phalaphala, vha pwasha mvuvhelo dze vha vha vho dzi fara, ₂₀na zwiḽa zwiṅwe zwigwada zwivhili zwa ita nga u ralo. Vhoṱhe vho vha vho fara maḓenzhe nga tshanḓa tshamonde, phalaphala vhó dzi fara nga tshauḽa, vha ṱavha mukosi vha ri, “Pfumo ḽa Muṋe washu na ḽa Gidioni!” ₂₁Munna muṅwe na muṅwe a ima vhuimoni hawe u mona na mishasha, mmbi yoṱhe ya maswina vha shavha vha tshi khou ṱavha mukosi. ₂₂Hezwi vhanna vha Gidioni vha tshi khou lidza phalaphala, Muṋe washu a ita uri mmbi ya maswina vha rungane nga tshavho nga mafumo. Vha shavhela thungo ya Tsareda vha vhuya vha swika Bethe Shitha na muḓanani wa Abele Mihola na Tabathi.

₂₃Ha vho vhidzwa vhanna vha matsinde a Nafuthali na Ashere na zwigwada zwa Manase vhuvhili hazwo, vha pandamedza Vhamidiani. ₂₄Gidioni a ruma vhaḓinḓa mivhunduni yoṱhe ya Efraimi vha ri, “Tselani ngeno ni ṱanganedze Vhamidiani, ni linde maḓambuwo a Jorodani na miṅwe milambwana u swika Bethe Bara, uri Vhamidiani vha si i wele.” Vhanna vha Efraimi vha kuvhanganywa, vha linda maḓambuwo a Jorodani na miṅwe milambwana u vhuya u swika Bethe Bara. ₂₅Vha fara vharangaphanḓa vhavhili vha Vhamidiani, Orebe na Ziebe; Orebe vha mu vhulahela Tomboni ḽa Orebe, Ziebe vha mu vhulahela Bonḓeloni ḽa Ziebe. Vha ḓi pandamedza Vhamidiani vha tshi ya vha ḓisa ṱhoho ya Orebe na ya Ziebe ha Gidioni. Ene zwenezwo o vha o wela Jorodani.