VHARANGAPHANḒA 6

₁Vhaisraele vha dovha vha khakhela Muṋe washu, Ene a vha kumedza zwanḓani zwa Vhamidiani ha vhuya ha fhela miṅwaha miṱanu na mivhili. ₂Vhamidiani vho vha vha tshi fhira Vhaisraele nga nungo, Vhaisraele vha vha dzumbama mapakoni na huṅwe hu dzumbameaho mivhunduni. ₃Vhaisraele vhá vhuya vha lima, Vhamidiani ndi u ḓa vha lwa navho vhe na Vhaamaleke na tshakha dza phangani, ₄vha ṱoka mishasha henefho shangoni, vha tshinyadza zwiliṅwa u bva thungo ya devhula u swika shangoni ḽo tangaho Gaza. Vha kumba nngu na kholomo na donngi, vha si siele Vhaisraele tshine vha nga tshila ngatsho. ₅Vho vha vha tshi ḓa na kholomo dzavho na dennde, zwi tshi tou nga lutsinga lwa magerere nga u anda. Vhone na gamela dzavho ho vha hu si hone u anda. Vho ḓa vha phusukanya shango, ₆Vhaisraele vha si vhe na nungo dza u lwa navho. Ndi hone vha tshi ṱavhela Muṋe washu mukosi.

₇Vhaisraele vha tshi lilela Muṋe washu uri a vha farise vha lwe na Vhamidiani, ₈Muṋe washu a vha rumela muporofita, a vha ḓisela malaedzwa a tshi bva ha Muṋe washu Mudzimu wa Israele, a ri, “Ndo ni pfulusa vhupulini Egipita. ₉Ndo ni lamukisa kha Vhaegipita na kha vhathu vhe vha lwa na inwi fhano shangoni ḽino. Ndo vha thatha vha shavha musi inwi ni tshi swika, nda ni ṋea shango ḽavho. ₁₀Ndo ni vhudza uri ndi Nṋe Yahavee Mudzimu waṋu, ni songo luvha midzimu ya Vhaamori, vhane zwino na dzula shangoni ḽavho. Hone inwi a no ngo nthetshelesa.”

₁₁Muruṅwa wa Muṋe washu a ḓa Ofra a dzula fhasi ha muri muhulu we wa vha u wa Juashi, muṅwe munna wa mutupo wa Abiesere. Ṅwana wawe Gidioni o vha a tshi khou fhula goroi nga u dzumbamisa bonḓeloni, uri Vhamidiani vha si mu vhone. ₁₂Muruṅwa wa Muṋe washu a ḓisumbedza ene henefho a ri, “Yahavee u na iwe, u muhali wa maanḓa!”

₁₃Gidioni a mu fhindula a ri, “Pfarelo muṋe wanga, ndi mini ro itwa izwi zwoṱhe arali Muṋe washu e na riṋe? Zwimangadzo zwoṱhe zwe vhokhotsi ashu vha ri vhudza uri Muṋe washu o vha a tshi zwi ita, a tshi vha pfulusa Egipita, zwi ngafhi? Muṋe washu o ri laṱedza a ri litsha ri tshi fungiswa nga Vhamidiani.”

₁₄Ndi hone Muṋe washu a tshi mu lavhelesa a mu vhudza a ri, “Ṱuwa nga nungo dzau khulu dzine wa vha nadzo, u lamukise Vhaisraele zwanḓani zwa Vhamidiani. U ruṅwa nga Nṋe.”

₁₅Gidioni a fhindula a ri, “Ndi nga lamukisa hani Vhaisraele muṋe wanga? Mutupo wanga ndi wone muṱuku kha tsinde ḽa Manase nahone muṱani wa hashu ndi nṋe munyadzea.”

₁₆Muṋe washu a mu fhindula a ri, “U ḓo kona u zwi ita ngauri Nṋe ndi ḓo u farisa. U ḓo pwashekanya Vhamidiani zwi sa u konḓeli, zwa tou nga u pwashekanya munna muthihi fhedzi.”

₁₇Gidioni a fhindula a ri, “Arali vha tshi vhona ndo fanela, kha vha ntsumbedze tshiga tsha uri vhukuma ndi Muṋe washu a no khou amba na nṋe. ₁₈Vha songo ṱuwa ndi sa athu vha ṋekedza nduvho ya zwiḽiwa.”

Ene a ri, “Ndi ḓo dzula u swika u tshi vhuya.”

₁₉Ndi hone Gidioni a tshi ya nḓuni yawe, a bika mbudzana, a dzhia khilogiramu dza fumi dza vhukhopfu a baga vhurotho vhu si na mbilisa. A longa iyo ṋama mufaroni na muthotho u ngomu khalini, a zwi isa ha Muruṅwa wa Muṋe washu fhasi ha muri muhulu, a mu ṋea.

₂₀Muruṅwa wa Mudzimu a mu vhudza a ri, “Dzhia ṋama na vhurotho u zwi vhee hafha nṱha ha tombo heḽi, u shele muthotho nṱha hazwo.” Gidioni a ita nga u ralo. ₂₁Ndi hone Muruṅwa wa Muṋe washu a tshi onyolosa tshanḓa a kwama iyo ṋama na vhurotho nga ṱhodzi ya lubaḓa lwe a vha o lu fara, ha bva mulilo afho tomboni wa fhisa iyo ṋama na vhurotho. Muruṅwa a mbo ḓi ngalangala.

₂₂Ndi hone Gidioni a tshi zwi ḓivha uri we a mu vhona ndi Muruṅwa wa Muṋe washu, a tshenuwa a amba a ri, “Yowee Muṋe wa zwoṱhe Muṋe washu! Ndo vhona Muruṅwa wa Muṋe washu ro livhana zwifhaṱuwo!”

₂₃Huno Muṋe washu a amba nae a ri, “U ḓo vha na mulalo! U songo ofha tshithu. U nga si fe.” ₂₄Gidioni a fhaṱela Muṋe washu aḽiṱari henefho a ri i pfi, “Muṋe washu ndi mulalo”. (I kha ḓi wanala henefho Ofra wa mutupo wa Abiesere.)

₂₅Vhusiku honoho Muṋe washu a vhudza Gidioni a ri, “Dzhia mboho ya khotsi au na iṅwe mboho ya miṅwaha miṱanu na mivhili, u thuthe aḽiṱari ine khotsi au vha luvha Baali khayo, u reme thanda ya Ashera mudzimu wa musadzi i re tsini hayo, ₂₆u konou fhaṱela Nṋe Yahavee Mudzimu wau aḽiṱari yo teaho, nṱha ha tshikwara hetshi, u konou dzhia mboho ya vhuvhili u i fhise yoṱhe u ite tshiṱhavhelo ngayo, u dzhie khuni dza thanda ya Ashera ye wa rema u vhase ngadzo tshiṱhavhelo.”

₂₇Ndi hone Gidioni a tshi dzhia vhashumi vhawe vha fumi a ita zwe Muṋe washu a mu vhudza. O vha a tshi ofha vha muṱa wawe na vhathu vha muḓana wa hawe, ndi zwe a zwi ita vhusiku hu si masiari.

₂₈Musi ḽi tshi tsha, vhathu vha muḓana vha tshi vuwa, vha wana aḽiṱari ya Baali na thanda ya Ashera zwo reṅwa zwa wela fhasi, na iḽa mboho ya vhuvhili yo fhiselwa aḽiṱarini yo fhaṱwaho henefho. ₂₉Vha vhudzisana vha ri, “Izwi zwithu zwo itwa nga nnyi?” Vha tshi ṱoḓisesa vha wana zwó itwa nga Gidioni ṅwana wa Juashi. ₃₀Vha vhudza Juashi vha ri, “Nga vha ḓise ṅwana wavho fhano ri mu vhulahe! O pwashekanya aḽiṱari ya Baali a remekanya thanda ya Ashera i re tsini nayo.”

₃₁Huno Juashi a vhudza vhoṱhe havho vho mu vutshelaho a ri, “Ni imelela Baali naa? Ni khou mu lamulela naa? Muthu ane a mu imelela u ḓo vhulawa ḽi sa athu tsha. Arali Baali e mudzimu, mu litsheni a ḓilwele, hufha aḽiṱari yo pwashiwaho i yawe.”

₃₂U bva zwenezwo Gidioni a pfi ndi Jerubaali (Baali nga a ḓilwele) nge Juashi a ri, “Litshani Baali a ḓilwele; aḽiṱari yo pwashiwaho ndi yawe.”

₃₃Ndi hone vhoṱhe Vhamidiani na Vhaameleke na tshakha dza phangani vha tshi kuvhangana, vha wela mulambo wa Jorodani, vha ṱoka mishasha govhani ḽa Jesriele. ₃₄Muya wa Muṋe washu a dzhena kha Gidioni, a lidza phalaphala a ramba vhanna vha mutupo wa Abiesere uri vha mu tevhele. ₃₅A ruma vhaḓinḓa hoṱhe mashangoni mavhili a Manase a vha vhidza uri vha mu tevhele. A ruma vhaḓinḓa vha ya ha vha Ashere na Zebuloni na Nafuthali, na vhone vha ḓa vha baḓekana nae.

₃₆Ndi hone Gidioni a tshi amba na Mudzimu a ri, “Wo fulufhedzisa uri u ṱoḓa u lamukisa Vhaisraele nga nṋe. ₃₇Ndi zwone, ndi khou vhea vhukuse fhasi luvhatani lwa goroi. Arali nga matsheloni nda wana ṅwando wo wela kha uho vhukuse fhedzi, hone mavu o oma, ndi hone ndi tshi ḓo zwi ḓivha uri u ṱoḓa u lamukisa Vhaisraele nga nṋe.”

₃₈Ha mbo ḓi itea zwenezwo. Ḽi tshi tsha nga matshelo Gidioni a fhinduwa, a hamula uho vhukuse ha bva ṅwando sambelo ḽa ḓala nga maḓi. ₃₉Ndi hone Gidioni a tshi amba na Mudzimu a ri, “U songo ntsinyutshela, nnditshe ndi dovhe ndi ambe luthihi fhedzi. Litsha ndi dovhe ndi lingedze luthihi nga vhukuse. Zwino ita uri vhukuse vhu sale ho oma, mavu a ṋukale.” ₄₀Vhusiku honoho Mudzimu a ita zwenezwo. Ḽi tshi tsha nga matshelo vhukuse ho vha ho oma, ngeno mavu o ṋukala nga ṅwando.