VHARANGAPHANḒA 4

₁Musi Ehudu o no fa, Vhaisraele vha dovha vha khakhela Muṋe washu. ₂Zwenezwo Muṋe washu a litsha vha tshi kundwa nga Jabini khosi ya Vhakanana, we a vha a tshi vhusa muḓini wa Hatsoro. Mulangammbi wawe o vha e Sisera; ene o vha a tshi dzula Haroshethe wa Dzitshakha. ₃Jabini o vha e na gariki dza nndwa dza 900, dza tsimbi, a vhusa Vhaisraele nga tshiṱuhu, a vha kandeledza ha vhuya ha fhela miṅwaha ya 20. Vhaisraele vha lilela Muṋe washu uri a vha farise.

₄Zwino ho vha hu na Dibora mufumakadzi wa Laphidotho; o vha e muporofita, e murangaphanḓa wa Israele misi iyo. ₅O vha a tshi anzela u dzula fhasi ha Mutshevho wa Dibora vhukati ha Rama na Bethele mivhunduni ya Efraimi, Vhaisraele vha tshi ya henefho a tshi vha lamukanya. ₆Muṅwe musi a vhidzisa Baraka ṅwana wa Abinuamu wa muḓini wa Kedeshe kha ḽa Nafuthali, a amba nae a ri, “Muṋe washu Mudzimu wa Israele u khou u laya u ri, ‘Dzhia vhanna vha 10 000 kha matsinde a Nafuthali na Zebuloni u vha ise thavhani ya Thaboro. ₇Ndi ḓo ḓisa Sisera mulangammbi wa Jabini uri a lwe na iwe mulamboni wa Kishoni. U ḓo ḓa na gariki dzawe dza nndwa na vhahali, hone ndi ḓo mu kumedza zwanḓani zwau.’ ”

₈Baraka a fhindula a ri, “Ndi ḓo ya arali ra ṱuwa roṱhe, ra sa ṱuwa roṱhe a thi yi.”

₉Dibora a fhindula a ri, “Ndi zwone, ri ḓo ṱuwa roṱhe, hone u tshi ḓo kunda a u nga vhuelwi nga tshithu, ngauri Muṋe washu u ḓo kumedza Sisera zwanḓani zwa musadzi.” Dibora a takuwa a ya Kedeshe e na Baraka. ₁₀Baraka a vhidza matsinde a Zebuloni na Nafuthali uri vha ye Kedeshe, ha ḓa vhanna vha 10 000 vha mu tevhela. Dibora a ṱuwa nae.

₁₁Zwino Hebere wa Mukeni o vha o ṱoka mushasha tsini ha Kedeshe fhasi ha muri muhulu u re Tsaanaimi. O vha o ṱutshela vhaṅwe Vhakeni vhaḓuhulu vha Hobaba khaladzi a musadzi wa Mushe.

₁₂Musi Sisera a tshi pfa uri Baraka o gonya thavha ya Thaboro, ₁₃a kuvhanganya gariki dzawe dza nndwa dza 900, dza tsimbi, na vhanna vhawe vhoṱhe, a vha ruma vha tshi bva Haroshethe wa Dzitshakha vha ya mulamboni wa Kishoni.

₁₄Ndi hone Dibora a tshi vhudza Baraka a ri, “Tshimbilani! Muṋe washu u khou ni ranga phanḓa! Ṋamusi o ita uri ni kunde Sisera.” Ndi hone Baraka a tshi tsa thavha ya Thaboro e na vhanna vhawe vha 10 000. ₁₅Mmbi ya Baraka ya mbo vha tshoṱhela, Muṋe washu a kanganyisa Sisera, a vilinganya gariki dzoṱhe dza nndwa na vhanna vhoṱhe. Sisera a tsa kha gariki yawe ya nndwa a shavha nga milenzhe. ₁₆Baraka a pandamedza idzo dzigariki dza nndwa na mmbi vha livha Haroshethe wa Dzitshakha, mmbi yoṱhe ya Sisera ya vhulawa, ha si sale na munna na muthihi.

₁₇Sisera a shavhela mushashani wa Jaele, musadzi wa Hebere wa Mukeni, ngauri Jabini khosi ya Hatsoro o vha a tshi konana na muṱa wa Hebere. ₁₈Jaele a bva a yo ṱanganedza Sisera, a mu vhudza a ri, “Nga vha dzhene muṋe wanga, nga vha dzhene mushashani wanga. Vha songo ofha tshithu.” Ndi hone Sisera a tshi dzhena, Jaele a mu dzumba murahu ha lupila. ₁₉Sisera a vhudza Jaele a ri, “Nga vha nkele maḓi ndi nwe, ndi na ḓora.” Jaele a thivhulula mukhwama wa mukumba u re na mafhi, a mu fha a nwa, a dovha a mu dzumba. ₂₀Ndi hone Sisera a tshi vhudza Jaele a ri, “Kha vha ime muṋangoni wa mushasha, arali ha ḓa muthu a vha vhudzisa a ri, ‘Hu na muthu fhano?’ vhone vha ri, ‘A hu na.’ ”

₂₁Sisera o vha o neta lwe a ita na u fara khofhe khulu. Ndi hone Jaele a tshi dzhia nundo na khokho ya dennde, a ṋengeledza a ya khae a mu vhulaha nga u ombela khokho kha khumbakhumba yawe, ya phuletshedza ya vhuya ya dzhena mavuni. ₂₂Huno Baraka a tshi swika a tshi khou ṱoḓa Sisera, Jaele a bva a yo mu ṱanganedza, a mu vhudza a ri, “Nga vha ḓe fhano! Ndi ḓo vha sumbedza munna ane vha khou mu ṱoḓa.” Ndi hone Baraka a tshi dzhena na Jaele, a wana Sisera o rambalala fhasi, o fa, e na khokho ya dennde yo runga ṱhoho yawe ya vhuya ya phuletshedza.

₂₃Musi hoyo Mudzimu o ita uri Vhaisraele vha kunde Jabini khosi ya Vhakanana. ₂₄Vhaisraele vha ḓi wana nungo vha tshi ya hezwi vha tshi lwa na Jabini, vha vhuya vha mu lozwa tshoṱhe.