VHARANGAPHANḒA 3

₁Muṋe washu o sia dziṅwe tshakha afho shangoni a tshi itela u linga Vhaisraele vha sa athu bvaho pfumo kha ḽa Kanana. ₂Hezwo a zwi itela u gudisa murafho muṅwe na muṅwe wa Vhaisraele zwa nndwa, zwihulu avho vha sa athu vhuya vha bva pfumo. ₃Vho salaho afho shangoni ndi vha miḓi miṱanu ya Vhafilista, na Vhakanana vhoṱhe na Vhasidoni na Vhahivi vhe vha vha vha tshi dzula thavhani dza Libanoni u bva thavhani ya Baali Heremoni u swika Pharani ya Hamathi. ₄Vho vha vho sielwa u linga Vhaisraele, u vhona arali Vhaisraele vha tshi ḓo thetshelesa ndayo dze Muṋe washu a ṋea vhomakhulukuku wavho nga Mushe. ₅Ndi hone Vhaisraele vha tshi dzula vhukati ha Vhakanana na Vhahithi na Vhaamori na Vhapherisi na Vhahivi na Vhajebusi, ₆vha dzetshelana navho vha luvha midzimu yavho.

₇Vhaisraele vha mbo ḓi hangwa Muṋe washu Mudzimu wavho, vha mu khakhela, vha luvha zwitungulo zwa Baali na zwa Ashera. ₈Muṋe washu a sinyutshela Vhaisraele, a litsha Khushani Rishathaimi khosi ya Misopothamia-Devhula a vha kunda, a vha vhusa miṅwaha miṱanu na miraru. ₉Ndi hone Vhaisraele vha tshi lilela Muṋe washu, Ene a ruma munna wa u vha vhofholola. Hoyo munna ndi Othiniele, ṅwana wa Kenasi murathu wa Khalebe. ₁₀Muya wa Muṋe washu a ḓa khae, a vha murangaphanḓa wa Vhaisraele. Othiniele a bva pfumo, Muṋe washu a mu kumedza khosi ya Misopothamia. ₁₁Shango ḽa lala miṅwaha ya 40, Othiniele ṅwana wa Kenasi a vhuya a fa.

₁₂Vhaisraele vha dovha vha khakhela Muṋe washu. Nga zwenezwo Muṋe washu a ita uri Egiloni khosi ya Muaba a vhe na maanḓa a u kunda Vhaisraele. ₁₃Egiloni a baḓekana na Vhaamoni na Vhaameleke, vha kunda Vhaisraele vha thuba Jerikho, muḓi wa mitshevho. ₁₄Vhaisraele vha vhuswa nga Egiloni miṅwaha ya 18.

₁₅Vhaisraele vha lilela Muṋe washu, ene a ruma muṅwe munna uri a vha vhofholole. Hoyo munna ndi Ehudu, muḓuhulu wa Gera, wa tsinde ḽa Benyamini. O vha a tshi shuma nga tsha monde. Vhaisraele vha ruma Ehudu ha Egiloni khosi ya Muaba e na nduvho dza u mu ṋea. ₁₆Ehudu o vha o ḓifulela banga ḽa mutsheahoṱhe ḽa vhulapfu he ha vha vhu tshi nga ita hafu ya mitha. O vha o ḽi vhofhelela thungo ya tshauḽa tshawe fhasi ha zwiambaro zwawe. ₁₇Ehudu a dzhia idzo nduvho a dzi isa ha Egiloni. Egiloni o vha e muthu wa tshikikinini. ₁₈Musi Ehudu o no mu ṋea idzo nduvho, a vhudza vhanna vhe vha vha vho zwi hwala uri vha humele hayani. ₁₉Hone Ehudu ene muṋe a huma matomboni o vhaḓiwaho tsini ha Giligala, a vhuelela ha Egiloni, a mu vhudza a ri, “Thovhela, ndi na mafhungo a tshiphiri ane nda fanela u vha vhudza.”

Khosi ya vhudza vhalanda vhayo ya ri, “Ibvani ri sale ri roṱhe.” Vhone vha bvela nnḓa.

₂₀Musi khosi i tshee yo dzula henefho i yoṱhe pfamoni yayo i rotholelaho nṱha ṱhangani, Ehudu a ya khae a ri, “Ndi na malaedzwa avho a no bva ha Mudzimu.” Khosi ya takuwa ya ima nga milenzhe. ₂₁Ehudu a mbo ḓi ṱomola ḽiḽa banga siani ḽawe ḽa tshauḽa nga tshanḓa tshawe tsha monde, a mbo ḓi runga khosi thumbu ngaḽo. ₂₂Banga ḽa dzhena ḽoṱhe ḽe mbwanda, khathihi na khaḓa dzaḽo, mapfura a mbo ḓi ḽi tibedza. Ehudu a si ḽi ṱomole thumbuni ya khosi, ḽa phuletshedza nga murahu, vhukati ha milenzhe yawe. ₂₃Ndi hone Ehudu a tshi bvela nnḓa, a vala mahothi, a a khiela, ₂₄a ṱuwa. Vhalanda vha tshi ḓa vha wana mahothi o khielwa, vha vhona unga khosi i ngomu, i khou ḓithusa. ₂₅Vha lindela vha vhuya vha hanganea, vha vhona khosi i sa vuli vothi. Ndi hone vha tshi dzhia khii vha vula. Vha wana muṋe wavho o rambalala fhasi o fa.

₂₆Ehudu a shavha vha tshee vho lindela. A fhira matombo aḽa o vhaḓiwaho, a shavhela Seira. ₂₇Musi a tshi swika henefho mivhunduni ya Efraimi, a lidza phalaphala ya u ramba Vhaisraele uri vha bve pfumo, a vha ranga phanḓa vha tsa mivhundu. ₂₈Ehudu a ri, “Ntevheleni! Muṋe washu o kumedza maswina aṋu Vhamuaba zwanḓani zwaṋu.” Vha tsa vha tevhela Ehudu, vha thuba maḓambuwo a Jorodani a u wetshela Muaba, vha si tende na muthihi a tshi wetshela seli. ₂₉Musi wonoyo vha vhulaha 10 000 zwa vhahali vhahulu vha Muaba; a hu na na muthihi wavho we a ponyoka a shavha. ₃₀Ndi hone he Vhaisraele vha kunda Vhamuaba, ḽa lala ha vhuya ha fhela miṅwaha ya 80.

₃₁Murangaphanḓa o tevhelaho uyo o vha Shamugara ṅwana na Anathi. Na ene o lamukisa Vhaisraele; o vhulaha Vhafilista vha 600 nga muphidzho wa phulu.