GENESI 6

₁Musi vhathu vha tshi thoma u anda fhano fhasi, hu tshi bebwa na vhana vha vhasidzana, ₂vha no pfi vharwa vha Mudzimu vha vhona avho vhananyana vha vhathu vho naka, vha dzea ane vha tou mu funa. ₃Huno Muṋe washu a ri, “Muya wanga a u tsha ḓo dzula tshoṱhe muthuni; u a fa; maḓuvha awe a ḓo vha miṅwaha ya 120.”

₄Misi iyo, na ngavhuya, ho vha hu na miswonḓa fhano fhasi, nge vha no pfi vharwa vha Mudzimu vha ya ha vhananyana vha vhathu vha beba vhana navho. Avho vhana ndi vhone vhahali vha kale, vhanna vha bvumo.

₅Muṋe washu a vhona uri vhuvhi ha vhathu fhano fhasi ho no hulela, a vhona na uri mihumbulo yoṱhe i bvaho mbiluni dzavho yo dzula yo tshingamela vhuvhini fhedzi misi yoṱhe. ₆Muṋe washu a ḓisola zwe a vhuya a vhumba muthu fhano fhasi, mbilu yawe ya vhavha. ₇Zwenezwo Muṋe washu a ri, “Ndi ḓo fhedza vhathu vhe nda vha vhumba, ndi ḓo vha thutha fhano fhasi – vhathu na dziphukha, na zwivhumbwa zwi kokovhaho mavuni, na zwiṋoni, ngauri ndi a ḓisola ndi ri ndo zwi vhumbelani.” ₈We Muṋe washu a vha a tshi mu takalela ndi Nua fhedzi.

₉Mafhungo a Nua ngea:

Nua o vha e muvhuya; kha vhathu vha misi yawe o vha e ene fhedzi a sa solisei. O vha a tshi konana na Mudzimu. ₁₀Nua o vha e na vhana vhararu vha vhatuka, Semu na Hamu na Jafethe. ₁₁Zwino Mudzimu a vhona shango ḽo tshinyala, vhathu vha tshi huvhadzana. ₁₂Mudzimu a vhona shango ḽo tou tshinyala tshoṱhe, vhathu vhoṱhe fhano fhasi vhó tou ḓikumedza u tshinya.

₁₃Ndi hone Mudzimu a tshi amba na Nua a ri, “Ndi ḓo fhedza vhathu vhoṱhe; shango ḽo no ḓala u levhelana; vhukuma ndi ḓo lozwa zwoṱhe – vhathu na ḽifhasi. ₁₄Zwenezwo ḓifhaṱele tshikepe nga miri yo khwaṱhaho, u ite phera ngomu hatsho, u tshi fhome nga tshikonṱiri ngomu na nnḓa. ₁₅U tshi fhaṱe nga u rali: u navha hatsho tshi vhe mithara dza 150, vhuphara tshi vhe mithara dza 25, u ya nṱha tshi vhe mithara dza 15. ₁₆Itsho tshikepe u tshi fulele, u sie tshikhala tshi no ita hafu ya mithara vhukati ha ṱhanga na nga matungo. Kwea vothi nga matungo. U ite zwitizi zwiraru. ₁₇Nṋe nga ndoṱhe ndi ḓo ḓisa muḓalo wa maḓi kha ḽifhasi a lozwa zwoṱhe zwi tshilaho zwi re fhasi ha lutombo; zwi ḓo lovha zwoṱhe, vhathu na dziphukha. ₁₈Huno ndi ḓo vhofha mulanga na iwe; u ḓo dzhena tshikepeni – iwe na vhana vhau vha vhatuka, na musadzi wau na vhasadzi vha vhana vhau. ₁₉Ngomu tshikepeni u longe zwivhili-zwivhili zwa zwivhumbwa zwoṱhe zwi tshilaho – tshiduna na tshisadzi; u ḓitshidze nazwo. ₂₀Hu ḓo ḓa zwivhili-zwivhili zwa zwiṋoni zwa tshakha dzoṱhe, na zwa zwifuwo zwa tshakha dzoṱhe; zwi ḓo ḓa ha iwe uri zwi tshidzwe. ₂₁U longe tshakha dzoṱhe dza zwiḽiwa zwine zwa ḓo ḽiwa; u zwi vhulunge, zwi vhe zwiḽiwa zwau na zwazwo.”

₂₂Nua a ita zwoṱhe nga he Mudzimu a mu laya.