GENESI 41

₁Hó no fhela miṅwaha mivhili, Farao a lora muloro. O lora o ima tsini ha mulambo wa Nile, ₂a vhona kholomo ṱhanu na mbili dzavhuḓi dza tsadzi, dzo nonaho, dzi tshi bva mulamboni, dza fula ṱhangani. ₃Dza tevhelwa nga dziṅwe kholomo ṱhanu na mbili dza tsadzi, dzo vhifhaho, dzo ondaho, dzi tshi bva mulamboni wa Nile, dza ima tsini na dziḽa dziṅwe philiphilini ya mulambo. ₄Kholomo idzo dza u vhifha dzo ondaho dza mila kholomo ṱhanu na mbili dzavhuḓi dzo nonaho. Zwenezwo Farao a mbo ḓi karuwa.

₅A dovha a fara khofhe, a lora muloro wa vhuvhili. A lora a tshi khou vhona ṱhotshe ṱhanu na mbili dza thoro, dzo ḓalela dzo vhibva, dzo mela kha tsinde ḽithihi. ₆Ha tevhela dziṅwe ṱhotshe ṱhanu na mbili dza thoro dza mbo ḓi mela, dzi tsekene dzo fhiswa nga muya wa phangani. ₇Idzo ṱhotshe tsekene dza thoro dza mila dziḽa ṱhanu na mbili dzo ḓalelaho dzo vhibvaho. Zwenezwo Farao a karuwa, a wana uri ndi muloro.

₈Ḽi tshi tsha mbilu yawe ya dinalea, a vhidzisa vhotshifhe vhoṱhe vha mingome na vhaṱali vha Egipita. Farao a vha vhudza miloro yawe, hone ha si vhe na ane a kona u mu ṱalutshedza yone.

₉Ndi hone ndumi khulwane a tshi amba na Farao a ri, “Ṋamusi ndi khou elelwa vhutshinyi hanga! ₁₀Farao vho vhuya vha ri sinyutshela vha ri hoṋela dzhele, nṋe na mubiki muhulwane, ngei nḓuni ya mulangammbi wa pfamo ya musanda. ₁₁Vhuvhili hashu ra lora miloro vhusiku vhuthihi, muloro muṅwe na muṅwe ú na zwine wa amba. ₁₂Henefho ro vha ri na muṱhanngana wa Muheberu, phuli ya mulangammbi wa pfamo ya musanda. Ro mu anetshela miloro yashu, ene a ri ṱalutshedza yone, a tshi ṱalutshedza muṅwe na muṅwe zwine muloro wawe wa amba zwone. ₁₃Zwithu zwa bvelela nga he a ri ṱalutshedza: Nṋe ndo vhuedzedzwa mushumoni wanga, uḽa muṅwe munna a nembeledzwa.”

₁₄Ndi hone Farao a tshi vhidzisa Josefa, a ṱavhanya a bviswa dzhele, a vheulwa a ambara zwiṅwe zwiambaro, a ḓa phanḓa ha Farao. ₁₅Farao a vhudza Josefa a ri, “Ndo lora muloro, a hu na ane a kona u u ṱalutshedza. Hone ndo pfa hu tshi pfi inwi na vhudzwa muloro ni kona u u ṱalutshedza.”

₁₆Josefa a fhindula Farao a ri, “Izwo nṋe a thi zwi koni, ndi Mudzimu a no ḓo ṋea Farao ṱhalutshedzo i takadzaho.”

₁₇Ndi hone Farao a tshi vhudza Josefa a ri, “Ndo lora ndo ima khunzikhunzini ya mulambo wa Nile, ₁₈henefho mulamboni ha bva kholomo ṱhanu na mbili dzavhuḓi dza tsadzi dza u nona, dza fula ṱhangani. ₁₉Ha tevhela dziṅwe kholomo ṱhanu na mbili dza tsadzi dzo vhifhaho, dzo ondaho. Kholomo dzo vhifhaho zwingafho a thi athu vhuya nda dzi vhona shangoni ḽa Egipita. ₂₀Idzo kholomo dza u onda dzo vhifhaho dza mila dziḽa ṱhanu na mbili dza u nona dze dza ranga u bvelela. ₂₁Hone naho dzo no dzi mila a hu na we a vha a tshi nga ri dzo dzi mila; dzo ḓi sala dzo vhifha. Ndi hone ndi tshi karuwa. ₂₂Miloroni yanga ndo vhona na ṱhotshe ṱhanu na mbili dza thoro dzo vhibva lwa u naka, dzo mela kha tsinde ḽithihi. ₂₃Ha tevhela dziṅwe ṱhotshe ṱhanu na mbili dza mela dzo puta, dzo sekena, dzo tou swa nga muya wa phangani. ₂₄Idzo ṱhotshe dzo sekenaho dza mila dziḽa ṱhotshe ṱhanu na mbili dzavhuḓi. Izwo ndo zwi vhudza vhotshifhe vha mingome, hone a hu na we a kona u nṱalutshedza zwone.”

₂₅Josefa a fhindula Farao a ri, “Miloro ya Farao i amba zwithihi, i a fana. Mudzimu o dzumbululela Farao zwine a ṱoḓa u zwi ita. ₂₆Kholomo ṱhanu na mbili dzo nonaho ndi miṅwaha miṱanu na mivhili; ṱhotshe ṱhanu na mbili dza thoro dzavhuḓi na dzone ndi miṅwaha miṱanu na mivhili; miloro iyo yoṱhe i amba zwithihi. ₂₇Kholomo ṱhanu na mbili dzo vhifhaho dzo ondaho dze dza dzi tevhela ndi miṅwaha miṱanu na mivhili, u ḓi nga ṱhotshe ṱhanu na mbili dza thoro dzo sekenaho dzo swaho nga muya wa phangani: Ndi miṅwaha miṱanu na mivhili ya nḓala. ₂₈Ndi zwenezwo zwe nda vhudza Farao nda ri: Mudzimu o sumbedza Farao zwine a ṱoḓa u ita. ₂₉Hu khou ḓa miṅwaha miṱanu na mivhili ya nḓalo shangoni ḽoṱhe ḽa Egipita, ₃₀hone hu ḓo tevhela miṅwaha miṱanu na mivhili ya nḓala. Zwenezwo a hu tsha ḓo vhuya ha humbulwa uri ho vhuya ha vha na nḓalo kha ḽa Egipita; shango ḽi ḓo tou fa nga nḓala. ₃₁A hu na muthu ane a kha ḓi ḓo elelwa uri ho vhuya ha vha na nḓalo shangoni, ngauri nḓala i no ḓo tevhela i ḓo vha i tshi ofhisa. ₃₂Tshe tsha ita uri Farao vha lore luvhili mafhungo a fanaho, ndi uri mafhungo ayo Mudzimu o a elekanya a fhedza, nahone Mudzimu ha nga lengi u zwi ita.

₃₃“Zwino-ha, Farao nga vha ṱoḓe muthu wa ṱhalukanyo na vhuṱali, vha mu vhee uri a lange shango ḽa Egipita. ₃₄Farao nga vha vhee vhalavhelesi shangoni, vha dzhie tshipiḓa tshithihi kha zwiṱanu tsha khaṋo ya Egipita miṅwaha heyo miṱanu na mivhili ya nḓalo. ₃₅Vho fanela u kuvhanganya zwiḽiwa zwoṱhe zwa heyo miṅwaha ya nḓalo ine ya khou ḓa, vha vhulunge goroi i tshi langwa nga Farao, i vhulungwe miḓini uri vhathu vha ḓo kona u wana zwiḽiwa. ₃₆Hezwo zwiḽiwa zwi fanela u vhetshelwa thungo uri shango ḽoṱhe ḽi kone u ḽa miṅwaha miṱanu na mivhili ya nḓala ine ya ḓo wa fhano Egipita, uri shango ḽi si fe nga nḓala.”

₃₇Maano ayo Farao na magota awe vha vhona e avhuḓi. ₃₈Ndi hone Farao a tshi vha vhudzisa a ri, “Ri nga wanafhi muṅwe ane a nga uyu munna, ane muya wa Mudzimu wa dzula khae?” ₃₉Farao a vhudza Josefa a ri, “Vhunga Mudzimu o ni dzumbululela zwithu hezwo zwoṱhe, a hu na a re na ṱhalukanyo na vhuṱali unga inwi. ₄₀Inwi ni ḓo langa zwa pfamo yanga; vhathu vhanga vhoṱhe vho fanela u thetshelesa zwine na amba. Khuluṋoni hei ndi yone fhedzi i no ḓo ita uri nṋe ndi vhe muhulwane kha inwi.”

₄₁Farao a vhudza Josefa a ri, “Ndi khou ni vhea muvhusi wa shango ḽoṱhe ḽa Egipita.” ₄₂Ndi hone Farao a tshi bvula rinngi yawe ya luswayo kha munwe wawe a i longa kha munwe wa Josefa. A mu ambadza khanzu ya maṱeleṱele, mukuloni a mu ambadza geḓane ya musuku. ₄₃A mu namedza gariki ya tshanḓa tsha Farao, vhathu vha huwelela phanḓa hawe vha ri, “Ibvani nḓilani, ibvani nḓilani!” Ha vha u mu vhea mulangi wa shango ḽoṱhe ḽa Egipita.

₄₄Ndi hone Farao a tshi vhudza Josefa a ri, “Nṋe ndi Farao, hone kha ḽoṱhe ḽa Egipita a hu na ane a ḓo ita tshithu a songo vhudzwa nga inwi.” ₄₅Farao a ri Josefa u pfi Tsafunathi Phania, a mu ṋea Asinathi ṅwananyana wa Photifera tshifhe wa Oni, a vha musadzi wawe. Josefa a tandula shango ḽa Egipita.

₄₆Josefa o vha e na miṅwaha ya 30 a tshi thoma u shumela Farao khosi ya Egipita. Josefa a ṱuwa ha Farao a tandula shango ḽoṱhe ḽa Egipita.

₄₇Miṅwaha iyo miṱanu na mivhili ya nḓalo shango ḽa bveledza khaṋo khulu. ₄₈Josefa a kuvhanganya zwiḽiwa zwoṱhe zwe zwa waniwa miṅwaha iyo miṱanu na mivhili ya nḓalo kha ḽa Egipita, a zwi vhulunga miḓini. Muḓini muṅwe na muṅwe a vhea zwiḽiwa zwe zwa limiwa masimuni o u tangaho. ₄₉Josefa a vhulunga goroi nnzhi ya tou anda unga muṱavha wa lwanzhe; yo vha yo anda lwe a si tsha i ṅwala, ngauri yo vha i si na vhukono.

₅₀Musi miṅwaha ya nḓala i sa athu swika, Josefa a bebelwa vhana vhavhili vha vhatuka nga Asinathi ṅwananyana wa Photifera, tshifhe wa muḓi wa Oni. ₅₁Josefa a ri tanzhe ḽawe ḽi pfi Manase, a ri, “Ndi nge Mudzimu a ntonda uri ndi hangwe u tambula hanga, ndi hangwe na muṱa wa khotsi anga.” ₅₂Ṅwana wa vhuvhili wa mutuka a ri u pfi Efraimi, a ri, “Ndi nge Mudzimu a nṋea vhana shangoni ḽe nda tambula khaḽo.”

₅₃Miṅwaha iḽa miṱanu na mivhili ya nḓalo kha ḽa Egipita ya fhela, ₅₄ha thoma miṅwaha miṱanu na mivhili ya nḓala, nga he Josefa a amba. Ha wa nḓala na kha maṅwe mashango oṱhe, hone shangoni ḽoṱhe ḽa Egipita ho vha hu na zwiḽiwa. ₅₅Huno vhathu vhoṱhe vha Egipita vha tshi vho thoma u pfa nḓala, vha lilela Farao uri a vha ṋee zwiḽiwa. Farao a vhudza Vhaegipita vhoṱhe a ri, “Iyani ha Josefa ni ite zwine a ni vhudza.”

₅₆Musi nḓala yo no ṱanganya shango ḽoṱhe, Josefa a vula zwisiku, a rengisela Vhaegipita goroi, nge nḓala ya vha i khulu kha ḽoṱhe ḽa Egipita. ₅₇Vhathu vha mashango oṱhe vha ḓa Egipita u renga goroi kha Josefa, nge nḓala ya vha i khulu mashangoni oṱhe.