Josefa a tshi ṱalutshedza miloro ya ndumi na mubiki
1Ngavhuya, ndumi na mubiki vha khosi ya Egipita vha khakhela muṋe wavho khosi ya Egipita. 2Farao a sinyutshela ayo magota awe mavhili, ndumi khulwane na mubiki muhulwane, 3a vha valela nḓuni ya mulangammbi wa pfamo ya musanda, henefho he Josefa a vha o hoṋelwa hone. 4Mulangammbi wa pfamo ya musanda a vha kumedza Josefa, a vha londola. Huno musi o no ḓi vha maḓuvha vho valelwa, 5avho vhanna vhavhili, ndumi na mubiki wa khosi ya Egipita, vhe vha vha vho valelwa dzhele, vhoṱhe vha lora vhusiku honoho vhuthihi, muloro muṅwe na muṅwe ú na zwine wa amba. 6Musi Josefa a tshi ḓa khavho nga ḽa matshelo nga matsheloni, a vhona uri vho ṱungufhala. 7Zwenezwo a vhudzisa magota a Farao vhe vha vha vho valelwa nae nḓuni ya muṋe wawe a ri, “Zwifhaṱuwo zwaṋu zwo ṱungufhalelani ṋamusi?”
8Vhone vha fhindula vha ri, “Riṋe vhuvhili hashu ro lora miloro, hone a hu na ane a nga i ṱalutshedza.”
Josefa a vha vhudza a ri, “A thi ri ṱhalutshedzo dzi bva kha Mudzimu? Edzonou nnyanetshela miloro yaṋu.”
9Ndi hone ndumi khulwane i tshi vhudza Josefa muloro wayo. A mu vhudza a ri, “Muloroni wanga ndo vhona munḓirivhe; 10munḓirivhe wonoyo wo vha u na thavhi tharu. Wa ri u kulukusha, wa mbo ḓi fhufhumisa, wa vha na zwiṱokola zwa nḓirivhe dzo vhibvaho. 11Ndo vha ndo fara tshinwelo tsha Farao, nda dzhia idzo nḓirivhe nda dzi hamulela tshinweloni tsha Farao, nda mu ṋekedza a ṱanganedza.”
12Josefa a mu vhudza a ri, “Muloro uyo u amba hezwi: Thavhi idzo tharu ndi maḓuvha mararu. 13Musi ho fhela maḓuvha mararu Farao u ḓo ni hudza, a ni humisela mushumoni waṋu, na ṋekedza Farao tshinwelo a ṱanganedza, sa zwe na vha ni tshi ḓi zwi ita ni tshi kha ḓi vha ndumi yawe. 14Hone musi zwi tshi ni nakela ni nkhumbule ni nnyitele vhuthu; nnyambeleni ha Farao a mmvise hafhano dzhele. 15Ndi uri ndo tou hwalwa nga khombekhombe ndi tshi bva shangoni ḽa Vhaheberu, na fhano a hu na tshe nda tshinya zwine nda nga vhuya nda longwa dindini heḽino.”
16Zwino mubiki muhulwane a tshi vhona uri Josefa o ṋea ṱhalutshedzo i takadzaho, a vhudza Josefa a ri, “Na nṋe ndo lora muloro: Ndo vha ndo hwala zwirundu zwiraru zwa khekhe ṱhohoni. 17Tshirunduni tsha nṱha ho vha hu na tshakha dzoṱhe dza zwo bagelwaho Farao, hone zwiṋoni zwo vha zwi tshi khou ḽa izwo zwiḽiwa zwi re tshirunduni nṱha ha ṱhoho yanga.”
18Josefa a ri, “Muloro uyo u amba hezwi: Zwirundu zwiraru zwi amba maḓuvha mararu. 19Hu ḓo ri u fhela maḓuvha mararu Farao a ni humbula, a ni nembeledza kha thanda, zwiṋoni zwa ḽa ṋama yaṋu.”
20Zwino ḓuvha ḽa vhuraru ḽa vha ḽa mabebo a Farao, a itela magota awe oṱhe vhuṱambo, a vhofholola ndumi khulwane na mubiki muhulwane magota awe a tshi zwi vhona. 21A vhuedzedza ndumi khulwane mushumoni wayo, ya dovha ya ṋekedza Farao tshinwelo a ṱanganedza, 22hone mubiki muhulwane a nembeledzwa, sa zwe Josefa a vha vhudza a tshi vha ṱalutshedza miloro. 23Hone ndumi khulwane a yo ngo vhuya ya elelwa Josefa, yo mu hangwa.
