GENESI 31

₁Jakopo a pfa uri vhana vha Labani vho vha vha tshi khou ri, “Jakopo o dzhia zwoṱhe zwe zwa vha zwi zwa khotsi ashu; lupfumo lwe lwa vha lu lwa khotsi ashu lwo no vha lwawe.” ₂Jakopo a zwi vhona uri Labani ha tsha mu sedza sa kale. ₃Ndi hone Muṋe washu a tshi amba na Jakopo a ri, “Humela shangoni ḽa vhokhotsi au, mashakani au; Nṋe ndi ḓo vha na iwe.”

₄Jakopo a laedzela Lea na Rahele uri vha ḓe pfuloni he maṱambi awe a vha e hone. ₅A vha vhudza a ri, “Ndi vhona uri khotsi aṋu a vha tsha ntsedza sa kale, hone Mudzimu wa khotsi anga o ḓi vha na nṋe. ₆Inwi ni a zwi ḓivha uri ndo shumela khotsi aṋu nga nungo dzanga dzoṱhe, ₇hone khotsi aṋu vho mphura vha shandukisa kafumi muholo we ra langana. Naho zwo ralo Mudzimu ho ngo vha tendela u nkhuvhadza. ₈He vha ri, ‘Khwana dzi ḓo vha dzau,’ maṱambi oṱhe o mbo ḓi dzwala khwana; he vha ri, ‘Tsehana dzi ḓo vha dzau,’ maṱambi oṱhe o mbo ḓi dzwala tsehana. ₉Zwino-ha, ndi Mudzimu we a dzhia thakha ya khotsi aṋu a i fha nṋe.

₁₀“Nga tshifhinga tsha musi zwifuwo zwi tshi dzwala ndo vhuya nda lora ndi tshi khou sedza nda vhona mbokoṱo dzine dza hwela maṱambi dzi tshi nga ndi tseha na nkhwe kana thamaha. ₁₁Muruṅwa wa Mudzimu a amba na nṋe muloroni a ri, ‘Jakopo!’ Nṋe nda fhindula nda ri, ‘Ndi fhano!’ ₁₂Ene a ri, ‘Sedza u vhone uri mbokoṱo dzoṱhe dzi no hwela maṱambi ndi tseha na nkhwe na thamaha, ngauri ndo zwi vhona zwoṱhe zwine Labani a khou u ita. ₁₃Ndi Nṋe Mudzimu we wa mu vhona Bethele he wa tevhulela phuphu mapfura, wa nnyanela. Zwino ṱavhanya u pfuluwe shangoni ḽino, u vhuele shangoni ḽa haṋu.’ ”

₁₄Ndi hone Rahele na Lea vha tshi fhindula vha ri, “Riṋe ri kha ḓi vha na mukovhe kha ifa ḽa khotsi ashu lini? ₁₅A thi ri khotsi ashu vha vho ri sedza sa vhatsinda. Vho tou ri rengisa, vha dovha vha ḽa na thundu yo ri rengaho. ₁₆Vhukuma lupfumo lwoṱhe lwe Mudzimu a lu dzhiela khotsi ashu ndi lwashu na vhana vhashu. Zwino vhone nga vha ite zwe Mudzimu a vha vhudza.”

₁₇Ndi hone Jakopo a tshi namedza vhana vhawe na vhasadzi gamela, ₁₈a khada thakha yawe yoṱhe, a ṱuwa khathihi na thundu yawe yoṱhe ye a i wana Phadani Aramu, a humela ha khotsi awe Isaka shangoni ḽa Kanana.

₁₉Muṅwe musi Labani o ya u vheula nngu dzawe vhukuse, Rahele a tswa zwitungulo zwa khotsi awe. ₂₀Jakopo na ene a dovha a fhura Labani wa Muaramu nga u shavha a songo mu vhudza. ₂₁Ndi hone a tshi shavha na zwoṱhe zwe a vha e nazwo, a pfuka mulambo wa Yufuratha, a livha makwarani a Giliadi.

₂₂Huno nga ḓuvha ḽa vhuraru Labani a vhudzwa uri Jakopo o shavha. ₂₃Labani a ramba mashaka awe, a londa Jakopo a fhedza maḓuvha maṱanu na mavhili, a mu fara makwarani a Giliadi. ₂₄Zwenezwo Mudzimu a ḓa ha Labani wa Muaramu nga muloro vhusiku, a amba nae a ri, “U vhone, u songo vhuya wa sengisa Jakopo tshithu na tshithihi tshe a ita.” ₂₅Labani a tshi swika ha Jakopo a wana o akha dennde yawe thavhani dza Giliadi, Labani na mashaka awe na vhone vha ṱoka mishasha yavho henefho.

₂₆Ndi hone Labani a tshi amba na Jakopo a ri, “No ita mini? No mphura, nahone no hwala vhananyana vhanga na ṱuwa navho unga mathubwa a nndwani. ₂₇Ndi mini no tou ṋenga na mphura? Ndi mini ni songo mmbudza, uri ndi ni fhelekedze nga dakalo na nyimbo hu tshi lila mirumba na mbila? ₂₈A no ngo vhuya na nnditsha nda onesana na vhaḓuhulu vhanga na vhananyana vhanga. No ita zwithu zwa vhutsilu. ₂₉Nṋe ndi na maanḓa a uri ndi ni huvhadze; hone madekwe Mudzimu wa khotsi aṋu o mmbudza a ri, ‘U vhone, u songo vhuya wa sengisa Jakopo na tshithu na tshithihi tshe a ita!’ ₃₀Zwino ndi zwone, no ṱuwa nge na ṱuvha u humela muṱani wa khotsi aṋu; hone ndi mini no tswa midzimu yanga?”

₃₁Jakopo a fhindula Labani a ri, “Ndo vha ndi tshi ofha, ndi tshi ri vhone vha ḓo nnzhiela vhananyana vhavho nga khani. ₃₂Hone arali vha wana a re na midzimu yavho, onoyo kha a fe. Henefha maṱoni a mashaka ashu, nga vha ḓisedzele arali nṋe ndi na tshine tsha vha tshavho fhano; arali tshi hone nga vha tshi dzhie.” Jakopo a tshi ralo o vha a sa ḓivhi uri Rahele o tswa izwo zwitungulo.

₃₃Ndi hone Labani a tshi dzhena denndeni ya Jakopo na ya Lea na ya phuli mbili dza vhasadzi, a si wane tshithu. A ri u bva denndeni ya Lea a dzhena kha ya Rahele. ₃₄Zwino Rahele o vha o dzhia zwitungulo a zwi longa ngomu ha sala ya gamela yawe, a dzula nṱha hazwo. Labani a sedza hoṱhe denndeni a si wane tshithu. ₃₅Rahele a vhudza khotsi awe a ri, “Muṋe wanga, vha songo sinyuwa ndi sa koni u takuwa ndi tshi vha vhona; ndi khou vhona ṅwedzi.” Zwenezwo Labani a sedza zwitungulo a si vhuye a zwi wana.

₃₆Ndi hone hu tshi vho sinyuwa Jakopo, a ḽela Labani vhuhali. A ri, “Ndo tshinyani? Tshivhi tshe nda ita ndi tshifhio lune vha vhuya vha tou nnzwima? ₃₇Vhunga zwino vho guduba thundu yanga yoṱhe, tshe vha tshi wana tshi re tsha muṱani wavho ndi tshifhio? Kha vha tshi vhee hafha phanḓa ha mashaka ashu, vha vhe vhone vha no haṱula riṋe vhavhili. ₃₈Ndo no ḓi dzula navho nda fhedza miṅwaha ya 20 zwino. Nngu dzavho na mbudzi dzavho dzo vha dzi sa fholodzi, na thutha dza maṱambi avho a tho ngo vhuya nda dzi ḽa. ₃₉Zwifuwo zwo fhafhulwaho nga zwivhanda a tho ngo vhuya nda vha ḓisela zwone; nṋe ndi nṋe we nda lifha. Vhone vho nndifhisa zwoṱhe zwe zwa tswiwa vhusiku kana masiari. ₄₀Ndo vha ndi tshi swa nga ḓuvha masiari, vhusiku ndi tshi pfa phephe, ndi tshi lala ndo linda ndi sa fari khofhe. ₄₁Zwa ḓi ralo ha vhuya ha fhela miṅwaha ya 20 ndi mushumi wavho. Ndo vha shumela miṅwaha ya 14 uri ndi fhiwe vhananyana vhavho vhavhili, miṅwaha miṱanu na muthihi ndi tshi shuma uri ndi wane maṱambi a nngu dzavho, vhona vha ḓi shandukisa muholo wanga lu sa gumi. ₄₂Ngavhe Mudzimu wa khotsi anga, Mudzimu wa Abrahamu, Mudzimu a ofhisaho wa Isaka, a si ime na nṋe, vho vha vha tshi ḓo ri ndi ṱuwe ndi si na tshithu. Hone Mudzimu o vhona vhuleme hanga na u ḓinetisa ndi tshi shuma nga zwanḓa zwanga, ndi zwe madekwe a nnyimelela.”

₄₃Labani a fhindula Jakopo a ri, “Vhasadzi havha ndi vhananyana vhanga, vhana havha ndi vhana vhanga, maṱambi haya a nngu ndi anga. Zwoṱhe zwine na zwi vhona ndi zwanga. Zwino ṋamusi ndi nga huvhadza hani avha vhananyana vhanga, kana vhana vhe vha vha beba? ₄₄Ndi khwiṋe ri tshi vhofha mulanga, nṋe na inwi, ri imise tshihumbudzi tshine tsha ḓo ri humbudza mulanga uyo.”

₄₅Ndi hone Jakopo a tshi dzhia tombo a ḽi imisa ḽa vha tshihumbudzo. ₄₆A vhudza mashaka awe a ri, “Kuvhanganyani matombo.” Vhone vha dzhia matombo vha a khokha, vha ḽa henefho he vha khokha matombo. ₄₇Labani nga Tshiaramu a ri iyo thulwi i pfi Jegara Sahadutha (Thulwi ya vhuṱanzi), Jakopo nga Tshiheberu a ri i pfi Galiede (Thulwi ya vhuṱanzi). ₄₈Labani a ri, “Hei thulwi ndi ṱhanzi yanga na inwi ṋamusi.” Ndi zwe ya pfi Galiede. ₄₉Ḽiṅwe yo vha i tshi pfi Mitsipha (Tshiingamo), nge Labani a dovha a ri, “Ngavhe Yahavee a tshi ri londola nṋe na inwi musi ri kule na kule. ₅₀Arali na tambudza vhananyana vhanga kana na dzea vhaṅwe vhasadzi, nangwe hu tshi ḓo vha hu si tshee na muṅwe a re na riṋe, ḓivhani uri Mudzimu ndi ṱhanzi yanga na inwi.”

₅₁Labani a dovha a vhudza Jakopo a ri, “Thulwi iyi ndi tshihumbudzo tshashu nṋe na inwi tshe nda tshi ṱoka tsha ima, ngetshi. ₅₂Thulwi hei ndi ṱhanzi, tshihumbudzo hetshi na tshone ndi ṱhanzi ya uri nṋe a thi nga fhiri thulwi hei nda pfukela siani ḽaṋu nda ḓa nda ni huvhadza, na uri inwi a ni nga fhiri thulwi hei na tshihumbudzo hetshi na pfukela siani ḽanga na ḓa na nkhuvhadza. ₅₃Ngavhe mudzimu wa Abrahamu na mudzimu wa Nahoro, midzimu ya vhokhotsi avho, i tshi vha yone vhahaṱuli vhashu, nṋe na inwi.” Ndi hone Jakopo a tshi ana nga dzina ḽa Mudzimu a ofhisaho wa khotsi awe Isaka. ₅₄A ṋekedza tshiṱhavhelo henefho makwarani, a vhidza mashaka awe uri vha ḓe vha ḽe nae. Musi vho fhedza u ḽa vha eḓela henefho. ₅₅Ḽi tshi tsha hu tshee nga matsheloni Labani a onesana na vhaḓuhulu vhawe na vhananyana vhawe a vha shudufhadza. Ndi hone a tshi ṱuwa a humela hayani.