GENESI 30

₁Musi Rahele a tshi vhona uri ha bebeli Jakopo vhana, a thoma u vhivha mukomana wawe. A vhudza Jakopo a ri, “Nga vha mphe vhana; vha sa mpha ndi a fa!”

₂Jakopo a mu sinyutshela a ri, “Kani ndi nṋe Mudzimu? Ndi Ene we a ni kundisa u wana vhana!”

₃Rahele a ri, “Biliha phuli yanga ya musidzana ngoyu. Nga vha mu dzhenise nḓuni a mmbebele vhana, uri na nṋe ndi kone u fhaṱa-vho muṱa ngae.” ₄Ndi hone Rahele a tshi ṋea Jakopo phuli yawe Biliha a vha musadzi wawe. Jakopo a mu dzhenisa nḓuni, ₅a vhifha muvhilini, a mu bebela ṅwana wa mutukana. ₆Rahele a ri, “Muṋe washu o ntsengela; o thetshelesa tshililo tshanga, a nṋea ṅwana wa mutukana.” Ndi zwe a ri u pfi Dani. ₇Biliha phuli ya Rahele a dovha a vhifha muvhilini a bebela Jakopo mutukana wa vhuvhili. ₈Rahele a ri, “Ndo lwa nndwa khulu na mukomana wanga, nda kunda.” Ndi zwe a ri u pfi Nafuthali.

₉Lea a tshi vhona uri o no ima u wana vhana, a dzhia Zilipha phuli yawe ya musidzana a mu ṋea Jakopo uri a vhe musadzi wawe. ₁₀Zilipha phuli ya Lea ya bebela Jakopo ṅwana wa mutukana. ₁₁Lea a ri, “Ndi mashudu mangafhani!” a ri u pfi Gadi. ₁₂Zilipha phuli ya Lea ya bebela Jakopo mutukana wa vhuvhili. ₁₃Lea a ri, “Ndo takala hani! Vhasadzi vha ḓo ri ndi na mashudu.” A ri u pfi Ashere.

₁₄Ḽiṅwe ḓuvha nga tshifhinga tsha musi hu tshi kaṋiwa goroi, Rubeni a bva a ya masimuni, a wana mitshelo, a i fha mme awe Lea. Rahele a amba na Lea a ri, “Nga vha mphe-vho mitshelo ya ṅwana wavho.”

₁₅Lea a mu fhindula a ri, “Zwe na nnzhiela munna a zwo ngo eḓana naa? Zwino ni ṱoḓa u dzhia na mitshelo ya ṅwananga?”

Rahele a ri, “Ndi zwone, Vho-Jakopo vha ḓo vha dzhenisa nḓuni vhusiku ha ṋamusi, tenda vhone vha mpha mitshelo ya ṅwana wavho.”

₁₆Jakopo a tshi vhuya masimuni nga madekwana, Lea a yo mu ṱanganedza, a ri, “Vha fanela u nnzhenisa nḓuni, ndo vha renga nga mitshelo ya ṅwananga.” Vhusiku honoho Jakopo a dzhenisa Lea nḓuni.

₁₇Mudzimu a thetshelesa thabelo ya Lea, a mbo ḓi vhifha muvhilini, a bebela Jakopo ṅwana wa vhuṱanu wa mutukana. ₁₈Lea a ri, “Mudzimu o mpfufha nge nda fha munna wanga phuli yanga ya musidzana.” Ndi zwe a ri ṅwana u pfi Isakhara. ₁₉Lea a dovha a vha muthu wa thovhela, a bebela Jakopo ṅwana wa vhuṱanu na vhuthihi wa mutukana. ₂₀Zwino Lea a ri, “Mudzimu o mpha tshifhiwa tsha mutengo muhulu. Zwino ndi hone munna wanga a tshi ḓo nkhulisa, nge nda mu bebela vhatuka vhaṱanu na muthihi.” A ri ṅwana u pfi Zebuloni. ₂₁Ngavhuya a beba musidzana a ri u pfi Dina.

₂₂Ndi hone Mudzimu a tshi elelwa Rahele; a thetshelesa thabelo yawe, a ita uri a bebe ṅwana. ₂₃Rahele a vhifha muvhilini, a beba mutukana, a ri, “Mudzimu o ṱusa u nyadziwa hanga.” ₂₄A ri uyo ṅwana u pfi Josefa, a ri, “Ngavhe Muṋe washu a tshi dovha a nnyengedza muṅwe mutukana.”

₂₅Musi Rahele o no beba Josefa, Jakopo a amba na Labani a ri, “Kha vha litshe ndi ṱuwe ndi vhuelele ha hashu. ₂₆Kha vha nṋee vhasadzi vhanga na vhana vhanga vhe vha mpha nge nda tou vha shumela, ndi kone u ṱuwa. Vhone vha a ḓivha uri ndo vha shumela zwingafhani.”

₂₇Labani a mu fhindula a ri, “Arali ni tshi ntakalela, dzulani na nṋe. Ndo vhonisa nda pfa uri Yahavee o ntshudufhadza a tshi itela inwi.” ₂₈A dovha a ri, “Mmbudzeni malamba ane na a ṱoḓa, ndi ḓo ni fha.”

₂₉Jakopo a mu vhudza a ri, “Vha a zwi ḓivha uri ndo vha shumela hani, na uri thakha yavho ndi tshi i londola yo anda hani. ₃₀Zwiṱukuṱuku zwe vha vha vhe nazwo ndi sa athu ḓa zwo anda nga maanḓa, nahone Muṋe washu o vha shudufhadza hoṱhe he nda vha ndi hone. Hone zwino, muṱa wanga ndi ḓo u shumela lini?”

₃₁Labani a mu vhudzisa a ri, “Ndi ni fhe mini?” Jakopo a fhindula a ri, “Vha songo mpha tshithu. Hone arali vha nnyitela tshithu hetshi tshithihi fhedzi, ndi ḓo ḓi londola maṱambi a nngu dzavho nda dzi lisa: ₃₂Kha vha ri ndi tandule maṱambi a nngu dzavho ṋamusi ndi khethe khwana kana thamahana, ngwana dzoṱhe tswana na mbudzi dzoṱhe thamahana kana khwana. Dzenedzo dzi ḓo vha dzone malamba anga. ₃₃U fulufhedzea hanga hu ḓo nṱanzilela nga tshifhinga tshi ḓaho, musi vha tshi sedza muholo we vha nkholela. Mbudzi iṅwe na iṅwe ine nda vha nayo ine ya si vhe khwana kana thamahana, kana ngwana ine ya si vhe tswana nga i pfi ndo i tswa.”

₃₄Labani a ri, “Ro pfana. Nga zwi tou ralo.”

₃₅Hone musi wonoyo Labani a mbo ḓi khetha mbokoṱo dzoṱhe tseha kana thamaha na mbudzi dzoṱhe dza tsadzi khwana kana thamahana, dzoṱhe dze dza vha dzi na muvhala mutshena, na ngwana dzoṱhe tswana, a ri dzi liswe nga vhana vhawe vha vhatuka. ₃₆A ṱuwa nadzo a fara lwendo lwa maḓuvha mararu, Jakopo ene a sala a tshi londola nngu dza Labani.

₃₇Jakopo a dzhia matavhi maṋu a mupopuliri na mualimondo na mupulatani a tsheṱa mitalo mitshena khao nga u kwatula makwati, ha vhonala thanda tshena ya nga ngomu ya matavhi. ₃₈A vhea matavhi ayo o kwatulwaho mikungwani ya maḓi na hoṱhe hune dza nwa hone, uri a livhane na nngu musi dzi tshi ḓa u nwa maḓi, ₃₉thutha dza hwela tsadzi henefho phanḓa ha ayo matavhi. Dza dzwala ngwana tsehana kana khwana kana thamahana. ₄₀Jakopo a khethela ngwana thungo, hone a ita uri dziṅwe dzoṱhe dzi lavhelese tsehana na tswana dze dza vha dzi dza Labani. Nga u ralo a khetha dzawe nngu a si tende dzi tshi ṱangana na dza Labani. ₄₁Ho vha hu tshi ri musi tsadzi dzi re na ḓafu dzo siama, Jakopo a vhea aḽa matavhi mikungwani phanḓa hadzo uri dzi hwelane dzó sedza matavhi, ₄₂hone arali izwo zwifuwo zwi zwirole, o vha a sa vhei matavhi phanḓa hazwo. Zwenezwo zwirole zwo vha zwa Labani, zwi re na ḓafu zwa vha zwa Jakopo. ₄₃Ngauralo Jakopo a pfuma, a vha na maṱambi mahulu a nngu na phuli dza vhasidzana na dza vhanna, na dzigamela na dzidonngi.