ESRA 4

₁Musi maswina a Juda na Benyamini a tshi pfa uri mathubwa a khou fhaṱela Muṋe washu Mudzimu wa Israele thembele, ₂a ḓa ha Zerubabele na ha vhaṋe vha miṱa a ri, “Litshani ri ni farise u fhaṱa, ngauri na riṋe Mudzimu waṋu ri a mu ṱoḓa unga inwi, ro vha ri tshi ḓi mu ṋekedza nduvho u bva zwenezwiḽa hu tshi kha ḓi vhusa Esarahadoni khosi ya Ashuru we a ri ḓisa fhano.”

₃Ndi hone Zerubabele na Joshua na vhaṋe vha miṱa ya Israele vhoṱhe vha tshi fhindula vha ri, “A ri funi inwi ni tshi ri farisa u fhaṱela Mudzimu washu thembele. Riṋe ri roṱhe ri ḓo i fhaṱela Muṋe washu Mudzimu wa Israele, ri tshi tevhedza ndaela ya Khoreshe khosi ya Pheresia.”

₄Zwenezwo tshakha dzo tangaho vhathu vha Juda dza bva dza yo kula nungo dzavho dza ita na u vha shushedza uri vha songo tsha isa phanḓa vha tshi fhaṱa. ₅Vha thola na vhaeletshedzi vha u vha piringanya. Izwo vho zwi ita misi yoṱhe ya musi hu tshi vhusa Khoreshe khosi ya Pheresia na musi hu tshi vhusa Dariosi khosi ya Pheresia.

₆Musi hu tshi thoma u vhusa Serekesese vha pomoka vhathu vha Juda na vha Jerusalema.

₇Musi hu tshi vhusa Arathakhesese khosi ya Pheresia, Bishilamu na Mithiredathi na Tabiele na khonani dzavho dzoṱhe vha ṅwalela Arathakhesese luṅwalo. Ulwo luṅwalo lwo ṅwalwa nga kuṅwalele kwa Tshiaramu na nga luambo lwa Tshiaramu.

₈Rehumi muvhusi na Shimishai muṅwaleli vha ṅwalela khosi Arathakhesese vha tshi pomoka Jerusalema vha ri,

₉“Luṅwalo ulu lu bva kha Rehumi muvhusi na Shimishai muṅwaleli na vhashumisani vhavho vhoṱhe na vhahaṱuli na vhavhusi vhahulwane vha no bva Pheresia na Erekhe na Babele, na Vhaelamu vha Shushani, ₁₀na vhaṅwe vhathu vhe vha pfuluswa nga muhulwane, muhulisea Ashurubaniphala, a vha dzudza miḓini ya Samaria na huṅwe vunduni ḽa Seli-ha-Yufuratha.”

₁₁Kopi ya luṅwalo lwe vha mu ṅwalela ngei:

“Lu ya ha khosi Arathakhesese, lu bva ha vhalanda vhavho, vhanna vha Seli-ha-Yufuratha.

₁₂“Thovhele nga vha ḓivhe uri Majuda vhe vha ḓa kha riṋe vha tshi bva ha vhone vho ya Jerusalema nahone vha khou vusa muḓi houḽa muvhi wa mashandukwa. Vha khou vusa mitsheṱo, na miteo i khou tewa. ₁₃Tshiṅwe hafhu, thovhele nga vha zwi ḓivhe uri arali uyo muḓi wa vuswa mitsheṱo yawo ya fhaṱwa, a hu tsha ḓo thelwa mithelo, nduvho a dzi tsha ḓo bviswa; zwenezwo gwama ḽa musanda ḽi ḓo fhungudzea. ₁₄Zwino vhunga riṋe ri tshi ḽa zwi bvaho pfamoni, ri vhona zwi songo fanela ri tshi vhona khosi i tshi nyadziwa, ri khou swikisa mafhungo haya uri ri ḓivhadze vhone vhamusanda, ₁₅hu londoloswe kha maṅwalwa a mafhungo a kale a vhomakhulu wavho. Kha maṅwalwa eneo vha ḓo wana uri muḓi hoyu ndi wa mashandukwa, vha dina mahosi na mavundu, ndi fhethu ha muvhango u bva tsha kale na kale. Ndi zwe uyo muḓi wa phusukanywa. ₁₆Ri ḓivhadza vhothovhele uri arali muḓi hoyo wa fhaṱwa, mitsheṱo yawo ya vuswa, vha ḓo sala vha si na shango Seli-ha-Yufuratha.”

₁₇Khosi ya vha ṅwalela luṅwalo ya fhindula ya ri,

“Luṅwalo ulu lu ya ha Rehumi muvhusi, na Shimishai muṅwaleli na vhashumisani vhavho vhoṱhe vha no dzula Samaria na huṅwe-vho Seli-ha-Yufuratha. Mulalo!

₁₈“Luṅwalo lwe na nṅwalela lwo ṱalutshedzwa, nda vhalelwa lwone. ₁₉Ndo bvisa ndaela, ha londoloswa, ha wanala uri nangoho vhathu vha uyo muḓi vha endela u vutshela mahosi tsha kale na kale nahone ho ḓi vha fhethu ha vhathu vha muvhango na mifhirifhiri. ₂₀Jerusalema ho vhuya ha vha na mahosi a maanḓa a tshi vhusa ḽoṱhe ḽa Seli-ha-Yufuratha, a tshi thelisa vhathu mithelo na nduvho dza tshakha-tshakha. ₂₁Zwino bvisani ndaela i ye ha avho vhanna, hu pfi vha litshe u shuma uri muḓi uyo u si tsha vuswa ndi vhuye ndi vha vhudze. ₂₂Ni songo litsha ayo mafhungo, zwi sa ḓo ṋaṋa u vhaisa thovhele.”

₂₃Musi Rehumi na Shimishai muṅwaleli na vhashumisani navho vha tshi kha ḓi tou bva u vhalelwa luṅwalo lwa khosi Arathakhesese, vha mbo ḓi takuwa vha livha ha Majuda Jerusalema vha vha litshisa nga khani u fhaṱa.

₂₄Ngauralo mushumo wa nnḓu ya Mudzimu i re Jerusalema wa litshiwa u swika ṅwaha wa vhuvhili wa Dariosi khosi ya Pheresia.