EKISODA 7

₁Muṋe washu a fhindula Mushe a ri, “Vhona, ndi ḓo ita uri u nge mudzimu u na Farao, Aroni mukomana wau u ḓo nga muporofita wau. ₂Iwe tshau ndi u mu vhudza zwoṱhe zwine Nṋe nda u vhudza, ene Aroni mukomana wau u ḓo vhudza Farao uri a litshe Vhaisraele vha pfuluwe shangoni ḽawe. ₃Nṋe muṋe ndi ḓo konḓisa mbilu ya Farao nda ita zwiga zwinzhi na zwimangadzo shangoni ḽa Egipita. ₄Farao a nga si ni thetshelese, zwenezwo ndi ḓo tsikeledza Egipita nga tshanḓa tsha maanḓa nda lifhedza, nda pfulusa matsinde a vhathu vhanga Vhaisraele, vha ṱuwa shangoni ḽa Egipita. ₅Vhaegipita vhoṱhe vha ḓo zwi ḓivha uri ndi Nṋe Yahavee musi ndi tshi angaladza tshanḓa tshanga nda rwa Egipita, nda pfulusa Vhaisraele vhukati havho.” ₆Mushe na Aroni vha thetshelesa, vha ita zwenezwo zwe Muṋe washu a vha vhudza. ₇Mushe o vha e na miṅwaha ya 80, Aroni e na miṅwaha ya 83 musi vha tshi amba na Farao.

₈Muṋe washu a amba na Mushe na Aroni a ri, ₉“Arali Farao a ni vhudza uri ni ite maḓembe, u vhudze Aroni uri a dzhie mbaḓa yawe a i pose fhasi phanḓa ha Farao, i ḓo shanduka ya vha ḽiṋowa.”

₁₀Ndi hone Mushe na Aroni vha tshi takuwa vha ya ha Farao, vha ita nga he Muṋe washu a vha laya ngaho. Aroni a posa mbaḓa yawe fhasi phanḓa ha Farao na magota awe, ya shanduka ya vha ḽiṋowa. ₁₁Farao na ene a vhidzisa vhaṱali vhawe na dziṅanga, na vhone vha ita zwenezwo nga madambi avho, ₁₂vha posa mbaḓa dzavho fhasi dza shanduka dza vha dziṋowa. Hone lubaḓa lwa Aroni lwa mila mbaḓa dza dziṅanga. ₁₃Naho zwo ralo Farao a ḓi ita tshipimbi, a si thetshelese Mushe na Aroni, sa zwe Muṋe washu a dzula o amba.

₁₄Ndi hone Muṋe washu a tshi vhudza Mushe a ri, “Farao u na tshipimbi. U hana u litsha vhathu vha ṱuwa. ₁₅U fhindutshele khae musi a tshi ya mulamboni wa Nile, u mu lindele khunzikhunzini ya mulambo. U ṱuwe wo fara luḽa lubaḓa lwe lwa shanduka lwa vha ḽiṋowa. ₁₆U mu vhudze u ri, ‘Yahavee Mudzimu wa Vhaheberu o nthuma ha iwe uri ndi u vhudze ndi ri: Litsha vhathu vhanga vha ṱuwe vha ye phangani u nnduvha. Hone u swika zwino a u athu thetshelesa.’ ₁₇Mafhungo a Yahavee ngea, u ri, ‘U ḓo tenda uri ndi Nṋe Yahavee nga hezwi: ndi ḓo rwa maḓi a mulambo nga lubaḓa lwe nda lu fara, a shanduka a vha malofha. ₁₈Khovhe dzi re mulamboni dzi ḓo fa, mulambo u ḓo nukha lwa u tou nengisa lune Vhaegipita vha ḓo nengwa u nwa maḓi awo.’ ”

₁₉Muṋe washu a vhudza Mushe a ri, “Vhudza Aroni uri a dzhie lubaḓa lwawe, a angaladze tshanḓa tshawe nṱha ha maḓi a Egipita, nṱha ha milambo na migero na mativha na thannge dzoṱhe, maḓi a shanduke a vhe malofha shangoni ḽoṱhe ḽa Egipita, na kha midzio ya thanda na matombo.”

₂₀Mushe na Aroni vha ita nga he Muṋe washu a vha laya ngaho. Aroni a angaladza lubaḓa lwawe Farao na magota awe vha tshi zwi vhona, a rwa maḓi a mulambo, ayo maḓi oṱhe a mulambo a mbo ḓi shanduka a vha malofha. ₂₁Khovhe dzi re mulamboni dza fa, mulambo wa nukha lwa u tou nengisa lwe Vhaegipita vha si tsha kona u nwa maḓi awo. Shango ḽoṱhe ḽa Egipita ḽo vha ḽo ḓala malofha. ₂₂Hone dziṅanga dza Egipita dza ita-vho zwenezwo nga manditi avho. Zwenezwo Farao a ita tshipimbi, a si thetshelese Mushe na Aroni, sa zwe Muṋe washu a dzula o amba. ₂₃Farao a rembuluwa a ṱuwa a humela pfamoni yawe, a si vhuye a zwi londa hezwo. ₂₄Vhaegipita vhoṱhe vha bwa zwisima vha tshi tsa na mabama a mulambo vha tshi ṱoḓa maḓi a u nwa, nge vha wana maḓi a mulambo a sa nwei. ₂₅Maḓi a fhedza maḓuvha maṱanu na mavhili a sa nwei, u bva tshee Muṋe washu a rwa mulambo wa Nile.