EKISODA 6

₁Ndi hone Muṋe washu a tshi vhudza Mushe a ri, “Zwino u ḓo vhona ndi tshi lifhedza Farao. Ndi ḓo mu kombetshedza u vha litsha vha ṱuwa. Vhukuma u ḓo kombetshedzea uri a vha pfuluse shangoni ḽawe.”

₂Mudzimu a amba na Mushe a mu vhudza a ri, “Ndi Nṋe Yahavee. ₃Ndo ḓisumbedza Abrahamu na Isaka na Jakopo ndi tshi pfi Mudzimu Ramaanḓaoṱhe. A tho ngo ḓiḓivhadza khavho nga dzina ḽanga ḽa Yahavee. ₄Ndo ita na u vhofha mulanga navho nda ri ndi ḓo vha ṋea shango ḽa Kanana ḽe vha dzula khaḽo vhe vhatsinda. ₅Ndo pfa tshigomelo tsha Vhaisraele vhó itwa dziphuli nga Vhaegipita, nda elelwa mulanga wanga. ₆Zwino vhudza Vhaisraele u ri, ‘Ndi Nṋe Yahavee. Ndi ḓo ni rula mihwalo ye na hweswa nga Vhaegipita. Ndi ḓo ni vhofholola na si tsha vha phuli dzavho. Ndi ḓo onyolosa tshanḓa tshanga tsha maanḓa, nda vha lifhedza, nda ni lamulela. ₇Ndi ḓo ni ita vhathu vhanga vhukuma, Nṋe nda vha Mudzimu waṋu. Ndi hone ni tshi ḓo zwi ḓivha uri ndi Nṋe Yahavee Mudzimu waṋu, we a ni rula muhwalo wa Vhaegipita. ₈Zwenezwo ndi ḓo ni isa shangoni ḽe nda ana nda ri ndi ḓo ḽi ṋea Abrahamu na Isaka na Jakopo, nda ḽi ṋea inwi ḽa vha ḽaṋu. Nṋe Yahavee ndi ḓo zwi ita hezwi!’ ”

₉Izwo Mushe a zwi vhudza Vhaisraele, hone vha si mu thetshelese, nge vha vha vho kulekana nungo nga u konḓa ha vhupuli.

₁₀Muṋe washu a vhudza Mushe a ri, ₁₁“Ṱuwa u ye ha Farao khosi ya Egipita, u mu vhudze a litshe Vhaisraele vha pfuluwe shangoni ḽawe.” ₁₂Hone Mushe a fhindula Muṋe washu a ri, “Hufha na Vhaisraele vha songo nthetshelesa, Farao a nga nthetshelesa hani, nahone nṋe ndi muthu a sa koni u amba zwavhuḓi?” ₁₃Muṋe washu a amba na Mushe na Aroni a vha vhudza uri vhuvhili havho vha ye ha Farao khosi ya Egipita, vha pfuluse Vhaisraele shangoni ḽa Egipita.

₁₄Vhaṋe vha miṱa ndi havha: Vhana vha Rubeni, ene tanzhe ḽa Israele, ndi Hanokho na Phalu na Esromu na Kharami. Ndi yone mitupo ya Rubeni.

₁₅Vhana vha vhatuka vha Simioni ndi Jemuele na Jamini na Ohadi na Jakhini na Tsohara, na Saulo ṅwana wa musadzi wa Mukanana. Ndi yone mitupo ya Simioni.

₁₆Madzina a vhana vha vhatuka vha Livi ndi Gerisoni na Kehathi na Mirari. Livi o tshila miṅwaha ya 137.

₁₇Vhana vha vhatuka vha Gerisoni ndi Libini na Shimei na mitupo yavho.

₁₈Vhana vha vhatuka vha Kehathi ndi Amuramu na Izhara na Hebroni na Uziele. Uziele o tshila miṅwaha ya 133.

₁₉Vhana vha vhatuka vha Mirari ndi Mahali na Mushi. Ndi yone mitupo ya Livi, na vhokhotsi avho.

₂₀Amuramu o dzea Jokhobede makhadzi wawe, Jokhobede a mu bebela Aroni na Mushe. Amuramu o tshila miṅwaha ya 137.

₂₁Vhana vha vhatuka vha Izhara vho vha vhe Kora na Nephege na Zikhiri.

₂₂Vhana vha vhatuka vha Uziele ndi Mishaele na Elitsafani na Sithiri.

₂₃Aroni o dzea Elisheba khaladzi ya Nahashoni ṅwana wa Aminadaba, Elisheba a mu bebela Nadaba na Abihu na Eliasara na Ithamara.

₂₄Vhana vha vhatuka vha Kora ndi Asiri na Elikana na Abiasafu. Ndi yone mitupo ya Vhakora. ₂₅Eliasara ṅwana wa Aroni wa mutuka o dzea muṅwe wa vhananyana vha Phuthiele, onoyo a mu bebela Finiasi. Ndi vhone vhaṋe vha miṱa ya Vhalivi zwi tshi ya nga mitupo yavho.

₂₆Aroni na Mushe ndi vhone vhe vha vhudzwa nga Muṋe washu a ri, “Pfulusani Vhaisraele shangoni ḽa Egipita vho khethekana nga matsinde.” ₂₇Ndi vhone vhe vha amba na Farao khosi ya Egipita, vha tshi ri Vhaisraele vha pfuluwe Egipita. Ndi vhenevho Mushe na Aroni.

₂₈Musi we Muṋe washu a amba na Mushe shangoni ḽa Egipita, ₂₉o mu vhudza a ri, “Ndi Nṋe Yahavee. Vhudza Farao khosi ya Egipita zwoṱhe zwine nda u vhudza.” ₃₀Mushe a vhudza Muṋe washu a ri, “Hufha ndi muthu a sa koni u amba, Farao a nga nthetshelesa hani?”