Maitele a Muṋe washu a tshi tshimbidza vhathu vhawe
1“Vhulungani milayo yoṱhe ine nda ni laya ṋamusi, ni i tevhedze, ndi hone ni tshi ḓo tshila, na anda, na dzhena shangoni ḽe Muṋe washu a fulufhedzisa vhomakhulukuku waṋu, na ḽi dzhia ḽa vha ḽaṋu. 2Ni elelwe lwendo lwoṱhe lwe Muṋe washu Mudzimu waṋu a ni tshimbidza phangani miṅwaha hei ya 40 yo fhelaho. O itela u ni ṱukufhadza na u ni linga uri zwi re mbiluni dzaṋu zwi ḓivhee, arali ni tshi ḓo vhulunga milayo yawe kana ni tshi ḓo i nyadza. 3O ni ṱukufhadza a ni farisa nḓala a ni fusha nga mana, zwiḽiwa zwe na vha ni sa zwi ḓivhi, na vhomakhulukuku waṋu vho vha vha sa zwi ḓivhi. O itela u ni funza uri muthu ha tshili nga vhuswa fhedzi, u tshila nga zwenezwo zwine Muṋe washu a mu ṋea nga ipfi ḽawe.
4“Miṅwaha hei yoṱhe ya 40 zwiambaro zwaṋu a zwo ngo ṱahala, milenzhe a yo ngo zwimba. 5Ḓivhani-ha fhungo iḽi: Muṋe washu Mudzimu waṋu u laya inwi unga munna a tshi laya ṅwana wawe. 6Zwenezwo vhulungani milayo ya Muṋe washu Mudzimu waṋu, ni si bve nḓilani dzawe, ni mu hulise.
Shango ḽe Muṋe washu a ṋea Vhaisraele
7“Muṋe washu Mudzimu waṋu u khou ni isa shangoni ḽavhuḓi, shango ḽa milambo na zwisima zwine zwa tou ela zwi sa xi zwi no simuwa magovhani na dzithavhani, 8shango ḽa goroi na baḽi, ḽa minḓirivhe na mihuyu na migranada, ḽa mapfura a muolivi, na ḽa ṋotshi. 9A hu na ane a ḓo ḽa a si fure; a ni nga shayi tshithu; matomboni aḽo ni ḓo wana ngweḓi nnzhi, thavhani dzaḽo na bwa musina. 10Ni ḓo ḽa na fura, na renda Muṋe washu Mudzimu waṋu nga u vhona shango ḽavhuḓi ḽe a ni ṋea ḽone.
11“Hone ni zwi sedze uri ni si hangwe Muṋe washu Mudzimu waṋu na si tsha tevhedza milayo yawe na ndaela dzawe na ndayo yoṱhe ine nda khou ni laya ṋamusi! 12Ni songo ri no ḽa na fura na fhaṱa nnḓu dzavhuḓi na dzula khadzo, 13kholomo dzaṋu na nngu dza anda, na vha na siliva na musuku munzhi, na thundu dzi sa konadzei, 14na vho ḓihudza na hangwa Muṋe washu Mudzimu waṋu, na hangwa uri ndi Ene we a ni vhofholola vhupulini a ni pfulusa Egipita, 15a ni endedza phangani khulu i ofhisaho ho andaho ṋowa dza vhuṱungu na phame, a ni ṋea maḓi a tshi bva kha tombo ḽo omaho ḽa tou te, shangoni ḽa gomelelo ḽi si na maḓi. 16Hafhu ndi Ene we a ni fusha nga mana musi ni phangani, na ḽa zwiḽiwa zwe vhomakhulukuku waṋu vha vha vha sa zwi ḓivhi. O itela u ni ṱukufhadza na u ni linga uri zwi sale zwi tshi ni nakela. 17Zwenezwo ni songo ri no tondwa zwingafhongafho na vho amba mbiluni na ri, ‘Lupfumo holu lwoṱhe ndo ḓiwanela nga maanḓa anga na nga u kona hanga.’ 18Elelwani Muṋe washu Mudzimu waṋu; ndi Ene ane a ni ṋea maanḓa a u kona u wana lupfumo holwo, u vhulunga mulanga wawe we a u fulufhedzisa vhomakhulukuku waṋu, unga ni tshi khou zwi vhona ṋamusi.
19“Hone arali na vhuya na hangwa Muṋe washu Mudzimu waṋu, na gidima murahu ha midzimu isili na i shumela na i luvha, vhukuma ndi khou ni eletshedza ṋamusi ndi ri, ni ḓo lovha! 20Arali na sa thetshelesa ipfi ḽa Muṋe washu Mudzimu waṋu, na inwi ni ḓo lovha unga tshakha idzo dzine Muṋe washu a khou dzi lozwa ni tshi swika.
