DOTORONOMIO 7

₁“Yahavee Mudzimu waṋu u ḓo ṱuwa a tshi ni swikisa shangoni ḽe na livha khaḽo uri a ni ṋee ḽone ḽi vhe ḽaṋu. U ḓo pandela tshakha nnzhi vha ni shavha – Vhahithi na Vhagirigashi na Vhaamori na Vhakanana na Vhapherisi na Vhahivi na Vhajebusi – tshakha ṱhanu na mbili dzine dza ni fhira nga u anda na nga maanḓa. ₂Yahavee Mudzimu waṋu u ḓo vha kumedza inwi, na vha kunda. Zwenezwo tshaṋu ndi u vha lozwa tshoṱhe, ni songo vhofha mulanga navho, ni songo vha khathutshela. ₃Ni songo dzetshelana navho, ₄vha ḓo fhura vhana vhaṋu vha furalela Nṋe Yahavee vha luvha midzimu isili, Nṋe nda ni sinyutshela nda ni lozwa kathihi fhedzi.

₅“Tshine na fanela u vha ita ndi tshithihi fhedzi: Thuthani dziaḽiṱari dzavho, ni pwashe matombo makhethwa e vha imisa, ni reme thanda dzavho dza Ashera, zwifanyiso zwavho zwa midzimu ni zwi fhise nga mulilo. ₆Ni lushaka lukhethwa lwo ḓikumedzaho Muṋe washu Mudzimu waṋu; Muṋe washu o ḓinangela inwi kha tshakha dzoṱhe dzi dzulaho fhano fhasi, a ni nanga uri ni vhe lushaka lwawe vhukuma.

₇“Muṋe washu a tshi ni funa a ni nanga a si nge inwi na vha lwone lushaka luhulu kha dzoṱhe, hufha ni vhaṱuku kha vhoṱhe. ₈Muṋe washu o tou ni funa, a vhulunga muano we a anela vhomakhulukuku waṋu, ndi zwe Muṋe washu a ni pfulusa nga maanḓa awe mahulu, a ni vhofholola vhupulini na zwanḓani zwa Farao khosi ya Egipita, ₉uri ni kone u ḓivha uri Yahavee Mudzimu waṋu ndi Ene Mudzimudzimu, Mudzimu a fulufhedzeaho a vhulungaho mulanga wawe, vha mu funaho na vha tevhedzaho ndaela dzawe u vha itela vhuthu u swika kha mirafho ya tshigidi, ₁₀hone ane a mu vhenga a mu itela swili, Muṋe washu u a mu lifhedza, ha lengi u mu lozwa, vhukuma u a mu lifhedza. ₁₁Ndi zwone, vhulungani ndayo na milayo na ndaela dzine nda ni laya ṋamusi, ni ite zwine dza amba.

₁₂“Arali na thetshelesa milayo iyi, na i vhulunga, na i tevhedza, ndi hone na Muṋe washu Mudzimu waṋu a tshi ḓo vhulunga mulanga we a vhofha na inwi, a ḓi ni ita nga vhuthu unga o fulufhedzisa vhomakhulukuku waṋu nga muano, ₁₃a ni funa a ni shudufhadza a ni andisa, a shudufhadza na vhana vhaṋu na masimu aṋu, na kaṋa goroi i si na vhukono na waini na mapfura a muolivi, kholomo dzaṋu na nngu na mbudzi dza ḓi anda dzi tshi ya ni tshi dzula shangoni ḽe Muṋe washu a fhulufhedzisa vhomakhulukuku waṋu a tou ana uri u ḓo vha ṋea ḽone. ₁₄Ni ḓo vha na mashudu a no fhira a tshakha dzoṱhe; a hu nga wanali na muthihi waṋu a si na ṅwana, kana tshifuwo tsha phanzhe. ₁₅Muṋe washu u ḓo ni tsireledza kha maṱungu oṱhe, malwadze oṱhe a ofhisaho e na vha ni tshi a ḓivha Egipita a nga si tende na vhuthihi hao vhu tshi ni fara, a ḓo fhirela kha maswina aṋu. ₁₆Hone tshakha dzoṱhe dzine Muṋe washu a ḓo ni kumedza dzone ni pfi ni dzi lozwe; ni songo dzi khathutshela, ni songo luvha midzimu yadzo, i sa ḓo vha tshikwekwe tsha u ni fasha.

₁₇“Ni songo tshenuwa na amba mbiluni na ri, ‘Tshakha idzi dzi a ri fhira, ri nga dzi thatha hani?’ ₁₈Ni songo vha ofha, elelwani zwoṱhe zwe Muṋe washu Mudzimu waṋu a ita Farao na shango ḽoṱhe ḽa Egipita. ₁₉Hufha no vhona nga aṋu maṱo uri Muṋe washu Mudzimu waṋu o rwa Vhaegipita nga mabulayo mangafhani na zwiga zwingafhani na maḓembe mangafhani, na uri o ni pfulusa Egipita nga maanḓa mahulu a sa konadzei; ndi zwone zwine a ḓo ita na tshakha dzoṱhe dzine inwi na nga dzi ofha. ₂₀Vhane vha kha ḓi ḓo vha vho sala vhó ponyoka mabulayo ayo, Muṋe washu Mudzimu waṋu u ḓo vha shushedza vha shavha vha tshi tou nga vha khou pandamedzwa nga mabu, vha vhuya vha lovha tshoṱhe ni tshi swika. ₂₁Ni songo vha ofha, hufha Muṋe washu Mudzimu waṋu e na inwi, hufha e Mudzimu muhulu a ofhisaho. ₂₂Musi ni tshi swika, Muṋe washu Mudzimu waṋu u ḓo thatha tshakha idzo nga zwiṱuku nga zwiṱuku, ni nga si kone u vha fhedza kathihi fhedzi; mavhanda o vha a tshi nga anda a ni huvhadza.

₂₃“Muṋe washu Mudzimu waṋu u ḓo vha kumedza inwi, a vha kanganyisa tshoṱhe vha vhuya vha fhela. ₂₄U ḓo ni kumedza na mahosi avho na vha vhulaha, madzina avho a sala a si tsha pfala fhano fhasi. A hu na muthu ane a ḓo imedzana na inwi, ni ḓo vha fhedza vhoṱhe. ₂₅Zwifanyiso zwa midzimu yavho ni zwi fhise nga mulilo; ni songo tama siliva na musuku zwe zwa fhomiwa ngawo na u kwatula na ḓidzhiela zwone, zwi nga vha tshikwekwe tshine tsha ni fasha na gunea; Muṋe washu Mudzimu waṋu o dzula o zwi nengwa hezwo zwithu. ₂₆Nahone ni songo ḓisa ayo maḓithu a nengisaho nḓuni dzaṋu, a ḓo ita uri na inwi ni pfi ni lozwiwe nga Mudzimu unga maswina aṋu; tshaṋu ndi u a nengwa ni sa vhuyi na funa na u a vhona; tshao ndi u fhiswa.