1 KORONIKA 13

₁Dafita a eletshedzana na magota awe oṱhe a no langa vhanna vha tshigidi na a no langa vha ḓana. ₂Ndi hone a tshi ḓivhadza vhathu vhoṱhe vha Israele a ri, “Arali ni tshi vhona zwi zwavhuḓi nahone zwi zwine Muṋe washu Mudzimu washu a zwi funa, nga ri rume vhaḓinḓa ha vha hashu vhaṅwe vhoṱhe shangoni ḽoṱhe ḽa Israele na ha vhotshifhe na Vhalivi vhane vha dzula navho miḓini yavho na mafuloni, vha ḓe vha kuvhangane na riṋe fhano. ₃Nga ri yo dzhia mbulungelo ya Mudzimu washu i vhuye fhano kha riṋe, ngauri a ro ngo i londa misi ya Saulo.” ₄Vhathu vhoṱhe vho kuvhanganaho vha tenda uri vha ḓo ita nga u ralo ngauri vhathu vhoṱhe vho vha vha tshi vhona zwi zwone.

₅Ndi hone Dafita a tshi kuvhanganya Vhaisraele vhoṱhe, u bva mulamboni wa Shihoro masakhani a Egipita u swika Pharani ya Hamathi, uri vha yo dzhia mbulungelo ya Mudzimu Kiriathi Jiarimu. ₆Dafita na Vhaisraele vhoṱhe vhe vha vha vhe nae vha ya muḓini wa Baala, une ḽiṅwe wa pfi Kiriathi Jiarimu, shangoni ḽa Juda, u yo dzhia mbulungelo ya Mudzimu Muṋe washu, o dzulaho kha khuluṋoni vhukati ha vhakherube, mbulungelo iyo i vhidzwa nga dzina ḽawe. ₇Vha bvisa mbulungelo ya Mudzimu nḓuni ya Abinadaba vha i vhea kha gariki ntswa, ya endedzwa nga Uza na Ahio. ₈Dafita na Vhaisraele vhoṱhe vho vha vha tshi khou pembela nga nungo dzavho dzoṱhe phanḓa ha Mudzimu, hu tshi khou imbwa nyimbo hu tshi lidzwa dziharipa na madende na mirumba na ṋanga na dziphalaphala.

₉Musi vha tshi swika luvhatani lwa Nakhoni phulu dza khukhulwa, Uza a isa tshanḓa a fara mbulungelo uri i si we. ₁₀Muṋe washu a sinyutshela Uza, a mu vhulaha nge a farelela mbulungelo. A fela henefho phanḓa ha Muṋe washu. ₁₁Dafita a vhilaela nge Muṋe washu a sinyutshela Uza. Fhethu afho na ṋamusi hu kha ḓi pfi Pheretse Uza (Phandula-Uza), nge Muṋe washu a tou fhandula Uza.

₁₂Dafita a ofha Mudzimu musi uyo, a ḓivhudzisa a ri, “Mbulungelo ya Mudzimu ndi nga i ḓisa hani ha nṋe zwino?” ₁₃Dafita a si dzhie mbulungelo uri a dzule nayo Muḓini wa Dafita. O tou i bvisela nnḓa a i isa nḓuni ya munna we a vha a tshi pfi Obede Edomo we a vha a tshi bva muḓini wa Gathi. ₁₄Mbulungelo ya Mudzimu ya dzula henefho ya fhedza miṅwedzi miraru, Muṋe washu a shudufhadza muṱa wa uyo munna na zwoṱhe zwe a vha e nazwo.