2 MAHOSI 1

₁Musi Ahaba khosi ya Israele o no dzama, Vhamuaba vha shandukela Vhaisraele.

₂Zwino Ahasia khosi ya Israele o vha o wa nga buli ḽa kamara yawe ya nṱha ya pfamo muḓini wa Samaria, a huvhala zwihulu. A ruma vhaḓinḓa a vha vhudza a ri, “Iyani u vhudzisa Baali Zebubu, mudzimu wa muḓi wa Ekroni, ni pfe arali ndi tshi ḓo fhola.”

₃Hone muruṅwa wa Muṋe washu a vhudza Elia, muporofita a no bva Thishibe, a ri, “Gonya u yo ṱangana na vhaḓinḓa vha khosi ya Samaria u vha vhudzise u ri, ‘Kani Israele a hu na Mudzimu ni tshi vhuya na yo vhudzisa Baali Zebubu mudzimu wa Ekroni?’ ₄Zwenezwo Yahavee u ri, ‘He wa lala hone a u tsha ḓo vuwa. Vhukuma u ḓo fa!’ ”

Elia a ṱuwa. ₅Musi vhaḓinḓa vha tshi humela ha khosi ya vha vhudzisa ya ri, “Ndi mini no huma?”

₆Vhone vha fhindula vha ri, “Ho ḓa muṅwe munna a ṱangana na riṋe, a ri vhudza a ri, ‘Humelani ha khosi yo ni rumaho ni swike ni ri: Muṋe washu u ri: Kani Israele a hu na Mudzimu u tshi vhuya wa ruma vhathu u yo vhudzisa Baali Zebubu mudzimu wa Ekroni? Zwenezwo a u tsha ḓo vuwa he wa lala hone. Vhukuma u ḓo fa!’ ”

₇Khosi ya vha vhudzisa ya ri, “Munna we a ḓa a ṱangana na inwi a ni vhudza mafhungo ayo o vha o tou ita hani?”

₈Vhone vha fhindula vha ri, “O vha e munna o ambaraho tshiambaro tsha vhukuse, o vhofha khundu nga bannda ya mukumba.”

Khosi ya ri, “Ndi Elia wa Thishibe.”

₉Ndi hone khosi i tshi ruma gota ha Elia ḽi na vhanna vha 50. Gota ḽa gonya ḽa ya ha Elia, ene o vha o dzula muṱumbani wa tshikwara, ḽa mu vhudza ḽa ri, “Hewe muḓinḓa wa Mudzimu, khosi i ri, ‘Tsela fhasi!’ ”

₁₀Elia a fhindula iḽo gota a ri, “Arali ndi muḓinḓa wa Mudzimu, ngavhe mulilo u tshi tsa u tshi bva ṱaḓulu wa u fhisa na vhanna vha 50 vhane wa vha navho!” Ha mbo ḓi wa mulilo u tshi bva ṱaḓulu wa fhisa gota na vhanna vhe a vha e navho vhe lore.

₁₁Zwa ri u ralo khosi ya dovha ya ruma gota ha Elia ḽi na vhanna vha 50. Gota ḽa vhudza Elia ḽa ri, “Hewe muḓinḓa wa Mudzimu, khosi i ri, ‘Ṱavhanya u tsele fhasi!’ ”

₁₂Elia a fhindula a ri, “Arali ndi muḓinḓa wa Mudzimu, ngavhe mulilo u tshi tsa u tshi bva ṱaḓulu wa u fhisa na vhanna vha 50 vhane wa vha navho!” Ha mbo ḓi wa mulilo u tshi bva ṱaḓulu ha Mudzimu wa fhisa iḽo gota na vhanna vha 50 vhane ḽa vha navho vhe lore.

₁₃Ndi hone khosi i tshi ruma ḽiṅwe gota ḽa vhuraru ḽi na vhanna vha 50. Gota ḽa vhuraru ḽa gonya ḽa yo gwadama phanḓa ha Elia ḽa luvhelela ḽa ri, “Nandi muṋe wanga muḓinḓa wa Mudzimu, nga vha nkhathutshele zwavho na avha vhanna vha 50, vhalanda vhavho. ₁₄Nga vha vhone, ho wa mulilo u tshi bva ṱaḓulu wa fhisa magota aḽa a u thoma mavhili na vhanna vhoṱhe vhe vha vha vhe navho. Zwino-ha, riṋe vha songo ri vhulaha-vho!”

₁₅Muruṅwa wa Muṋe washu a vhudza Elia a ri, “Tsela fhasi nae, u songo mu ofha.” Elia a takuwa, a tsela fhasi nae vha ṱuwa vha ya ha khosi.

₁₆Elia a vhudza khosi a ri, “Muṋe washu u ri, ‘Kani Israele a hu na Mudzimu u tshi vhuya wa ruma vhaḓinḓa u yo vhudzisa Baali Zebubu mudzimu wa Ekroni? Zwino nge wa ita zwenezwo, a u tsha ḓo vuwa he wa lala hone. Vhukuma u ḓo fa!’ ”

₁₇Nangoho Ahasia a fa, nga he Muṋe washu a amba nga mulomo wa Elia. Zwino nge Ahasia a vha a si na ṅwana, murathu wawe Joramu a vha khosi vhudzuloni hawe, a thoma u vhusa nga ṅwaha wa vhuvhili wa muvhuso wa Jehoramu ṅwana wa Josafati khosi ya Juda.

₁₈Mafhungo maṅwe oṱhe a Ahasia na zwe a ita o ṅwalwa buguni ya Histori ya Mahosi a Israele.