1 MAHOSI 22

₁Vhaaramu na Vhaisraele vha fhedza miṅwaha miraru vha si tsha lwa. ₂Hone nga ṅwaha wa vhuraru Josafati khosi ya Juda a yo dalela Ahaba khosi ya Israele. ₃Ahaba khosi ya Israele o vha o vhudza magota awe a ri, “A ni zwi ḓivhi uri muḓi wa Ramotho kha ḽa Giliadi ndi washu? Naho zwo ralo a ri khou ita tshithu uri ri u dzhiulule kha khosi ya Aramu!”

₄Ndi hone Ahaba a tshi vhudzisa Josafati a ri, “A ri ṱuwi roṱhe ri yo dia muḓi wa Ramotho kha ḽa Giliadi naa?”

Josafati a fhindula Ahaba khosi ya Israele a ri, “Nṋe na vhone ri tshithu tshithihi, vhathu vhanga ndi vhathu vhavho, bere dzanga ndi bere dzavho.” ₅Huno Josafati a ita na u vhudza khosi ya Israele a ri, “Nga ri thome u vhudzisa Muṋe washu.”

₆Ahaba khosi ya Israele a kuvhanganya vhaporofita vhane vha nga swika vhanna vha 400, a vha vhudzisa a ri, “Ndi ye u dia Ramotho kha ḽa Giliadi kana ndi songo ya?”

Vhaporofita vha fhindula vha ri, “Thovhele nga a ye, Muṋe wa zwoṱhe u ḓo ita uri vha kunde.”

₇Huno Josafati a vhudzisa a ri, “A hu na muṅwe muporofita wa Muṋe washu fhano ane a nga ri vhudzisela?”

₈Ahaba khosi ya Israele a fhindula Josafati a ri, “Hu kha ḓi vha na munna muthihi ane a nga ri vhudzisela ha Muṋe washu, hone ndi a mu vhenga ngauri ha vhuyi a porofita zwivhuya nga nṋe, u porofita zwo vhifhaho fhedzi. Ene u pfi Mikhaya ṅwana wa Imila.”

Josafati a fhindula a ri, “Thovhele vha songo ralo.”

₉Ndi hone Ahaba khosi ya Israele a tshi vhidza ḽiṅwe ḽa magota awe a ri, “Ṱavhanyani ni yo dzhia Mikhaya ṅwana wa Imila ni ḓe nae.”

₁₀Khosi ya Israele na Josafati khosi ya Juda vho vha vho ambara phuraphura dza vhuhosi, vho dzula kha khuluṋoni dzavho, luvhatani lwa u fhulela, tsini ha gethe ya khoro ya Samaria, vhaporofita vhoṱhe vha tshi khou porofita henefho phanḓa havho. ₁₁Zwino Tsedekia ṅwana wa Khenaana o vha o ḓifulela ṋanga dza tsimbi, a ḓivhadza a ri, “Muṋe washu u ri, ‘U ḓo runga Vhaaramu nga ṋanga hedzi wa vha lozwa tshoṱhe.’ ”

₁₂Vhaporofita vhaṅwe vhoṱhe na vhone vha porofita zwenezwo vha ri, “Thovhele nga vha bve pfumo vha yo dia muḓi wa Ramotho kha ḽa Giliadi; vha ḓo kunda ngauri Muṋe washu u ḓo vha kumedza wone.”

₁₃Muḓinḓa we a vha o yo vhidza Mikhaya a mu vhudza a ri, “Nga vha vhone, vhaporofita vhaṅwe vhoṱhe vho amba uri khosi zwi ḓo i nakela, maipfi avho nga a fane na a vhenevhaḽa, vha porofite zwivhuya.”

₁₄Hone Mikhaya a fhindula a ri, “Nga Muṋe washu a tshilaho, nṋe ndi ḓo vhudza khosi zwenezwo fhedzi zwine Muṋe washu a mmbudza.”

₁₅Musi Mikhaya a tshi swika khosi ya mu vhudzisa ya ri, “Mikhaya, ri ṱuwe ri yo dia muḓi wa Ramotho kha ḽa Giliadi kana ri songo ya?”

Mikhaya a fhindula a ri, “Nga vha bve zwavho pfumo, vha ḓo kunda; Muṋe washu u ḓo vha kumedza uyo muḓi.”

₁₆Huno khosi Ahaba a mu vhudza a ri, “Ndi ḓo vha vhudza kangana uri vha tshi amba na nṋe nga dzina ḽa Muṋe washu vha ambe ngoho fhedzi?”

₁₇Mikhaya a fhindula a ri, “Ndo vhona Vhaisraele vhoṱhe vho balangana zwikwarani vha tshi nga nngu dzi si na mulisa, Muṋe washu a ri, ‘Vhathu havha a vha na muṋe. Muṅwe na muṅwe nga a humele hayani; nndwa yo fhela.’ ”

₁₈Khosi ya Israele ya vhudza Josafati ya ri, “Tho ngo vha vhudza nda ri ha porofiti zwivhuya nga nṋe, u porofita zwo vhifhaho fhedzi?”

₁₉Mikhaya a isa phanḓa a ri, “Zwino nga vha thetshelese zwine Muṋe washu a amba! Ndo vhona Muṋe washu o dzula kha khuluṋoni yawe, mara oṱhe a ṱaḓulu o ima o mu tanga thungo ya tshauḽa tshawe na tsha monde. ₂₀Muṋe washu a ri, ‘Ndi nnyi ane a nga kunga Ahaba a bva pfumo a ḓa a dia muḓi wa Ramotho kha ḽa Giliadi, a yo fela henengei?’ Muṅwe a amba tshino, muṅwe a amba tshiḽa. ₂₁Muṅwe muya wa vhuya wa bvela khagala wa ima phanḓa ha Muṋe washu wa ri, ‘Nṋe ndi ḓo mu kunga.’ ₂₂Muṋe washu a vhudzisa a ri, ‘U ḓo mu kunga nga mini?’ Muya wa ri, ‘Ndi ḓo bva nda vha muya wa mazwifhi milomoni ya vhaporofita vhoṱhe.’ Muṋe washu a ri, ‘Iwe u ḓo kona u mu kunga. Tshimbila u yo ita nga u ralo.’ ₂₃Zwino Muṋe washu o longa muya wa mazwifhi milomoni ya vhaporofita vhavho vhoṱhe. Hone vhukuma Muṋe washu o ḓivhadza uri vhone vha ḓo welwa nga khombo.”

₂₄Ndi hone Tsedekia ṅwana wa Khenaana a tshi sendela a vhanda Mikhaya khofheni, a mu vhudzisa a ri, “Zwo ḓa hani Muya wa Muṋe washu a tshi bva kha nṋe a pfukela kha inwi?”

₂₅Mikhaya a fhindula a ri, “Izwo ni ḓo zwi ḓivha musi une na yo dzumbama ni tshi bva kamarani iṅwe na shavhela kha iṅwe.”

₂₆Khosi ya Israele ya bvisa ndaela ya ri, “Dzhiani Mikhaya ni mu vhuedzedze ha Amoni mulangi wa muḓi na ha Juasi ṅwana wa khosi, ₂₇ni swike ni ri, ‘Khosi i ri: Hoṋelani muthu hoyu dzhele, ni mu fhe vhurotho vhuṱuku na maḓi fhedzi u swika ndi tshi vhuya ndo takala ndi songo huvhala.’ ”

₂₈Mikhaya a ḓivhadza a ri, “Arali vha tou vhuya vho takala vhá songo huvhala, izwo Muṋe washu u ḓo vha a songo amba nga mulomo wanga.” Mikhaya a dovha a ri, “Vhathu noṱhe thetshelesani zwe nda amba!”

₂₉Ndi hone khosi ya Israele na Josafati khosi ya Juda vha tshi yo dia muḓi wa Ramotho kha ḽa Giliadi. ₃₀Ahaba khosi ya Israele a vhudza Josafati a ri, “Ndi ḓo dzhena nndwani ndo ḓikhakhisa, hone vhone vha ambare zwiambaro zwavho zwa vhuhosi.” Khosi ya Israele ya ḓikhakhisa ya ya nndwani.

₃₁Zwino khosi ya Aramu yo vha yo laya vhalangi vhayo vha dzigariki vha 32 ya ri, “Ni songo londa muṅwe muthu na muthihi, ni londe khosi ya Israele fhedzi.” ₃₂Musi vhalangi vha dzigariki vha tshi vhona khosi Josafati vha elekanya vha ri, “Vhukuma uyu ndi khosi ya Israele.” Vha rembuluwa uri vha mu wele, hone Josafati a ṱavha mukosi, ₃₃vhalangi vha dzigariki vha zwi vhona uri a si khosi ya Israele, vha litsha u mu sala murahu.

₃₄Huno muṅwe a sokou akha vhura a sa londi, a pfula khosi ya Israele he zwitsimbi zwa tshiambaro tsha nndwa zwa ṱanganywa hone. Khosi ya vhudza mutshimbidzi wa gariki yayo ya ri, “Ndo huvhala, monisani gariki ni mmvise hafha nndwani.”

₃₅Hone nndwa ya hulela ya lwiwa ḓuvha ḽoṱhe, khosi ya ṱwa yo ima kha gariki yayo yo livhana na Vhaaramu. Malofha a no bva kha mbonzhe yawe a ela a tshi tsela garikini, ḽeneḽo ḓuvha nga madekwana a mbo ḓi dzama. ₃₆Musi ḓuvha ḽi tshi khou kovhela, ha pfala mukosi wa ṱanganya mmbi ya Israele wa ri, “Muṅwe na muṅwe nga a humele shangoni ḽa hawe, muḓini wa hawe!”

₃₇Khosi Ahaba a dzama nga u ralo, tshitumbu tshawe tsha iswa Samaria tsha swiṱwa henengei. ₃₈Vha ṱanzwa gariki ishani ḽa Samaria, mmbwa dza ṋanzwa malofha awe, phombwe dza ṱamba ngao, nga he ipfi ḽa Muṋe washu ḽa amba ngaho.

₃₉Mafhungo maṅwe oṱhe a khosi Ahaba na zwe a ita na pfamo ye a fhaṱa a i nakisa nga ṋanga dza nḓou na miḓi ye a fhaṱa a i tanga nga mitsheṱo, o ṅwalwa kha bugu ya Histori ya Mahosi a Israele. ₄₀Ahaba a ri u ladzwa na vhokhotsi awe, ṅwana wawe Ahasia a vha khosi vhudzuloni hawe.

₄₁Josafati ṅwana wa Asa o vha khosi ya Juda nga ṅwaha wa vhuṋa wa muvhuso wa Ahaba khosi ya Israele. ₄₂Josafati a tshi vha khosi o vha e na miṅwaha ya 35, a vhusa e Jerusalema a fhedza miṅwaha ya 25. Mme awe o vha e Asuba ṅwananyana wa Shilihi. ₄₃Ene o kanda vhuṱalani ha khotsi awe Asa kha zwoṱhe, a si vhuye a pambuwa khazwo, a ita zwi takadzaho Muṋe washu. O ro sa thuthisa zwitembele zwa zwikwarani, vhathu vha ḓi ṋekedza nduvho vha fhisa zwioro henefho. ₄₄Josafati a tshila nga mulalo na khosi ya Israele.

₄₅Mafhungo maṅwe oṱhe a muvhuso wa Josafati, na zwe a ita, na vhuhali hawe nndwani dze a dzi lwa, zwo ṅwalwa buguni ya Histori ya Mahosi a Juda. ₄₆Josafati o ita na u thatha phombwe dzoṱhe dza u luvha midzimu nga vhupombwe hadzo, dzo salaho henefho na misi ya khotsi awe Asa, dza si tsha vha hone shangoni.

₄₇Shango ḽa Edomo ḽo vha ḽi si na khosi, ḽo vha ḽi tshi vhuswa nga tshanḓa tsha khosi o vhewaho nga khosi ya Juda.

₄₈Zwino khosi Josafati a fhaṱa zwikepe zwine zwa tala lwanzheni uri zwi ye shangoni ḽa Ofiri zwi yo dzhia musuku, hone zwa kwashekana Etsioni Gebere zwa si tsha tshimbila. ₄₉Zwenezwo khosi Ahasia ṅwana wa Ahaba a vhudza Josafati a ri, “Nga vha litshe vhanna vhanga vha tshimbile lwanzheni na vhanna vhavho.” Hone Josafati a hana.

₅₀Josafati a dzama, a swiṱwa zwaloni zwa musanda Muḓini wa Dafita, ṅwana wawe Jehoramu a vha khosi vhudzuloni hawe.

₅₁Nga ṅwaha wa 17 wa muvhuso wa Josafati khosi ya Juda, Ahasia ṅwana wa Ahaba a vha khosi ya Israele a vhusa e muḓini wa Samaria, a vhusa Israele a fhedza miṅwaha mivhili. ₅₂Ahasia a ita zwi sa takadzi Muṋe washu, ngauri o kanda vhuṱalani ha khotsi awe Ahaba na ha mme awe Jesebele na ha khosi Jerobiamu ṅwana wa Nebati, we a ita uri Vhaisraele vha tshinye. ₅₃O luvha Baali a tshi ḓi mu gwadamela unga khotsi awe, u ralo ha vha u sinyusa Muṋe washu Mudzimu wa Israele.