2 KORONIKA 33

₁Manase a tshi vha khosi o vha e na miṅwaha ya 12, a vhusa e Jerusalema a fhedza miṅwaha ya 55. ₂Manase a ita zwe zwa vha zwi sa takadzi Muṋe washu, a edzisa maitele a nengisaho a tshakha dze Muṋe washu a dzi thatha afho shangoni musi Vhaisraele vha tshi swika. ₃Manase a vusa zwitembele zwa zwikwarani zwe khotsi awe Hiskia a vha o zwi thutha, a ita na u fhaṱa aḽiṱari dza Vhobaali, a vhaḓa thanda ya Ashera mudzimu wa tshisadzi, a gwadamela ṋaledzi dzoṱhe, a dzi luvha. ₄A fhaṱa na aḽiṱari dza u luvha midzimu thembeleni ya Muṋe washu, fhethu he Muṋe washu a vha o ri, “Jerusalema hu ḓo dzula dzina ḽanga lini na lini.” ₅Miṱani ya thembele ya Muṋe washu vhuvhili hayo a fhaṱa dziaḽiṱari a tshi fhaṱela ṋaledzi dzoṱhe. ₆A ita na u ṋekedza vhana vhawe vha vhatuka a vha ita nduvho dzi fhiswaho Govhani ḽa Beni Hinomu, a edzisa na zwa manditi na u tungula ṱhangu, a yo vhudzisa vhaambeli na vhabvumbi. A tshinya zwihulu zwi sa takadzi Muṋe washu, a mu sinyusa. ₇A dzhia tshifanyiso tsha thanda tshe ene muṋe a tou ḓivhaḓela, a tshi vhea thembeleni ya Mudzimu, he Mudzimu a vha o vhudza Dafita na ṅwana wawe Solomoni a ri, “Thembeleni hei fhano Jerusalema, fhethu he nda hu nanga kha matsinde oṱhe a Vhaisraele, ndi ḓo vhea dzina ḽanga hone lini na lini. ₈A thi nga dovhi nda ita uri ṋayo dza Vhaisraele dzi tendeleke dzi ṱuwe shangoni ḽe nda ṋea vhomakhulukuku wavho, arali vha ita zwoṱhe zwe nda vha laya, vha vhulunga Mulayo woṱhe na ndaela na ndayo dze vha ṋewa nga Mushe.” ₉Hone Manase a xedza vhathu vha Juda na Jerusalema, vha ita vhuvhi vhu no fhira ha tshakha dze Muṋe washu a dzi lozwa u swikani ha Vhaisraele.

₁₀Muṋe washu a amba na Manase na vhathu vhawe, hone vha si zwi londe. ₁₁Muṋe washu a vha rambela vhalangammbi vha khosi ya Ashuru, vha thuba Manase, vha mu longa huka ningoni, vha mu vhofha nga tsimbi dza musinaseṱha, vha mu hwala vha mu isa Babele. ₁₂Musi a tshi vho tambula, a luvhelela Muṋe washu Mudzimu wawe, a ḓiṱukufhadza zwihulu phanḓa ha Mudzimu wa vhokhotsi awe, ₁₃a mu rabela. Muṋe washu a mu khathutshela, a thetshelesa tshililo tshawe, a mu vhuedzedza Jerusalema, muvhusoni wawe. Ndi hone Manase a tshi zwi ḓivha uri Muṋe washu ndi Mudzimu.

₁₄Ngavhuya Manase a engedza mutsheṱo wa nnḓa wa Muḓi wa Dafita, vhukovhela ha tshisima tsha Gihoni govhani, u vhuya u swika muṋangoni wa Khoro ya Khovhe, wa mona na tshivhanga tsha Ofele, a u lapfisa wa ya nṱha. A vhea vhalangammbi miḓini yoṱhe ya Juda i re na mitsheṱo.

₁₅Manase a bvisa midzimu isili, a bvisa na tshifanyiso tsha thanda thembeleni ya Muṋe washu, khathihi na aḽiṱari dze a vha o dzi fhaṱa tshikwarani tsha thembele na Jerusalema, a zwi posa nnḓa ha muḓi. ₁₆Ndi hone a tshi vusa aḽiṱari ya Muṋe washu, a ṋekedza nduvho dza u konana na Mudzimu na dza ndivhuho khayo, a vhudza vhathu vha Juda uri vha shumele Muṋe washu Mudzimu wa Israele. ₁₇Naho zwo ralo vhathu vha ḓi yo ṋekedza nduvho zwitembeleni zwa zwikwarani, hone vha tshi dzi ṋekedza Muṋe washu Mudzimu wavho fhedzi.

₁₈Mafhungo maṅwe a Manase, hu tshi vhaliwa na thabelo ye a rabela Mudzimu wawe na maipfi e vhaporofita vha mu vhudza nga dzina ḽa Muṋe washu Mudzimu wa Israele, o ṅwalwa buguni ya Histori ya Mahosi a Israele. ₁₉Thabelo yawe na zwe Mudzimu a mu khathutshela, khathihi na vhutshinyi hawe hoṱhe na u sa fulufhedzea hawe na fhethu he a fhaṱa zwitembele, a imisa zwifanyiso zwa thanda zwa Ashera mudzimu wa tshisadzi na zwitungulo zwiḽa a sa athu ḓiṱukufhadza, zwoṱhe zwo ṅwalwa buguni ya Histori ya Vhaporofita. ₂₀Manase a dzama, a swiṱwa pfamoni. Ṅwana wawe Amoni a vha khosi vhudzuloni hawe.

₂₁Amoni a tshi vha khosi o vha e na miṅwaha ya 22, a vhusa e Jerusalema a fhedza miṅwaha mivhili. ₂₂Amoni o ita zwi sa takadzi Muṋe washu, u ḓi nga khotsi awe Manase. Amoni a luvha zwitungulo zwoṱhe zwo itwaho nga Manase, a zwi ṋekedza nduvho. ₂₃Hone ene ho ngo nga khotsi awe Manase, ho ngo ḓiṱukufhadza phanḓa ha Muṋe washu, mulandu wa Amoni wo kalula.

₂₄Magota a Amoni vha mu langana, vha mu vhulahela pfamoni yawe. ₂₅Vhahulwane vha shango vha vhulaha vhoṱhe vhe vha langana khosi Amoni, vha dzhia ṅwana wawe Josiasi vha mu vhumba khosi vhudzuloni hawe.