2 KORONIKA 32

₁Musi ho no itea izwo zwoṱhe zwe khosi Hiskia a zwi shuma a tshi fulufhedzea, khosi Sanakheribi wa Ashuru a ḓa a dia Juda. A govhela miḓi yo tangwaho nga mitsheṱo, a tshi ri u ḓo pwasha mitsheṱo a dzhia miḓi iyo. ₂Musi Hiskia a tshi vhona uri Sanakheribi o ḓa u ṱoḓa u lwa na vha Jerusalema, ₃a amba na vharangaphanḓa na mmbi uri hu valiwe maḓi a no bva zwisimani nnḓa ha muḓi, vhone vha mu farisa. ₄Ha kuvhangana vhanna vhanzhi, vha vala zwisima zwoṱhe na mulambwana we wa vha u tshi ela u tshi buḓekanya shango. Vha ri, “Mahosi a Ashuru a tshi ḓa a songo wana maḓi.” ₅Hiskia a shuma nga maanḓa a tshi vusa fhethu ho pwasheaho mutsheṱoni, a fhaṱa dzithawara nṱha hawo. A fhaṱa muṅwe mutsheṱo wa nnḓa ha hoyo, a khwaṱhisa mirango ya u tikedza ya Muḓi wa Dafita. A ita na zwihali zwinzhi, a fula na mafumo. ₆Hiskia a vhea vhalangammbi uri vha lange vhathu, a vha kuvhanganya phanḓa hawe vanḓani khoroni ya muḓi, a vha ṱuṱuwedza a tshi ri, ₇“Khwaṱhani ni vhe na nungo. Ni songo ofha tshithu, ni songo kulea nungo nga khosi ya Ashuru na mmbi khulu ine a vha nayo, riṋe ri na maanḓa mahulu a no fhira awe. ₈Ene u na maanḓa a vhathu, hone riṋe ri na Mudzimu Muṋe washu. Ene u ḓo ri farisa ra lwa nndwa dzashu.” Vhathu vha vha na fulufhelo nga u pfa zwe Hiskia khosi ya Juda a amba.

₉Ngavhuya musi Sanakheribi khosi ya Ashuru na mmbi dzawe dzoṱhe vha tshi khou govhela muḓi wa Lakhishi, a ruma vhaḓinḓa Jerusalema ha Hiskia khosi ya Juda na ha vhathu vhoṱhe vha Juda vhe vha vha vhe henefho vha isa malaedzwa vha swika vha ri, ₁₀“Sanakheribi khosi ya Ashuru u ri, ‘Tshe wa ḓitika ngatsho ndi tshini, hune wa ḓi dzula zwau Jerusalema hone wo govhelwa? ₁₁Hezwi Hiskia a tshi ri: Mudzimu washu Yahavee u ḓo ri tshidza zwanḓani zwa khosi ya Ashuru, u khou ni xedza uri ni fe nga nḓala na ḓora. ₁₂A si ene Hiskia we a thutha zwitembele zwa uyo mudzimu zwa zwikwarani, na dziaḽiṱari dzawe, a tshi vhudza vhathu vha Juda na Jerusalema a ri vha fanela u luvha phanḓa ha aḽiṱari nthihi vha fhise zwiṱhavhelo khayo? ₁₃Kani-ha a ni ḓivhi zwe nṋe na vhokhotsi anga ra ita tshakha dzoṱhe dza maṅwe mashango? Midzimu ya idzo tshakha yo vhuya ya kona u lamulela shango ḽavho zwanḓani zwanga? ₁₄Midzimu yoṱhe ya tshakha idzo dze vhokhotsi anga vha dzi lozwa ndi ufhio we wa kona u tshidza vhathu vhawo zwanḓani zwanga, inwi ni tshi ri mudzimu waṋu u ḓo kona u ni lamukisa tshanḓani tshanga? ₁₅Zwino ni songo tenda Hiskia a tshi ni fhura, a tshi ni xedza nga u ralo. Ni songo tenda zwine a amba, ngauri a hu na mudzimu wa lushaka lufhio na lufhio kana muvhuso ufhio na ufhio we wa vhuya wa kona u lamulela lushaka lwawo zwanḓani zwanga kana zwanḓani zwa vhokhotsi anga. Zwino mudzimu waṋu u nga kona hani u ni lamulela zwanḓani zwanga?’ ”

₁₆Vhaḓinḓa vha Sanakheribi vha isa phanḓa vha tshi nyefula Mudzimu Muṋe washu, vha tshi sasaladza na Hiskia mulanda wawe. ₁₇Khosi ya ita na u ṅwala maṅwalo i tshi nyefula Muṋe washu Mudzimu wa Israele, a tshi mu amba a ri, “Midzimu ya tshakha dza maṅwe mashango a yo ngo kona u lamukisa vhathu vhayo zwanḓani zwanga, zwenezwo na mudzimu wa Hiskia u nga si kone u lamukisa vhathu vhawo zwanḓani zwanga.” ₁₈Ndi hone avho vhaḓinḓa vha tshi ṱavha mukosi nga Tshiheberu uri vha shushedze vhathu vha Jerusalema vho imaho kha mitsheṱo ya muḓi, vha kulee nungo, uri vha kone u thuba muḓi. ₁₉Vha amba nga Mudzimu wa Jerusalema zwenezwiḽa zwe vha amba nga midzimu ya dziṅwe tshakha dza mashango, zwitungulo zwo itwaho nga zwanḓa zwa vhathu.

₂₀Ndi hone khosi Hiskia na muporofita Yesaya ṅwana wa Amutsi vha tshi rabela Mudzimu vha mu lilela uri a vha farise. ₂₁Muṋe washu a ruma muruṅwa a ya a vhulaha vhahali vhoṱhe na vharangaphanḓa na vhalangammbi mishashani ya khosi ya Ashuru. Khosi ya vhuelela shangoni ḽayo yo shona. Muṅwe musi a tshi khou luvha thembeleni ya mudzimu wawe, vhaṅwe vhana vhawe vhe a vha beba vha mu vhulaha nga mapanga.

₂₂Ngauralo Muṋe washu a lamukisa khosi Hiskia na vhathu vha Jerusalema zwanḓani zwa Sanakheribi khosi ya Ashuru, na zwanḓani zwa maswina avho maṅwe oṱhe. Muṋe washu a vha tsireledza masia oṱhe. ₂₃Vhathu vhanzhi vha isela Muṋe washu nduvho Jerusalema, na Hiskia khosi ya Juda vha mu isela nduvho dza mutengo muhulu. U bva zwenezwo Hiskia a huliswa nga tshakha dzoṱhe.

₂₄Misi yeneyo khosi Hiskia a farwa nga biso, lwe a vhuya a ṱoḓou fa. Hiskia a rabela Muṋe washu, ndi hone Muṋe washu a tshi mu fhindula, a mu sumbedza tshiga tsha uri u ḓo fhola. ₂₅Hone mbilu ya Hiskia yo vha i tshi ḓihudza, a si tsha livhuha vhuthu he a itelwa hone, ndi zwe Muṋe washu a mu sinyutshela, a sinyutshela na Juda na Jerusalema. ₂₆Ndi hone Hiskia na vhathu vha Jerusalema vha tshi ḓiṱukufhadza, zwenezwo Muṋe washu a si tsha vha rwa misi ya Hiskia.

₂₇Khosi Hiskia o vha e na lupfumo luhulu nahone a tshi huliswa. A ita mbulungelo dza siliva yawe na musuku na matombo a mutengo muhulu na zwilungi na zwiṱangu na zwithu zwoṱhe zwa mutengo muhulu. ₂₈Hiskia a fhaṱa na maḓulu a u vhulungela khaṋo ya zwiliṅwa zwa thoro na waini ya tuvhu na mapfura a muolivi, a fhaṱa madanga a zwifuwo zwa tshakha dzo fhambanaho na zwitumba zwa masambi a nngu. ₂₉A fhaṱa miḓana a vha na masambi manzhi a nngu na a kholomo, nge Mudzimu a vha o mu ṋea lupfumo luhulu.

₃₀Khosi Hiskia ndi ene we a thivha mulonga wa nṱha wa tshisima tsha Gihoni, a livhisa maḓi vhukovhela ha Muḓi wa Dafita. Zwoṱhe zwe a ita zwo mu nakela. ₃₁Hone musi hu tshi ruṅwa vhaḓinḓa nga vhavhusi vha Babele u ḓa u mu vhudzisa nga tshiga tshi kanukisaho tsho iteaho afho shangoni, Mudzimu a mu litsha uri a mu linge, a ḓivhe zwoṱhe zwe zwa vha zwi mbiluni yawe.

₃₂Mafhungo maṅwe a khosi Hiskia na u ḓikumedza hawe Muṋe washu, o ṅwalwa buguni ya Bono ḽa Muporofita Yesaya ṅwana wa Amutsi na kha Histori ya Mahosi a Juda na Israele. ₃₃Hiskia a dzama, a swiṱwa tshivhangani, hu re na zwalo zwa nnḓu ya Dafita. Vhathu vhoṱhe vha Juda na Jerusalema vha mu hulisa musi a tshi dzama. Ṅwana wawe Manase a vha khosi vhudzuloni hawe.