1 MAHOSI 3

₁Solomoni a vhinga ṅwananyana wa Farao khosi ya Egipita a vha shaka ḽawe. Solomoni a ḓisa uyo musadzi Muḓini wa Dafita a vhuya a fhedza u fhaṱa pfamo yawe na thembele ya Muṋe washu na mutsheṱo wo tangaho Jerusalema.

₂Vhathu vho vha vha tshi kha ḓi ṋekedza nduvho dzavho aḽiṱarini dzi re zwikwarani ngauri dzina ḽa Muṋe washu ḽo vha ḽi sa athu fhaṱelwa thembele. ₃Solomoni o sumbedza uri u funa Muṋe washu nga u tevhedza ndayo dza khotsi awe Dafita, hone na ene o vha a tshi ṋekedza zwiṱhavhelo a dubisa zwioro kha dziaḽiṱari dzi re zwikwarani.

₄Khosi ya ya Gibioni u ṋekedza zwiṱhavhelo, ngauri itsho tsho vha tshikwara tshi re na bvumo, Solomoni a ṋekedza tshigidi tsha zwiṱhavhelo zwi fhiswaho kha aḽiṱari yeneyo. ₅Henefho Gibioni Muṋe washu a ḓisumbedza Solomoni nga muloro vhusiku, Mudzimu a ri, “Humbela tshine wa funa ndi tshi u ṋea tshone.”

₆Solomoni a fhindula a ri, “Khotsi anga Dafita mulanda wau wo mu ita nga vhuthu hau vhuhulu ngauri wo vhona a tshi fulufhedzea, a tshi ita zwi re zwone, a si na muhoyo. Wo ḓi mu sumbedza vhuthu honoho vhuhulu, wa mu ṋea ṅwana wa mutuka uri a dzule kha khuluṋoni yawe ṋamusi. ₇Yawee Muṋe washu Mudzimu wanga, wo mmbumba khosi vhudzuloni ha khotsi anga Dafita. Hone ndi kha ḓi vha ṅwana, thi na nḓivho ya u vhusa vhathu. ₈Ndi fhano vhukati ha vhathu vhe wa vha nanga, lushaka luhulu, vhathu vhanzhi vha sa vhalei. ₉Zwenezwo nṋee mbilu i no kona u thetshelesa uri ndi kone u haṱula mafhungo a vhathu vhau ndi ṱalukanye zwi re zwone na zwi si zwone. Ndi nnyi ane a nga kona u vhusa lushaka holu lwau luhulu nga eṱhe?”

₁₀Muṋe washu a takala nge Solomoni a humbela zwenezwo, ₁₁Mudzimu a vhudza Solomoni a ri, “Vhunga wo humbela izwo, wa si humbele u lalama kana wa ḓihumbelela lupfumo kana lufu lwa maswina au, wa tou humbela mbilu i no kona u thetshelesa uri u kone u vhusa nga nḓila yo fanelaho, ₁₂ndi ḓo ita zwe wa humbela. Ndi ḓo u ṋea mbilu ya vhuṱali na ṱhalukanyo, zwine ha sa athu vhuya ha vha na muthihi we a vha nazwo nahone ha sa ḓo vha na muṅwe ane a ḓo dovha a vha nazwo. ₁₃Ndi ḓo u ṋea na zwe wa si zwi humbele: lupfumo na tshileme, vhutshilo hau hoṱhe a hu na khosi ine ya ḓo eḓana na iwe. ₁₄Arali wa tshimbila nḓilani dzanga, wa tevhedza ndayo dzanga na milayo yanga unga khotsi au Dafita, ndi ḓo ita uri u lalame.” ₁₅Ndi hone Solomoni a tshi karuwa, a zwi ḓivha uri Mudzimu o amba nae muloroni. Solomoni a vhuelela Jerusalema, a ima phanḓa ha mbulungelo ya mulanga ya Muṋe wa zwoṱhe a ṋekedza zwiṱhavhelo zwi fhiswaho na nduvho dza u konana na Mudzimu. A ri u fhedza a itela magota awe oṱhe vhuṱambo.

₁₆Zwino muṅwe musi dziṅwe phombwe mbili dza ḓisa mulandu ha khosi Solomoni dza ima phanḓa hawe. ₁₇Muṅwe wavho a ri, “Muṋe wanga, nṋe na musadzi hoyu ri dzula nḓuni nthihi. Nṋe ndo vha na ṅwana zwenezwo ri tshi dzula roṱhe. ₁₈Huno nga ḓuvha ḽa vhuraru ṅwananga ó bebwa, na uyu musadzi a vha na ṅwana. Ro vha ri tshi dzula roṱhe afho nḓuni, ho vha hu si na muṅwe muthu, ro vha ri tshi tou vha vhavhili fhedzi.

₁₉“Vhukati ha vhusiku uyu musadzi a tsika ṅwana wawe a fa. ₂₀Zwino a vuwa vhukati ha vhusiku, a dzhia ṅwananga we a vha e tsini hanga, nṋe ndi tshee ndo farwa nga khofhe, a mu isa vhulaloni hawe, a dzhia ṅwana wawe o faho a mu vhea vhulaloni hanga. ₂₁Nga matshelo nda vuwa ndi tshi ri ndi nuse ṅwananga, nda wana o fa! Hone musi ndi tshi mu sedza zwavhuḓi nga tshedza tsha nga matsheloni, nda vhona uri a si ṅwananga we nda beba.”

₂₂Huno musadzi uyo muṅwe a ri, “A si zwone! Ṅwana a tshilaho ndi wanga, o faho ndi wau!”

Hone musadzi wa u thoma a ḓi oma a tshi ri, “A si zwone! Ṅwana o faho ndi wau, a tshilaho ndi wanga!” Vha ṱaṱisana henefho phanḓa ha khosi.

₂₃Khosi ya elekanya ya ri, “Muṅwe u ri, ‘Ṅwana a tshilaho ndi wanga, wau ndi o faho,’ ngeno muṅwe a tshi ri, ‘A si zwone! Ṅwana o faho ndi wau, a tshilaho ndi wanga!’ ”

₂₄Ndi hone khosi i tshi ri, “Ḓisani banga!” Vha ḓisela khosi banga. ₂₅Khosi ya ri, “Fhandulani ṅwana a tshilaho nga vhukati, muṅwe na muṅwe ni mu fhe lurumbu.”

₂₆Musadzi we ṅwana wawe a vha a tshi tshila a mu pfela vhuṱungu, a vhudza khosi a ri, “Yawee, muṋe wanga, nga vha fhe zwavho uyu musadzi ṅwana uyo a tshilaho! Vha songo mu vhulaha!”

Hone uḽa muṅwe musadzi a ri, “Nṋe ndi nga si mu wane, na iwe u nga si mu wane. Nga a fhandulwe nga vhukati!”

₂₇Ndi hone khosi i tshi haṱula ya ri, “Ni songo mu vhulaha, musadzi hoyu wa u thoma ndi ene mme awe, nga a fhiwe ene.”

₂₈Musi Vhaisraele vhoṱhe vha tshi pfa iyo khaṱhulo ya khosi, vha hulisa khosi, nge vha vhona uri i na vhuṱali vhu no bva ha Mudzimu ha u vhusa nga khaṱhulo yo fanelaho.