1 MAHOSI 2

₁Musi tshifhinga tsha Dafita tsha u dzama tshi tshi sendela, a laya ṅwana wawe Solomoni a ri, ₂“Hu si kale ndi ḓo tevhela vhanzhi. Inwi ni vhe na nungo, ni vhonale ni munna, ₃ni tevhedze zwine Muṋe washu Mudzimu waṋu a ri zwi itwe. Tshimbilani nḓilani dzawe, ni tevhedze ndayo dzawe na milayo yawe na zwoṱhe zwe a laya, nga he zwa ṅwalwa kha Mulayo wa Mushe, ndi hone zwoṱhe zwine na ita zwi tshi ḓo ni nakela hoṱhe hune na ya, ₄ndi hone Muṋe washu a tshi ḓo khunyeledza zwe a mpfulufhedzisa a tshi ri, ‘Arali vhaḓuhulu vhau vha sedza kutshilele kwavho, nda vhona vha tshi tshila nga u fulufhedzea nga mbilu yavho yoṱhe na muya woṱhe, hu ḓo ḓi vha na muṅwe wavho a no ḓo dzula kha khuluṋoni ya Israele.’

₅“Zwino inwi muṋe ni a zwi ḓivha zwe Juaba ṅwana wa Tseruya a nnyita, zwe a ita vhalangammbi vhavhili vha Israele, Abinere ṅwana wa Nere na Amasa ṅwana wa Jethere. O shulula malofha avho nga tshifhinga tsha mulalo zwa nga ndi nndwani, malofha avho a si na mulandu a khakhaṱhela kha bannda yawe khunduni na kha navhula dzi re ṋayoni dzawe. ₆Ni mu lifhedze nga vhuṱali haṋu, a songo fa nga eṱhe.

₇“Hone vhana vha Barasilai wa Giliadi ni vha itele vhuthu, vha ḽe na vhane vha ḽa ḓafulani ḽaṋu. Vho ntonda ndi tshi shavha mukomana waṋu Abisalomo.

₈“Ni songo hangwa Shimei ṅwana wa Gera, wa Mubenyamini a no bva Bahurimu, o nteketela lu ṱungufhadzaho musi we nda shavhela Mahanaimi. Ndi zwiḽa a tshi ḓa u nṱanganedza Jorodani, ndo mu fulufhedzisa nga dzina ḽa Muṋe washu nda ri ndi nga si mu vhulahe. ₉Huno zwino ni songo mu sedza sa a si na mulandu. Inwi ni munna wa vhuṱali, ni ḓo ḓivha zwine na fanela u mu ita. Naho o kalaha nga a fe nga tshihali.”

₁₀Dafita a dzama, a swiṱwa Muḓini wa Dafita. ₁₁O vha o vhusa Israele a fhedza miṅwaha ya 40, miṅwaha miṱanu na mivhili o vhusa e Hebroni, ya 33 o vhusa e Jerusalema. ₁₂Solomoni a dzula kha khuluṋoni ya khotsi awe Dafita, muvhuso wawe wa ṱoka midzi.

₁₃Liṅwe ḓuvha Adonia ṅwana wa Hagithi a ya ha Batshiba mme a Solomoni. Batshiba a mu vhudzisa a ri, “Ni khou ḓa nga mulalo?”

Adonia a fhindula a ri, “Ndi khou ḓa nga mulalo. ₁₄Hu na zwine nda funa u amba navho.”

Batshiba a tenda a ri, “Ambani zwaṋu.”

₁₅Adonia a ri, “Vhunga vha tshi zwi ḓivha, muvhuso wo vha u wanga. Vhaisraele vhoṱhe vho vha vho sedza nṋe uri ndi ḓo vha khosi yavho. Hone zwithu zwo shanduka, muvhuso wo ya kha murathu wanga, o u ṋewa nga Muṋe washu. ₁₆Zwino hu na tshithu tshithihi tshine nda funa u vha humbela. Vha songo vhuya vha hana.”

Batshiba a ri, “Humbelani zwaṋu.”

₁₇Adonia a ri, “Nga vha humbele khosi Solomoni a mphe Abishaga wa Shuneme a vhe musadzi wanga, ha humbela vhone khosi i nga si hane.”

₁₈Batshiba a tenda a ri, “Ndi zwone. Ndi ḓo ni ambela na khosi.”

₁₉Batshiba a ya ha khosi Solomoni a tshi yo ambela Adonia, khosi ya takuwa uri i mu ṱanganedze, ya wa nga tshifhaṱuwo phanḓa hawe, ya konou dzula kha khuluṋoni yayo. Khosi ya ri hu ḓiswe khuluṋoni ya mme a khosi, a dzula thungo ya tshauḽa tsha khosi.

₂₀Batshiba a ri, “Ndi na khumbelo ṱhukhu ine nda fanela u i swikisa khavho. Vha songo hana.”

Khosi ya fhindula ya ri, “Mme anga, nga vha i swikise, ndi nga si hane.”

₂₁Ndi hone Batshiba a tshi ri, “Nga vha litshe Abishaga wa Shuneme a ṋewe mukomana wavho Adonia a mu dzee.”

₂₂Khosi Solomoni a fhindula mme awe a ri, “Khezwi vha tshi humbelela Adonia uri a ṋewe Abishaga wa Shuneme fhedzi? Khezwi vha sa mu humbeleli na vhuhosi ha vha hawe? Hufha e mukomana wanga, hufha na tshifhe Abiathara na Juaba ṅwana wa Tseruya vha tshi ima nae.”

₂₃Ndi hone khosi Solomoni a tshi ana nga Muṋe washu a ri, “Ngavhe Mudzimu a tshi nthwa a dovha arali Adonia a sa lifha nga ṱhoho yawe nge a humbela izwi! ₂₄Nga Muṋe washu a tshilaho, Ene we a ntika kha khuluṋoni ya khotsi anga Dafita, a khunyeledza zwe a fulufhedzisa, vhuhosi a ṋea nṋe na vhaḓuhulu vhanga, vhukumakuma ṋamusi Adonia u a fa!” ₂₅Ndi hone khosi Solomoni a tshi ruma Benaya ṅwana wa Jehoyada, uyo a ya a vhulaha Adonia.

₂₆Khosi ya vhudza tshifhe Abiathara ya ri, “Iyani masimuni a haṋu ngei Anathotho. Inwi no vha no fanela u fa, hone zwino ndi nga si ni vhulahe, nge na hwala mbulungelo ya Muṋe wa zwoṱhe Muṋe washu phanḓa ha khotsi anga Dafita, na ita na u konḓelela vhuleme hoṱhe he khotsi anga vha ṱangana naho.” ₂₇Zwenezwo Solomoni a thatha Abiathara a si tsha vha tshifhe wa Muṋe washu, ha vha u khunyeledza ipfi ḽe Muṋe washu a ḽi amba Shilo, a tshi amba nnḓu ya Eli.

₂₈Musi mafhungo ayo a tshi swika ha Juaba, ene we a ita tshimbevha na Adonia naho a songo ita tshimbevha na Abisalomo, a shavhela denndeni ya Muṋe washu, a farelela ṋanga dza aḽiṱari. ₂₉Khosi Solomoni a vhudzwa upfi Juaba o shavhela denndeni ya Muṋe washu nahone u tsini na aḽiṱari. Solomoni a ruma Benaya ṅwana wa Jehoyada a ri, “Nga vha ye vha mu vhulahe!”

₃₀Benaya a dzhena denndeni ya Muṋe washu a amba na Juaba a ri, “Khosi i ri, ‘Bvelani nnḓa!’ ”

Huno Juaba a hana a ri, “Aiwa, ndi ḓo fela henefha.”

Benaya a swikisa mafhungo ayo ha khosi a ri, “Juaba o ri, ‘Ndi fela henefha aḽiṱarini.’ ”

₃₁Khosi ya vhudza Benaya ya ri, “Nga vha ite zwine a amba. Nga vha mu vhulahe vha mu swiṱe, vha ralo vha ḓo vha vho ṱanzwa nṋe na nnḓu ya khotsi anga malofha a si na mulandu e a shululwa nga Juaba. ₃₂Muṋe washu u ḓo mu lifhedza malofha e a a shulula, ngauri o vhulaha vhanna vhavhili nga pfumo khotsi anga Dafita vha sa zwi ḓivhi. Vhuvhili havho, Abinere ṅwana wa Nere, mulangammbi wa Israele, na Amasa ṅwana wa Jethere, mulangammbi wa Juda, vho vha vhe vhathu-vhathu, vhe vhavhuya u fhira ene. ₃₃Ngavhe mulandu wa malofha avho u tshi vhilwa kha Juaba na vhaḓuhulu vhawe lini na lini. Hone kha Dafita na vhaḓuhulu vhawe na kha nnḓu yawe na khuluṋoni yawe, ngavhe hu tshi vha na mulalo wa Muṋe washu lini na lini.”

₃₄Ndi hone Benaya ṅwana wa Jehoyada a tshi gonya a vhulaha Juaba, a mu swiṱa shangoni ḽa hawe sogani. ₃₅Khosi ya vhea Benaya ṅwana wa Jehoyada uri a vhe mulangammbi vhuimoni ha Juaba, vhuimoni ha Abiathara a vhea tshifhe Tsadoko.

₃₆Ndi hone khosi i tshi vhidzisa Shimei ya mu vhudza ya ri, “Ḓifhaṱeleni nnḓu fhano Jerusalema, ni dzule henefha, ni songo vhuya na ya huṅwe fhethu. ₃₇Musi une na ṱuwa na wela Govha ḽa Kidroni, vhukumakuma ni ḓo fa; na fa mulandu u ḓo vha u waṋu.”

₃₈Shimei a fhindula khosi a ri, “Zwine vha amba ndi zwavhuḓi. Ndi ḓo ita zwe thovhele muṋe wanga vha amba.” Shimei a dzula Jerusalema tshifhinga tshilapfu.

₃₉Huno ngavhuya ho no fhela miṅwaha miraru, ha shavha phuli mbili dza Shimei dza ya ha Akhishi ṅwana wa Maakha, khosi ya Gathi. Shimei a vhudzwa upfi, “Phuli dzavho dzi ngei Gathi.” ₄₀Shimei a ri u pfa zwenezwo, a hwesa donngi yawe sala, a livha ha Akhishi muḓini wa Gathi a tshi yo ṱoḓa phuli dzawe, a dzi wana Gathi, a vhuya nadzo. ₄₁Huno Solomoni a tshi vhudzwa upfi Shimei o vha o ṱuwa Jerusalema a ya Gathi, a dovha a vhuya, ₄₂a vhidzisa Shimei a mu vhudza a ri, “Ndo ni anisa nga dzina ḽa Muṋe washu nda ni kaidza nda ri, ‘Musi une na ṱuwa na ya huṅwe fhethu, vhukumakuma ni ḓo fa!’ Inwi na mphindula na ri, ‘Zwine vha amba ndi zwavhuḓi. Ndi ḓo zwi ita.’ ₄₃Zwino ndi mini ni songo tevhedza zwe na anela Muṋe washu na ita zwe nda ni laya?”

₄₄Khosi ya vhudza Shimei ya ri, “Mbiluni yaṋu ni a zwi ḓivha zwoṱhe zwe na khakhela khotsi anga Dafita ngazwo. Zwino Muṋe washu u ḓo ni lifhedza zwe na tshinya. ₄₅A vha nṋe Solomoni ndi ḓo shudufhadzwa, nahone khuluṋoni ya Dafita i ḓo dzula yo tsireledzwa phanḓa ha Muṋe washu lini na lini.”

₄₆Ndi hone khosi i tshi ruma Benaya ṅwana wa Jehoyada, a ya a vhulaha Shimei.

Zwo no ralo vhuhosi ha Solomoni ha khwaṱha.