1 MAHOSI 12

₁Rehabiamu a takuwa a ya Shikheme, ngauri Vhaisraele vhoṱhe vho vha vho ya henengei uri vha mu vhumbe khosi. ₂Musi Jerobiamu ṅwana wa Nebati a tshi zwi pfa e Egipita he a vha o shavhela hone a tshi shavha khosi Solomoni, a vhuya henengei. ₃Vhathu vha vhidzisa Rehabiamu, Jerobiamu na tshivhidzo tshoṱhe tsha Vhaisraele vha ya ha Rehabiamu vha mu vhudza vha ri, ₄“Khotsi avho vho vha vho ri hwesa dzhogo i lemelaho, hone arali vha ri fhungudzela mushumo wa tshiṱuhu, vha ri leludzela dzhogo i lemelaho ye Solomoni a ri hwesa yone, ri ḓo vha vhalanda vhavho.”

₅Rehabiamu a vha fhindula a ri, “Ṱuwani ni fhedze maḓuvha mararu ni konou vhuya, ndi ḓo ni fhindula.” Vhathu vha ṱuwa.

₆Khosi Rehabiamu a vhudzisa vhakalaha vhe vha vha vha tshi shumela khotsi awe Solomoni a tshi kha ḓi tshila, a ri, “Nga vha nnyeletshedze uri ndi tshi fhindula avha vhathu ndi ri mini!”

₇Vhone vha mu fhindula vha ri, “Arali vha tshi funa u shumela vhathu havha zwavhuḓi, vha vha fhindule zwavhuḓi; vha ḓo dzula vha tshi vha shumela.”

₈Huno Rehabiamu a litsha nyeletshedzo ya vhakalaha, a yo vhudzisa vhaṱhannga vhe a aluwa navho vha tshi mu shumela. ₉A vha vhudzisa a ri, “Vhathu avha ri nga vha fhindula hani vhane vha ri ndi vha leludzele dzhogo ye khotsi anga a vha hwesa yone?”

₁₀Vhaṱhannga vhe vha aluwa nae vha mu fhindula vha ri, “Vhathu havho vhe vha vha vhudza vha ri khotsi avho vho vha hwesa dzhogo i lemelaho, zwino vhone vha vha leludzele dzhogo, vha vha fhindule vha ri, ‘Tshinwaunwane tshanga tsho denyefhala u fhira khundu dza khotsi anga. ₁₁Khotsi anga vho vha vho ni hwesa dzhogo ya u lemela, nṋe ndi ḓo ita uri i lemelese. Khotsi anga vho vha vha tshi ni rwa nga zwimebi, nṋe ndi ḓo ni rwa nga mboma.’ ”

₁₂Musi ho no fhela maḓuvha mararu, Jerobiamu na vhathu vhoṱhe vha humela ha Rehabiamu, nga he khosi ya vha vhudza ya ri, “Ṱuwani ni fhedze maḓuvha mararu ni konou vhuya ha nṋe, ndi ḓo ni fhindula.” ₁₃Khosi ya fhindula vhathu nga u tou vha ḽela vhuhali, ya nyadza nyeletshedzo i no bva kha vhahulwane, ₁₄ya tevhela nyeletshedzo ya vhaṱhannga ya ri, “Khotsi anga vho vha vho ni hwesa dzhogo i lemelaho, nṋe ndi ḓo ita uri i lemelese. Khotsi anga vho vha vha tshi ni rwa nga zwimebi, nṋe ndi ḓo ni rwa nga mboma.” ₁₅Khosi a yo ngo thetshelesa vhathu, izwo zwo vha zwo itwa nga Muṋe washu, uri hu khunyelele ipfi ḽe Muṋe washu a vhudza Jerobiamu ṅwana wa Nebati nga mulomo wa Ahia wa Shilo.

₁₆Musi Vhaisraele vhoṱhe vha tshi vhona uri khosi yo landula zwe vha humbela, vha fhindula khosi vha ri,

Ndi hone Vhaisraele vha tshi ya hayani. ₁₇Huno Vhaisraele vhe vha vha vha tshi dzula miḓini ya Juda, Rehabiamu a ḓi vha vhusa.

₁₈Khosi Rehabiamu a ruma Adoniramu we a vha a tshi langa mushumo wa khombekhombe uri a ye ha Vhaisraele, hone vhone vha mu kanḓa nga matombo vha mu vhulaha. Zwo no ralo khosi Rehabiamu a ṱavhanya a dzhena kha gariki yawe a shavhela Jerusalema. ₁₉U bva zwenezwo Vhaisraele a vho ngo tsha luvha nnḓu ya Dafita, na ṋamusi.

₂₀Musi Vhaisraele vha tshi zwi pfa uri Jerobiamu o vhuya a tshi bva Egipita, vha mu vhidza uri a ḓe tshivhidzoni, vha mu vhumba khosi ya Israele ḽoṱhe. Tsinde ḽa Juda ndi ḽone fhedzi ḽe ḽa sala ḽi tshi luvha nnḓu ya Dafita.

₂₁Musi Rehabiamu a tshi swika Jerusalema, a kuvhanganya vhahali vhukuma vha 180 000 vha tsinde ḽa Juda na ḽa Benyamini, uri vha yo lwa na muvhuso wa Israele vha dzhiulule muvhuso u vhe wa Rehabiamu ṅwana wa Solomoni. ₂₂Hone ipfi ḽa Mudzimu ḽa ḓa ha muporofita Shemaya ḽa ri, “Vhudza Rehabiamu ṅwana wa Solomoni khosi ya Juda na vhoṱhe ₂₃vha Juda na vha Benyamini, na vhathu vhoṱhe u ri, ₂₄‘Muṋe washu u ri: Ni songo gonya u lwa na Vhaisraele vha haṋu. Iyani hayani noṱhe, ngauri zwo itwa nga Nṋe.’ ” Ndi hone vha tshi thetshelesa ipfi ḽa Muṋe washu, vha dovha vha humela hayani, nga he Muṋe washu a vha laya.

₂₅Khosi Jerobiamu a fhaṱa mitsheṱo muḓini wa Shikheme mivhunduni ya Efraimi, a dzula hone. A ṱuwa a yo fhaṱa mitsheṱo muḓini wa Phenuele.

₂₆Jerobiamu a elekanya a ri, “Muvhuso u nga vhuelela kha nnḓu ya Dafita. ₂₇Arali avha vhathu vha ḓi gonya vha tshi yo ṋekedza zwiṱhavhelo thembeleni ya Muṋe washu ngei Jerusalema, vha ḓo dovha vha luvha muṋe wavho Rehabiamu, khosi ya Juda. Vha ḓo mmbulaha vha vhuelela ha khosi Rehabiamu.”

₂₈Khosi ya funzedzana na vhaeletshedzi vhayo, ya konou vhumba mbohwana mbili dza musuku, ya amba na vhathu ya ri, “Zwi a ni netisa u gonya Jerusalema. Inwi Vhaisraele, midzimu yaṋu yo ni pfulusaho Egipita ngei.” ₂₉Iṅwe mbohwana ya musuku a i vhea Bethele, iṅwe a i vhea Dani, ₃₀izwo zwa ita uri vhathu vha tshinye. Vha ita na u ḓala muḓalo vho hwala iḽa iṅwe mbohwana ya musuku u vhuya u swika Dani.

₃₁Jerobiamu a ita na u fhaṱa zwitembele zwikwarani, a vhea vhotshifhe vha no bva kha miṱa yoṱhe vha si vha tsinde ḽa Livi.

₃₂Jerobiamu a thoma vhuṱambo nga ḓuvha ḽa 15 ḽa ṅwedzi wa vhuṱanu na vhuraru, vhune ha fana na vhuṱambo ha mishasha vhune ha itwa kha ḽa Juda. Mboho dza musuku dze a dzi vhumba a dzi ṋekedza zwiṱhavhelo kha aḽiṱari henefho Bethele, thembeleni ya Bethele a dovha a vhea vhotshifhe vhane vha shuma zwitembeleni zwa zwikwarani.

₃₃Nga ḓuvha ḽa 15 ḽa ṅwedzi wa vhuṱanu na vhuraru, ḓuvha ḽe Jerobiamu a tou ḽi vhea ene muṋe, a ya Bethele a ṋekedza zwiṱhavhelo kha aḽiṱari a ita vhuṱambo he a vhu thomela Vhaisraele.