1 MAHOSI 11

₁Khosi Solomoni o funa vhasadzi vhanzhi vha vhatsinda, hu sa vhaliwi na ṅwananyana wa Farao. O dzea vhasadzi vha Vhamuaba na Vhaamoni na Vhaedomo na Vhasidoni na Vhahithi – ₂tshakha dze Muṋe washu a vhudza Vhaisraele a ri, “Ni songo dzetshelana navho, ngauri vhukuma vha nga ḓo rembulusela mbilu dzaṋu kha midzimu yavho.” Naho zwo ralo Solomoni a vha funa, a vha nambatela. ₃O vha e na vhasadzi vha 700 vha vhakololo, na vhasadzi vha dziphuli vha 300. Vhasadzi vhawe vha mu xedza. ₄Musi Solomoni o no kalaha, vhasadzi vhawe vha rembulusela mbilu yawe kha miṅwe midzimu, a si tsha ḓikumedza Muṋe washu Mudzimu wawe nga mbilu yawe yoṱhe sa Dafita khotsi awe. ₅Solomoni a luvha Ashtharotho mudzimu wa musadzi wa Vhasidoni na Milikhomu mudzimu u nengisaho wa Vhaamoni. ₆Solomoni a ita zwi sa takadzi Muṋe washu, a si tsha tevhela Muṋe washu tshoṱhe unga Dafita khotsi awe.

₇Nṱha ha thavha vhubvaḓuvha ha Jerusalema, Solomoni a fhaṱa fhethu ha u luvhela Khemosho mudzimu u nengisaho wa Muaba na fhethu ha u luvhela Milikhomu mudzimu u nengisaho wa Vhaamoni. ₈Solomoni a fhaṱa na fhethu ha u luvha hune vhasadzi vhawe vha vhatsinda vha fhisa zwioro, vha ṋekedza midzimu yavho zwiṱhavhelo.

₉Muṋe washu a sinyutshela Solomoni nge mbilu yawe ya furalela Muṋe washu Mudzimu wa Israele, we a vha o ḓisumbedza ene luvhili. ₁₀Naho Muṋe washu o vha o dzivhisa Solomoni u luvha miṅwe midzimu, Solomoni ho ngo tevhedza ndaela ya Muṋe washu. ₁₁Muṋe washu a vhudza Solomoni a ri, “Vhunga wo ḓiimisela u pfuka mulanga wanga na ndayo dzanga dze nda u laya, ndi ḓo u dzhiela muvhuso nda u ṋea muṅwe wa magota au. ₁₂Naho zwo ralo a thi nga zwi iti iwe u tshi kha ḓi tshila, ndi tshi itela Dafita khotsi au. Muvhuso ndi ḓo u dzhiela ṅwana wau. ₁₃Huno a thi nga mu dzhieli muvhuso woṱhe, ndi ḓo mu ṋea tsinde ḽithihi ndi tshi itela Dafita mulanda wanga na Jerusalema he nda hu khetha.”

₁₄Muṋe washu a ita uri Hadadi wa nnḓu ya musanda wa Edomo a vutshele Solomoni. ₁₅Zwiḽa kale musi Dafita a tshi khou lwa na vha Edomo, Juaba mulangammbi o vha o ya u swiṱa vhafu, a vhulaha vhanna vhoṱhe vha Edomo. ₁₆Juaba na Vhaisraele vhoṱhe vho dzula henengei vha fhedza miṅwedzi miṱanu na muthihi, vha vhuya vha vhulaha vhanna vhoṱhe vha Edomo. ₁₇Hone Hadadi, we a vha a tshi kha ḓi vha mutukana, a shavhela Egipita na vhaṅwe magota vha Edomo vhe vha vhuya vha shumela khotsi awe. ₁₈Vha takuwa Midiani vha livha Pharani. Vha dzhia vhaṅwe vhanna vha Pharani vha ṱuwa navho, vha livha Egipita ha Farao khosi ya Egipita, uyo a ṋea Hadadi nnḓu na tsimu na zwiḽiwa.

₁₉Farao a takalela Hadadi lwe a vhuya a mu ṋea murathu wa mufumakadzi wawe Thaphenese uri a mu dzee. ₂₀Murathu wa Thaphenese a mu bebela ṅwana wa mutuka we a vha a tshi pfi Genubathi, onoyo o lelwa nga Thaphenese pfamoni ya musanda. Henefho Genubathi o vha a tshi dzula na vhana vha Farao.

₂₁Musi Hadadi e Egipita, a pfa upfi Dafita o dzama, na uri Juaba mulangammbi na ene o fa. Ndi hone Hadadi a tshi amba na Farao a ri, “Nga vha litshe ndi ṱuwe ndi vhuelele shangoni ḽa hashu.”

₂₂Farao a vhudzisa a ri, “Ndi tshini tshine na tshi shaya fhano lune na funa u vhuelela shangoni ḽa haṋu?”

Hadadi a fhindula a ri, “A hu na, hone nga vha litshe ndi ṱuwe!”

₂₃Mudzimu a ita na uri swina ḽiṅwe ḽi vutshele Solomoni, uyo o vha e Rezoni ṅwana wa Eliada, we a vha o shavha muṋe wawe Hadadi Ezere khosi ya Tsoba. ₂₄O kuvhanganya vhanna, a vha murangaphanḓa wa tshigwada tsha mashandukwa zwiḽa Dafita a tshi lozwa mmbi ya Tsoba, mashandukwa ayo a livha Damasko, vha swika vha dzula hone vha vhusa. ₂₅Rezoni o vha swina ḽa Israele misi yoṱhe Solomoni a tshi kha ḓi tshila, a ita uri u dina ha Hadadi hu kalule. Rezoni o vha a tshi vhusa Aramu, e swina ḽa Vhaisraele.

₂₆Jerobiamu ṅwana wa Nebati na ene a shandukela khosi. O vha e muṅwe wa magota a Solomoni, e Muefraimi wa Tsereda, mme awe e tshilikadzi a tshi pfi Tserua. ₂₇Ngea mafhungo a musi a tshi shandukela khosi. Solomoni o vha a tshi khou fhaṱa mirango ya u tika, a tshi khou thivha mavhende mutsheṱoni wa muḓi wa Dafita khotsi awe. ₂₈Zwino Jerobiamu o vha e munna ane a ḓipfa, nahone musi Solomoni a tshi vhona uri uyo muṱhannga u shuma mushumo wawe zwavhuḓi, a mu vhea uri a lange mushumo woṱhe wa khombekhombe wa vha Manase na Efraimi.

₂₉Muṅwe musi Jerobiamu a tshi khou bva Jerusalema, a ṱangana na Ahia muporofita wa Shilo, ó ambara phuraphura ntswa. Ho vha hu si na muṅwe henefho, vhe vhavhili fhedzi. ₃₀Ahia a bvula phuraphura ntswa ye a vha o i ambara, a i kherukanya ya bva mbemba dza 12, ₃₁a amba na Jerobiamu a ri, “Dzhiani mbemba dza fumi dzi vhe dzaṋu, ngauri Muṋe washu Mudzimu wa Israele u ri, ‘Ndi ḓo dzhiela Solomoni muvhuso, iwe nda u ṋea matsinde a fumi. ₃₂Hone ene ndi ḓo mu ṋea tsinde ḽithihi, ndi tshi itela mulanda wanga Dafita na muḓi wa Jerusalema we nda u nanga kha matsinde oṱhe a Israele. ₃₃Izwo ndi ḓo zwi ita nge Solomoni a mpfuralela a luvha Ashtharotho mudzimu wa musadzi wa Vhasidoni na Khemosho mudzimu wa Vhamuaba na Milikhomu mudzimu wa Vhaamoni, a si tshimbile nḓilani dzanga, a si ite zwi ntakadzaho, a si tevhedze ndayo dzanga na milayo yanga unga Dafita khotsi awe. ₃₄Hone Solomoni a thi nga mu dzhieli muvhuso woṱhe ene muṋe, ndi ḓo mu litsha a vhusa a vhuya a fa, ndi tshi itela Dafita mulanda wanga we nda mu nanga, a thetshelesa milayo yanga na ndayo dzanga. ₃₅Ndi ḓo dzhiela ṅwana wawe muvhuso, iwe nda u ṋea matsinde a fumi, ₃₆ṅwana wawe nda mu ṋea tsinde ḽithihi uri mulanda wanga Dafita a dzule o mpfarela luvhone Jerusalema, muḓi we nda u nanga uri ndi vhee dzina ḽanga hone. ₃₇Iwe Jerobiamu ndi ḓo u dzhia wa vhusa zwoṱhe zwine mbilu yau ya zwi tama, wa vha khosi ya Israele. ₃₈Arali wa ita zwoṱhe zwine nda u laya, wa tshimbila nḓilani dzanga, wa ita zwi ntakadzaho nga u tevhedza ndayo dzanga na u vhulunga milayo yanga unga mukoma wanga Dafita, ndi ḓo vha na iwe. Ndi ḓo u fhaṱela muvhuso wa dzula u hone unga we nda fhaṱela Dafita, ndi ḓo u ṋea Israele. ₃₉Ndi ḓo ṱukufhadza vhaḓuhulu vha Dafita nga mulandu wa vhuvhi ha Solomoni, hone a thi nga vha ṱukufhadzi lini na lini.’ ”

₄₀Solomoni a linga u vhulaha Jerobiamu, hone Jerobiamu a shavhela ha khosi Shishaka wa Egipita, a dzula hone Solomoni a vhuya a dzama.

₄₁Mafhungo maṅwe oṱhe a Solomoni, zwoṱhe zwe a ita na zwa vhuṱali hawe, zwo ṅwalwa kha Histori ya Solomoni. ₄₂Solomoni o vhusa ḽoṱhe ḽa Israele e Jerusalema a fhedza miṅwaha ya 40. ₄₃Solomoni a dzama, a yo awela na vhokhotsi awe, a swiṱwa Muḓini wa Dafita khotsi awe. Ṅwana wawe Rehabiamu a vha khosi vhudzuloni hawe.